Read Sidama_Qullaawa _Maxaafa KALAQAMA 17 Bible Online

KALAQAMA 17 - Sidama_Qullaawa _Maxaafa bible

KALAQAMA 17

¹Abiraamira 99 diro ikkisi yannara Kaaliiqi leellesi, «Ani Wo'mankare Dandeemmo Maganootina, ane ledo qaafi; wo'ma woyite dancha coye assi.

²Gondooro'yano atenna ane mereero woreemmo; lowo geeshsha batiseemmohe» yiisi.

³Abiraamino alba hige gombisame Maganoho kumbuuli. Maganuno,

⁴«Kuneeti ate ledo gondooro e"eemmo; lowo gosa anna asseemmohe.

⁵Lowo gosa anna asseemmohe daafira, techo ka'a su'mikki Abiraami yaa agurreenna Abirihaami[21] ikkanno.

⁶Lowo geeshsha batiseemmohe; lowo gosano asseemmohe; mootoollano atewiinni fultanno.

⁷«Atenna ane mereero, ate gedensaannino sirchikki ledo gondoori'ya soorramannokki gede asseemmo; ateranna ate gedensaanni sirchikkira Magano ikkeemmo.

⁸Wosinchimma hee'rattota Kana"aani Gobba baala, geedote ikkitanno gede ateranna ate gedensaanni sirchikkira eemmo; insarano Maganonsa ikkeemmo» yiisi.

⁹Maganu qole Abirihaamira, «Atinna ate gedensaanni daannohu sirchikki ate ledo eoommo gondooro hegere geeshsha agadhe.

¹⁰Anenna ate mereero, ate gedensaannino sirchikki mereero agadhitinanni gondoori kunninni aane nooho: Ki'ne ledo hee'rannohu labbaahu baalu barcimo.

¹¹Anenna ki'ne mereero noo gondoorira malaate ikkanno gede barcintinanni.

¹²Settu barri qaaqqi barcimona; mine ilaminohu woy gobbanni woxunni hirre abbinoonnihu labbaahu baalu barcimona.

¹³Minekki ilaminohu, woxunni hirroonnihuno gatikkinni barcimona. Kunni garinni bisi'nera hee'ranno malaati hegerera gondooro ikkanno.

¹⁴Barciminokkihu baalu, gondooro'ya diigino daafira, fiixisiwiinni badame ho'lo» yiisi.

¹⁵Maganuno Abirihaamira, «Galtekki su'ma Saarayi yitooti; techo ka'a su'mise Saara[22] ikkona.

¹⁶Maassi'reemmose; qoleno isewiinni labbaa beetto eemmohe; maassi'reemmose; gosate amano asseemmose; ilase giddonni mootoolla fultanno» yiisi.

¹⁷Abirihaamino alba hige gombisame kumbuuli; oso'le kae wodanisinni, «100 diro ikkino manchi halaalinta ooso ilannoni? 90 diro ikkinoseti Saarano iltannoni?» yii.

¹⁸Abirihaamino Maganoho, «Ismaeeli maassidhe ragi'rannoe gede assoottoero woyyate» yiisi.

¹⁹Maganuno, «Dee'ni! Addaho galtekki Saara labbaa beetto iltannohe; su'masino Yisihaaqi[23] yite woshshatto; isi gedensaanni sirchisira hegerera ikkanno gede gondooro'ya isi ledo e"eemmo.

²⁰Ismaeeli daafira yoottoreno macciishshoommo; isono maassi'reemmosi; lowo ila eemmosi; sirchosino lowo geeshsha batiseemmo; 12 roorrooti anna ikkanno; sirchosino jawa gosa asseemmo.

²¹Gondooro'ya kayinni daanno diro tenne yannara Saara iltannohehu Yisihaaqi ledo e"eemmo» yiisi.

²²Maganu Abirihaami ledo hasaawa gudihu gedensaanni agure ha'ri.

²³Abirihaamino beettosi Ismaeeli, minesi ilantino borojjenna, woxunni hidhinore baala, maatesi baala Maganu yiino gede hakko barra barcimshiishi.

²⁴Abirihaami barcimi yannara 99 diri manchooti.

²⁵Beettisi Ismaeelino barcimi yannara 13 diri beettooti.

²⁶Abirihaaminna beettisi Ismaeeli mitto barra barcintino.

²⁷Mine ilantinorinna gobbanni woxunni hirroonniri labballu baalu isi ledo barcintu.