Read Shughni مرقس 9 Bible Online

مرقس 9 - Shughni bible

مرقس 9

¹اَت یو یی لوْد: «خُب بَشٲند وِزوْنېت یِلأڤ از تَمه یېت یوْدَند څه تا خُڎای پادښاهی قُدرَت قَتی څه نه یاڎد، نه مَرېت ته.»

²خاږ مېٿ نَږجأد ات عیسی پِطرس اَت یعقوب اَت یوحنایی زاښت اَت وېڤی خو قَتی پی کوه نوْل یاد. یو تَرَم مېڤ ښاگِردېن قَتی طاقٲ ڤُد اَت وېڤ خېزَند وی چِهره بِدأل سُت.

³اَت وی لُقېنېن دِس سَفېد اَت روښنایی یېن سَت یی چأیَٿ ته زِمأڎ تی نه ڤأرڎید لُق دوْنگه خُشروی زِنێد.

⁴بې خِلیوَندَٿ موسی پَیغَمبَر اَت اِلیاس پَیغَمبَرېن نَښتاید ات وی قَتی یېن دَرَو نَقل سَت.

⁵پِطرس عیسی ره لوْد: «اې اُستاد، څَرأنگ بَشٲند مأشأم یوْدَند څه. اَرَی کَپأ مازأم ییو تُرد اَت یِگه موسی پَیغَمبَرد اَت یِگه اِلیاس پَیغَمبَرد.»

⁶یو یی نَوِزوْنت چیز ته لوْڤد دِجأت وأڎېن لَپ ښاج ڎوید.

⁷اَت وی وَختَند اَبری از آسموْن نَښتوید اَت وېڤ تی یی سایأ چود. از وی اَبری صَدا یَت اَت لوْدی: «یِد مو نازیوْن پُڅ، تَر وی نِغوْږېت.»

⁸وأڎېن سأمَله خو گَرگِنوښه چوښت اَت یی چی یېن نه وینت. وېڤ قَتی بَغَیر از عیسی یی چیٿ نَڤُد.

⁹وَختی از کوه ېن څه خأڤد ڤَد عیسی یی وېڤَرد لوْد: «اِکمی کارېت څه وینت یی چِرد مأ لوْڤېت تا وَختی یِدی آدَم پُڅ بعد از خو میداو زِنده څه نه سُڎج.»

¹⁰وأڎېن از وی امر اِطاعت چود اَما خو بَینَردېن معنای «زِنده سِتاو بعد از میداو» نفأمت.

¹¹وأڎېن از وی پېښست: «چیزَرد مُلایېن لوْڤېن پِرا از مَسیح اِلیاس پَیغَمبَر یاڎد؟»

¹²عیسی یی لوْد: «اوْن، اِلیاس پَیغَمبَر ته سَر پِرا یاڎد تا مَردُم بَینَرد اِرتِباط بَرقَرار کِښت. چیزَرد نِڤِشچ سُڎج آدَم پُڅ لَپ قینی وینت اَت خوار اَت خَنیف ته سوْد؟

¹³تَمَرد ته لوْم اِکوی جِناو اِدی دَرباره اِلیاس پَیغَمبَر نِڤِشچ څه سُڎج، یو یَت اَت مَردُم دِل هر بَدی څه ڤُد وی قتی یېن چود.»

¹⁴وَختی وأڎېن تَر هچگه ښاگِردېن خېز څه فِریپت لَپ مَردُمېنېن وېڤ ښاگِردېن گَرگِنوښه جأم ڤَد اَت مُلایېن یَهودېن وېڤ قَتی ېن قین وقال چود.

¹⁵مَردُمېنېن عیسی څه وینت لَپ حَیرَتېن رېد اَت ژێښت ژێښتېن تَر وی خېز یَت تا وِرد سَلوْم کِنېن.

¹⁶عیسی یی از وېڤ پېښڅت: «چیز جأت وېڤ قَتی قین وقال کِنېت؟»

¹⁷یی چارِک از وېڤ مَردُمېن مِڎېنَردی جَواب ڎاد: «اې اُستاد، وُزُم خو پُڅ تَر تو خېز ڤوږج. وِند وأم پی وی یار سُڎج اَت یو نه ڤأرڎید گأپ ڎید.

