Read Sidama_Qullaawa _Maxaafa KALAQAMA 14 Bible Online

KALAQAMA 14 - Sidama_Qullaawa _Maxaafa bible

KALAQAMA 14

¹Hatte yannara, Baabilooni moote Amiraafeeli, Elaasaari moote Ariyooki, Elaami moote Kedoorilaomeeri, Goyimi moote Tidaaliiti; kuri shoolunku moote,

²woloota onte moote qassara hadhu; gaande marriri ontunku mootoolla: Soddoomu moote Beeraai, Gomooru moote Birshai, Adaama moote Shiniaabi, Tseboyimi moote Shemebeerinna Zooaari yinanni gobba moote Beelaiiti.

³Kuri ontunku moote mitteenni Maxinete Baarira Sidiimi Lagichira olaho xaaddu.

⁴Kuri ontunku mootoolla 12 diro Kedoorilaomeeri gashshinoreeti; tonaa sayikki diro kayinni, isi aana gibbo kayissu.

⁵Tonaa shoolki diro Kedoorilaomeerinna isi ledo namoontino mootoolla olantonsa ledo dagge Refoota Ashitirooti Qarinayimi, Zuuzoota Haami, Eemoota Shaweqiriyatayimi Xawira qeeltu.

⁶Hoori mannano ilaalaame Seiiri Gobbara qeeltunsa; molo baatto mule noo dargi Elfaraani yinannihu geeshsha shorritunsa.

⁷Hakkiinni higge, Qaadesi yinanniwa daggu; hatte yannara hakko dargi su'ma Eyinimishipaaxi yinanni. Amaaleqootu gobba baala amaddu; Hazezooni-Tamaari heedhanno Amooraawootano qeeltu.

⁸Hakkunni gedensaanni Soddoomu, Gomooru, Adaama, Tseboyiminna Beelai mootoolla olantonsa Sidiimi Lagichira dirte olantu.

⁹Olantinohuno Elaami, Goyimi, Baabilooninna Elaasaari mootoolla ledooti; ontenti mootoolla shoolente mootoolla ledo olantinohu kunni garinniiti.

¹⁰Sidiimi Lagichira suwete balla wo'mitino; kunnira, Soddoomunna Gomooru mootoolla olu giddonni xooqqe fultara wo'naa'ltanni heedhe ballate giddo ubbu; gattinori sasu mootoolla kayinni ilaallate widira higge xooqqu.

¹¹Shoolenti mootoolla Soddoomahonna Gomooraho noore baala, sagale nafa gattukkinni gudhite adhite hadhu.

¹²Soddoomaho hee'rannoha Abiraami rodii beetto Looxi qafadde, jajjasi baalankano adhite hadhu.

¹³Ikkollana, mittu manchi xooqanni daye ikkinore baala Ibiraawichaho Abiraamira kulisi; hatte yannara, Abiraami Amooraawichu Memire odahe qullaawate mule hee'ranno. Memire, roduuwisi Eshikoolinna, Aneeri Abiraamira olu garooti.

¹⁴Abiraami rodiisi beetti qafadaminota macciishshe, minesi ilantinore ola egentinore 318 manna qodhisiise, shoolenta moote faana gane Daani geeshsha ha'ri.

¹⁵Hakkiicho manna gaamo gaamo asse beehe diinnasi ledo hashsha olame qeeli; Demaasiqora aliyyeenni noohu Hooba yinanniwi geeshsha shorrinsa.

¹⁶Adhaminore baalanka galagalche qoli; rodiisi beetto Looxino jajjisi ledo daware abbi; isi ledo haa're abbinonsari qafadaminohu wolu meentinna labballuno no.

¹⁷Abiraami Kedoorilaomeerinna ledonsa noo mootoolla qeele higanna, Soddoomu moote, Mootete Lagicha yinannihuwa Shaweehi Lagichira haa'rasira shiqi.

¹⁸Wo'munkura Aliidi Magani qeesichi Saaleemi moote Melketsedeqi Abiraamira sagalenna woyinete xajje abbisi.

¹⁹Abiraami maassi'rannisi, «Gordonna baatto kalaqinohu Wo'munkura Aliidi Magani maassi'rohe;

²⁰diinnakki qeelatto gede assinohehu Wo'munkura Aliidi Magani galatamo» yii. Abiraamino qafade abbino jajji baalunku giddonni tonnunni mitte anga Melketsedeqira uyisi.

²¹Soddoomu moote Abiraamira, «Qafadde adhootto jajja baala umikkira gatisidhe, manna'ya kayinni qolie» yiisi.

²²Abiraamino, «Gordonna baatto kalaqinohu Wo'munkura Aliidi Magani Kaaliiqi afanna,

²³‹Abiraami ani duroonsoommosi› yaattokki gede wolu gateenna mitto heqicha woy koattete usuraancho nafa ikkiro atere mittoreno diadheemmo.

²⁴Ane manni itinohanna ane ledo hadhinori garo'ya Aneeri, Eshikoolinna Memire adhitanno qeecha agurranna ani mittoreno diadheemmo» yiisi.