Read Sidama_Qullaawa _Maxaafa KALAQAMA 16 Bible Online

KALAQAMA 16 - Sidama_Qullaawa _Maxaafa bible

KALAQAMA 16

¹Abiraami galte Saarayi ooso di"iltinosi; isera Aggaara yinanniti Gibitsitte borojjicho noose.

²Saarayino Abiraamira, «Kuneeti ileemmakki gede Kaaliiqi hoolinoe; kunnira tenne borojjicho'ya adhi; miteekke ise widoonni ila afi'reemmaha ikkannona» yitusi. Abiraamino Saarayi yitinota macciishshe baxi.

³Abiraamino Kana"aani Gobbara 10 diro hee'rihu gedensaanni, Saarayi Gibitsitte borojjichose Aggaara haadhe ayiddaannisera Abiraamira galte assite uyitusi.

⁴Abiraamino Aggaara adhi; iseno godobbu; godobbuta affuhu gedensaanni naaxxite mootittese Saarayi mishshuse.

⁵Saarayino Abiraamira, «Tini beebba atera iillitohe; ise atera oommaheti aneeti; ise kayinni godobbanni heedhenni ane mishshinoena, aterenna anere Kaaliiqi yoo» yitusi.

⁶Abiraamino Saarayira, «Kuneeti borojjichokki angakki no; hasi'ritta gede assi» yiise. Hakkunni gedensaanni Saarayi shetisseennase Aggaara fulte ba'u.

⁷Kaaliiqi sokkaasinchino halallitte gobbara wayi buicho mule afise; buichono Suurira massitanno doogo aana no.

⁸Sokkaasinchuno, «Saarayi borojjicho Aggaara! Maminni dayitta? Mamira hadhanni nootta?» yee xa'mise. Iseno, «Ani mootitte'ya Saarayiwiinni fule ba"anni noomma» yitusi.

⁹Kaaliiqi sokkaasinchino, «Galagalte mootittekkiwa higi; marte ise anga hee'ri» yiise.

¹⁰Qoleno, «Sirchokki lowo geeshsha batiseemmo; batinyunni kainohunni ayino kiirannokkiha ikkanno.

¹¹Kuneeti, godowoottaha labbaa beettono ilatta; Kaaliiqi dadillunnita wi'lakki macciishshinohe daafira, su'masi Ismaeeli[19] yaatta.

¹²Isilla kayinni baandeelu harrichi gedeeha ikkanno; manna baala giwanno; mannuno iso dibaxanno; isino fiixasi giwe baxxe hee'ranno» yii.

¹³Aggaarano, «La"annoe Magano ille'yanni afe lubbotenni hee'rummanni?» yite, coyi'rinose Kaaliiqiha su'ma, «Eelirooi»[20] yitu.

¹⁴Kunnira hattenne wayi bale, «Bieeri Lahayi Rooi» yini. Iseno Qaadesinna Bareedi mereero noote.

¹⁵Aggaarano Abiraamira labbaa beetto iltusi; Abiraamino Aggaara iltinosi beettira su'ma Ismaeeli yee fushshi.

¹⁶Aggaara Abiraamira Ismaeeli iltu yannara Abiraami 86 diri manchooti.