¹⁸هر جاندی یو روح وی ته څه فِراپت وی ته زِمأڎَرد ڎید ات از وی غێڤ ته خیف نَښتیزد، خو ڎِندوْنېن ته یَکدِگَرَرد سێود اَت اَندێغَٿ ته رِست. از تو ښاگِردېنُم خاهِښ چود وی جِن زِوێڎېن اَما وأڎېن نه ڤأرېن ڎاد.»

¹⁹عیسی یی وېڤَرد مردُمېنرد لوْد: «تَمه یېت څرأنگ بې اېموْن! تا څوْندېڅ تَمه قَتی ڤیم؟ اَت تا څه څوْندېڅ تَمه حَوصِله کِنُم؟ وی غِڎأ تَر مو خېز ڤېت.»

²⁰وأڎېن وی غِڎأ تَر وی خېز ڤود. وَختی یو جِن عیسی تېزَٿ څه وینت وی غِڎأیی خَښ وأم اَنجوڤد اَت وی یی زِمأڎَرد ڎاد اَت از وی غێڤ خیف نَښتوید اَت ڎُست اَت پاڎی وېڎد.

²¹عیسی یی از وی تأت پېښڅت: «څوْند وَخت سُڎج یَم تو پُڅ دِسگه څه؟» وی تأتی جَواب ڎاد: «از ځُلِکی،

²²لَپ وَخت یَم روح وی اَر ښَڅ اَت یاڅ پِتێوج تا وی زینت. اَما څه ڤأرڎِیی، مُرد دِلسوزی یَت یاردَم فِرێپ.»

²³عیسی یی وِرد لوْد: «چیز لوْڤی وُز نه ڤأرڎِیُما؟ هر چِند اېموْن څه ڤِد فُک چیز مُمکِن.»

²⁴وی غِڎأ تأتی سراواز قیود: «وزُم اېموْن دار اَما مو اېموْن لَپ کأم. یاردَم مُرد فِرێپ وُز از بې اېموْنی نِجات ڤِریم.»

²⁵وَختی عیسی یی څه وینت وأڎ مَردُمېن تَر وی خېز دَرَو جمع سېد ڤَد یو یی وی جِنیاتَردی فَرموْن ڎاد: «اې جِن تُت دی غِڎأ گوْل اَت چون، څه چوږج. تو تی فَرموْن ڎأم از دی تَر ڤَج نَښتی اَت هچگه اَر دی نه دېڎی.»

²⁶یو روحیی وأغَست ڎاد اَت وی غِڎأیی خُب خَښ کلتینت اَت از وی نَښتوید. وی غِڎأ رأنگ مُرڎه جِناو سُت. دِس ڤُد یِلأڤېن لوْد: «یو موږج.»

²⁷اَما عیسی یی وی ڎُستَرد اَنجوڤد خو وی یی سېنت اَت یو خو پاڎ تی وِروڤد.

²⁸عیسی تَر چید توید اَت وی اصحابېنېن قَرارَٿ از وی پېښڅت: «چیزَردأم مأش نه ڤأرڎاد وی جِنیات زِوێڎأم؟»

²⁹عیسی یی لوْد: «دِسگه اَرواح زِوێستاوَند بَغَیر از زارگی پی خُڎای اِمکوْن گه نِست.»

³⁰عیسی اَت وی ښاگِردېنېن از وی قِشلاق نَښتاید اَت از مَنطِقه جَلیلېن نَږجأد. عیسی یَردی نَفارت یی چأی فأمت یو تَر کأ،

³¹دِجأت خو ښاگِردېنَرد تعلیم ڎاد اَت لوْدی: «آدَم پُڅ ته مَردُم مِڎُست تَسلیم سوْد اَت وأڎ ته وی زینېن اَما اَره مېٿ تی ته ڤاگه زِنده سوْد.»

³²اَما وأڎېن وی گأپ معنا نَفأمت، یو ته چیز لوْڤد. اَت ښاجېن ڎوید از وی هچگه گأپ پېښڅېن.

