Read Shughni روت 3 Bible Online

روت 3 - Shughni bible

روت 3

¹یی مېٿ نعومی، روتَرد لوْد: «رِزین وَخت یَٿچ اِدی تُرد چار ڤِریم تا تو زِندگی به خُشی اَت خُبی نَږجیست.

²تو به یاڎ ڤِد اِکو بوعز تُت دِگه ږِنکېن قَتی وی کِشتزارَرد راږځ څه ڎوڤد، یو از مأش ذات اَت نُر ښأب ته شِرُم تی چوشچ پاک کِښت.

³تٲم شِچ خو زِنی بیدی پوښاک پِنِځ اَت عطر خو ڎه، خو تَر شِرُم سه. اَما تلاش کِن بوعز تو مٲ وینت، تا خو ښوْم گَرڎه خیرت اَت ښېفست.

⁴اَت یو دی ښاڤد وی جای نِښوْن کِن، اَت تٲم سه وی لېف پِتیر کِن اَت وی پاڎېن خېز ڤه ښافڅ. تٲم ته یو تُرد لوْڤد تو چیز بایَد کِنی.»

⁵روتی خو خیښَرد لوْد: «هر چیز مُرد څه لوْڤی، وُز ته اِکوی تی کِنُم.»

⁶تٲم تَر شِرُم سَت اَت، هر چیز وَم خیښ وَمَرد څه لوْد اِکوی تی یی چود.

⁷بوعزی خود اَت بِراښتی اَت وی دِل خُش سُت خو توید، چوشچ وێبېن پَلِندی ښاڤد. تٲم یٲ آسته آسته یَت اَت، وی لېفی از وی پاڎېن تی سېنت خو ښاڤد.

⁸اَت بَرابَر ښأبَرد یو چارِک سَراسیمه سُت یی ږِنِک وی پاڎېن خېزَند ښێڤځِن.

⁹اَت لوْدی: «تُت چأی؟» یٲ یی لوْد: «وُزُم تو کَنیځ، روت، تٲم خو دوْمأن خو کَنیځ تی ڎه دِجأت تُت مأش کَسات.»

¹⁰یو یی لوْد: «اې رِزین خُداوَند تُرد بَرَکَت ڎید! هر چیزَت نُر څه چود خو محبَتَت از پِراکی بېښدی چود. تو ڤٲرڎی یی اِدی یی جَووْن، بای یا نادار، دٲمتی تِیی اَما دی کارَت نه چود.

¹¹ای رِزین شِچ، ښاج مٲ ڎێر! هر چیز مُرد څه لوْڤی تُرد ته کِنُم، دِجأت فُکَٿ مو قَوم می ښأر تو نېک وِزوْنېن.

¹²اَت شِچ راست اِدی وُزُم کَسات اَما کَسات دِگه از مو پِرادی تُرد یَست.

¹³نُر ښأب یوْدَند رِس اَت از وی سَحروْنی اگه حَق کَسات ته تُرد اَدا څه کِښت، خُب، اَت اگه خاهِښ نه کِښت اِدی حَق نگأبوْنی تُرد اَدا کِښت، پَس قَسَم به حَیات خُداوَند اِدی وُز ته تُرد وی اَدایُم، شِچ تا سحرکی یېڅ ښافڅ.»

¹⁴تٲم تا سحرَکِیېڅ وی پاڎېن خېزَند ښاڤد، پِرا از رُخ ڎێد اِدی یِچأیَٿ از همدِگَر فَرق مأکِښت، اَنداید، اَت بوعز لوْد: «اَما یِچأی مأ فأمت یَم ږِنِک تَر شِرُم یَٿچ.»

¹⁵بوعز تَر روت لوْد: «ڤه خو تیت اَنجه.» یٲ یی اَنجوڤد اَت یو یی خاږ طاقی چوشچ اَر وَم تیت چود اَت وَم سیڤد تی یی رِبود خو یٲ تَر چید تاید.

¹⁶اَت تَر خو خیښ خېز فِریپت، یٲ یی از وَم لوْد: «اې رِزین، تو تی چیز نَږجید؟» تٲم هر چیز یو چارِک وَمَرد څه چود، لوْدی.

¹⁷اَت لوْدی: «می خاږ طاقی چوشچ مُرد دأک چود اَت لوْدی اِدی تَر خو خیښ خېز خالی ڎُست مأسه.»

¹⁸وَم خیښ نعومی لوْد: «اې رِزین آروْم نِٿ تا وِزوْنی یِدی یَم کار ته څرأنگ سوْد، دِجأت اِدی تا ته یو چارِک نُر می کار خَلاص نه کِښت آروْم ته نه نیٿت.»