Read Sidama_Qullaawa _Maxaafa KALAQAMA 1 Bible Online

KALAQAMA 1 - Sidama_Qullaawa _Maxaafa bible

KALAQAMA 1

¹Maganu umo asse gordonna baatto kalaqino.

²Hatte yannara, baatto suudu noosekkitenna mullichote; tunsichuno diimete aana no; Maganu Ayyaani wayi iimaanni millisanni no.

³Hakkunni gedensaanni Maganu, «Xawaabba ikko» yii; xawaabbano ikki.

⁴Maganuno, xawaabbu dancha ikkinota lai; xawaabbano tunsichuwiinni badi.

⁵Xawaabbaho, «Barra» tunsichoho, «Hashsha» yee su'ma fushshi; barru hashshi; hashshuno soodi; kuni umi barraati.

⁶Hakkunni gedensaanni Maganu, «Iimi waa uullahuwiinni badate gordu dukkanu gede ikkona» yii;

⁷kunni garinni Maganu gordo dukkanu gede asse seekki; qoleno dukkanu gede ikkino gordira aleenninna woroonni noo wayibba badantanno gede assi; yiino gedeno ikki.

⁸Maganu hakkonne dukkana, «Gordo» yii. Barru hashshi; hashshuno soodi; kuni layinki barraati.

⁹Hakkunni gedensaanni Maganu, «Uulla reqecci yite leeltanno gede, gordoho woroonni noo wayi baalu mitto darga gamba yoo» yii; yiino gedeno ikki.

¹⁰Maganu uulla, «Baatto» yii; mitto darga gamba yiino waano, «Baara» yii; Maganu hakkuno dancha ikkinota lai.

¹¹Hakkunni gedensaanni Maganu, «Baatto laalanno gidenna addi addi mu'ro, sirchi sirchinsa garinni laaltanno haqqe mu'risso» yii; yiino gedeno ikki.

¹²Baatto guma laalanno gidenna mu'ro sirchi sirchinsa garinni gumu afidhino laalo laaltanno haqqe sirchi sirchinsa garinni mu'rissu. Maganu hakkuno dancha ikkinota lai.

¹³Barru hashshi; hashshuno soodi; kuni sayikki barraati.

¹⁴Hakkunni gedensaanni Maganu, «Barra hashshuwiinni badate addi addi caabbiyye gordu aana heedho; barruwa, wogganna diro baddanno malaatta ikkito;

¹⁵baattote xawaabba aate gordu aana heedhe xawisso» yii; yiino gedeno ikki.

¹⁶Kunni garinni Maganu lame lowiddaanna caabbiyye kalaqi; jawu caabbichi arrishsho barra, shiimu caabbichi aganu hashsha xawanno gede assi; hattono beeddahe kalaqi.

¹⁷Tenne caabbiyye gordoho wori; konne assinohu, baattote xawaabba uyitanno gede,

¹⁸barrunna hashshu aana roorre heedhannonsa gedeetinna tunsichonna xawaabba baddaraati. Maganu hakkuno dancha ikkino gede lai.

¹⁹Barru hashshi; hashshuno soodi; kuni shoolki barraati.

²⁰Hakkunni gedensaanni Maganu, «Wayi giddo lubbo afi'rinohu addi addi kalaqami wo'mo; ceano iima buubbo» yii.

²¹Kunni garinni Maganu lowiddaanna baaru moyichubba, wolootano wayi giddo heedhannorenna milli yitannore addi addi kalaqama hattono addi addi dani cea kalaqi. Maganu hakkuno dancha ikkinota lai.

²²Maganu, «Qalle qalamme sirchi'ne baaru waa wo'mo; ceano baattote aana batidho» yee maassi'rinsa.

²³Barru hashshi; hashshuno soodi; kuni ontikki barraati.

²⁴Hakkunni gedensaanni Maganu, «Baatto addi addi kalaqama lubbo noonsare, addi addi saada, godowunni ha'ranno kalaqamanna moyicho fushshito» yii; yiino gedeno ikki;

²⁵Kunni garinni Maganu addi addi moyicho, addi addi saada, baattote aana godowunni hadhanno kalaqama danu danunkunni kalaqi. Maganu hakkuno dancha ikkinota lai.

²⁶Hakkunni gedensaanni Maganu, «Manna daninkenninna suudinkenni kalanqo; mannuno baaru giddo hee'ranno qulxu'me, iima buubbanno cea, saadatenna baattote aana godowunni ha'ranno kalaqama, hattono baatto baala gashshona» yii.

²⁷Maganu manna umisi daninni kalaqi; kalaqinosihuno umisi daninniiti; manna kalaqi woyite, labbaahanna meyata asse kalaqinonsa.

²⁸Maganu manna, «Ille ilamme, sirchi'ne baatto wo'mo; baattono ki'ne gashshitinannita ikkito; baaru giddo hee'ranno qulxu'mira, gordoho buubbanno cearanna baattote aana milli yaanno kalaqami lubbo afi'rinohu baalu aana roorre afidhe» yee maassi'rinsa.

²⁹Maganuno, «Sagale ikkanno'ne gede baatto baalate aana nooha gidu laalchonna guma afidhino laalo uyitanno haqqe baala oommo'ne;

³⁰hattono baattote aana heedhanno saada duuchantera, iima buubbanno cea duuchantera, baattote aana milli yaannohura lubbo afi'rino kalaqami duuchunkura, sagale ikkitannonsa gede lattino hayissonna haqqe baala oommonsa» yii; yiino gedeno ikki.

³¹Maganu kalaqinoha baala lai; lowo geeshsha dancha ikkinota lai. Barru hashshi; hashshuno soodi; kuni leelki barraati.