³³وأڎېن تَر قَریه بَنوْمی کَپِرناحوم یَت اَت وَختی تَر چیدېن دېد عیسی یی از خو ښاگِردېن پېښڅت: «پوْندَردېت چیز لوْد؟»

³⁴وأڎېن قَرار ڤَد دِجأت پوْندَرد وېڤ گأپ دِسگه ڤُد اِدی وېڤ بَینَرد چأی غُلأدی.

³⁵یو نوست اَت وېڤ دوازده ښاگِردی تَر خو خېز تِلأپت اَت وېڤَردی لوْد: «هر چأی خواهِښ څه کِښت یو اَوَل سوْد خو از فُکَٿ ځُلِکدی وِزېنت اَت خِدمَتگار فُکَٿرد ڤِد.»

³⁶اَت یویی یی کودک زاښت اَت وی یی فُکَٿ پِراندی خو پی بَت اَنجوڤد اَت لوْدی:

³⁷«هر تأم از مېڤ کودَکېن بَنوْم مو قَبول څه کِښت، مُیی قَبول چوږج. اَت هر تأم مو قَبول څه چوږج مُیَٿی قَبول نَچوږج اَما یو یی مو څه باښچ وی ته قَبول کِښت.»

³⁸یوحنایی لوْد: «اې اُستاد، مأشأم یی چارِک وینت یو یی تو نوْم لوْڤداو قَتی جِنیاتی زِواست، اَت از مأش نَڤُد. کوښِښأم چود مألأکأم وی.»

³⁹عیسی یی لوْد: «پی وی مأرَفېت، دِجأت هر تأم مو نوْم یاڎ کِښت اَت مُجزه څه کِښت، وی وَختَند ته نڤأرڎېد از مو بَد لوْڤد،

⁴⁰دِجأت هر تأم بَر ضِدی مو څه نِست یو مو قَتی.

⁴¹دی خُب بَشٲند فأمېت هر تأم به نوْم مو یی پیاله ښَڅ تَمَرد څه ڎید خُڎای ته هچٿ بې مُزد وی نَلأکِښت.

⁴²هر چِدوْم از مېڤ ځُلِکېن مُرد اېموْن څه ڤیرت ات یِچی وېڤ گُمراه څه کِښت، بیدی اِدی خِدارج ژیر وی نَفَر مأکَرد وېڎج سوْد اَت اَر ښَڅ پِتێوج سوْد.

⁴³وَختی تو ڎُست تو گُمراه چی چید څه سوْد، وی ښِچَند، دِجأت بیدی از دی یِدی بې ڎُست هر بِهښت سه از دی یِدی ڎو ڎُست قَتی اَر دوزَخ پِتێوج سأوی اَت وی یاڅَند هَچَٿ وِزِداو څه نِست.

⁴⁴(جای اِدی وی چِخیرج نه میرت اَت وی یاڅ څه نه وِزوْد.)

⁴⁵اَت تو پاڎ تو گُمراه څه کِښت، وی ښِچَند دِجأت شُت اَر بِهښت سه اَت بیدی از دی یِدی ڎو پاڎ قَتی اَر دوزَخ پِتێوج سأوی.

⁴⁶(جای اِدی وی چِخیرج څه نه میرت اَت وی یاڅ څه نه وِزوْد.)

⁴⁷اَت تو څېم تو گُمراه څه کِښت وی از کَله خوْنک کِن، دِجأت بیدی یِدی یی څېم قَتی تَر وی جای سأوی یِدی خُڎای پادښاهی یَمَند حُکومَت څه کِښت از وېڤ ڎو څېم قَتی اَر دوزَخ پِتێوج سأوی.

⁴⁸جای اِدی وی چِخیرج څه نه میرت اَت وی یاڅ هَچَٿ څه نه وِزوْد،

⁴⁹اِکوی جِناو اِدی آدَمېن یاڅ اَت نَمَک قَتی طِلا پاک څه کِنېن خُڎای ته اِک دی جِناو آدَمېن پاک کِښت.

⁵⁰نَمَک یی چیزِیی خُب اَما خو مُزه ڤا از ڎُست څه ڎید هچگه څَرأنگ ڤاگه خو مُزه ڤِرید؟ تَمه مِس یَکدیگَر قَتی نَمَک جِناو ڤیېت تا آروْمی یَند زِنده‌گی کِنېت.»