Read Sidama_Qullaawa _Maxaafa KALAQAMA 18 Bible Online

KALAQAMA 18 - Sidama_Qullaawa _Maxaafa bible

KALAQAMA 18

¹Mitte soodo barru taalootira Abirihaami dukkanu waalchira ofolle hee'reenna, Kaaliiqi Memire haqqe qullaawate mule leellisi.

²Haxo gotti yee la"anno woyite, sasu manni uurre nooha afe, haa'ransara dukkanu waalchinni kae dodi; alba hige gombisame keere haa're,

³«Mooticha'ya ballo eeggatena, baxittoeha ikkiro, ane borojjichokki agurte sa"attoekki gede huucci'reemmohe.

⁴Lekka hayishshidhinanniha shiima waa abbina'ne geeshsha, kunni caalira fooliishshidhe.

⁵Qae'ya daggininka woyite, shiima sagale abbeenna'ne ittine, wolqa assidhine hakkunni gedensaanni hadhinannina» yiinsa. Insano, «Maahoyyena, hedootto gede assi» yitusi.

⁶Abirihaamino Saarawa dukkanu giddora rahe mare, «Rakke mitto saffe ikkitannota fila bullee haadhe liisse tima gani» yiise.

⁷Isino saadanniwa mare lowo geeshsha hardino siito haa're, soqqamaanchisira ee, rahe gorre qixxeessanno gede assi.

⁸Geintonna iibbado ado maalu ledo wosinaho haa're abbi; Abirihaami haqqichote woroonni albansaanni uurre soqqamanna ittu.

⁹Insano, «Galtekki Saara hiikkiicho no?» yite xa'mitusi. Isino, «Hakko dukkanu giddo no» yiinsa.

¹⁰Wosinisi giddonni mittu, «Daanno diro techonte gede atewa galagale higeemmo; galtekki Saara qaaqqo afidhanno» yii. Saarano dukkanu waalchira Abirihaamira badheenni heedhe konne coye macciishshitu.

¹¹Hatte yannara, Abirihaaminna Saara lowo geeshsha geedhe no; Saararano ilate diri sae noose.

¹²Kunnira, Saara wodanisenni, «Halaalinta geedhummahu gedensaanni labbaahu ledo xaadammara dandeemmani? Ayiddaanni'yano horonta geedhino» yite oso'litu.

¹³Kaaliiqino Abirihaamira, «Saara, ‹Halaalinta geedhummahu gedensaanni ileemmani?› yite mayira oso'litu?

¹⁴Halaalinta ani Kaaliiqi dandeemmokkiri nooni? Daanno diro techonte gede atewa higeemmo; Saarano qaaqqo afidhanno» yiisi.

¹⁵Saarano waajjitinohura, «Dioso'loomma» yite morontu. Isino, «Dee'ni, oso'loottalla» yiise.

¹⁶Mannuno hakkiichinni kae, Soddoomu widira alba wodhi; Abirihaamino geegiissinsa.

¹⁷Kaaliiqino, «Ani asseemmore Abirihaamira maaxeemmoni?

¹⁸Abirihaamino halaalinta jawanna wolqaataame gosa ikkanno; gobbate aana noo manni baalu isi widoonni hige maassamanno.

¹⁹Keeraanchimmanna sumbe assatenni Kaaliiqi doogo agadhitanno gede oososinna insa gedensaanni dagganno ilama baala rosiisara dooroommosi; hatto assituro, Abirihaamira coyi'roommo coye baalanka wonsheemmo» yii.

²⁰Kaaliiqino, «Soddoomunna Gomooru bunshenni kainohunni raaranno manni raare lowo geeshsha batidhino; cubbinsano quwa saino.

²¹Hanni anewa iillitino raare addahoronna dharahoro la"ammora dirreemmo» yii.

²²Lamunku manchi Soddooma higge hadhu; Kaaliiqi kayinni Abirihaami ledo uurre gati.

²³Abirihaamino isiwa shiqqi yee, «Halaalinta keeraancho cubbaataammu ledo hunattoni?

²⁴Katamu giddo 50 keeraano heedhuro halaalinta baalanka hunattoni? Katama 50 keeraano giddo noote daafira yite dimaaratto?

²⁵Keeraano cubbaataammu ledo shaatto yee dihedeemmo; keeraano cubbaataammu gede diassatto; hatto assittoro keeraano cubbaataammu ledo qorichishakkiiti; gobba baalate gashshaanchi ati hattoo coye assattoni?» yii.

²⁶Kaaliiqino, «Soddoomu Katami giddo 50 keeraano afi'rummoro insa daafira yee katama gatiseemmo» yii.

²⁷Abirihaamino daware, «Ani bukonna buluulo ikkoommohu ate Mootichi'ya ledo hasaawa wonaa hanafoommona hanqitootie.

²⁸Ontawu keeraano giddonni 5 xeiro, katama baala 5 xeino daafira hunattoni?» yii. Kaaliiqino, «45 afi'rummoro dihuneemmo» yii.

²⁹Abirihaamino, «Miteekke hakkiicho 40 callu heedhurona?» yee xa'mi. Isino, «40 daafira yee gatiseemmo» yii.

³⁰«Mooticha'ya xaano coyi'reemmona hanqitooti; miteekke hakkiicho 30 heedhurona?» yii. Isino, «Hakkiicho 30 afi'rummoro, insa daafira yee katama gatiseemmo» yii.

³¹Abirihaamino qole, «Kuneeti ate Mootichi'ya ledo coyi'ra wonaa hanafoommona hanqitootie; miteekke hakkiicho 20 heedhurona?» yii. Isino, «Hakkiicho 20 heedhuro insa daafira yee katama dihuneemmo» yii.

³²Abirihaamino, «Tenne mitte hige calla coyi'reemmona Mooticha'ya hanqitootie; miteekke hakkiicho 10 heedhurona?» yii. Isino, «10 heedhuro, insa daafira yee katama dihuneemmo» yii.

³³Kaaliiqino Abirihaami ledo hasaawa gudihu gedensaanni ha'ri. Abirihaamino minisira higi.