Read Sidama_Qullaawa _Maxaafa KALAQAMA 2 Bible Online

KALAQAMA 2 - Sidama_Qullaawa _Maxaafa bible

KALAQAMA 2

¹Maganu gordonna baatto, giddose noore baala kunni garinni kalaqe gudino.

²Leelki barra loososi baalanka gude, lamalki barra fooliishshi'rino.

³Maganu kalaqate loososi baala gude fooliishshi'rino barra ikkino daafira, lamalki barra maassi're baxxinoha assino.

⁴Gordunna baatto kalaqantinohu kunni garinniiti. Kaaliiqi Maganu gordonna baatto kalaqi waro ikkino coyi kunninni aane nooho:

⁵Xeena ganinokki daafira, baattote aana mitturichi nafa dimu'rino. Baatto loosanno mannino nookkihura, baattote aana mittu haqqino difulino; mu'rinorino dino.

⁶Ikkollana, baattote giddonni fulanno wayi uulla qufisanni no.

⁷Kaaliiqi Maganu baattote aaninni bushsha haa're, manna bushshunni seekki; sanosirano lubbo aanno foole ufuufi; mannuno lubbo noosi kalaqama ikki.

⁸Kaaliiqi Maganu soojjaati ragaanni Edeni Genneti yinanni darga qixxeessi; kalaqino mannano hakkiicho hee'ranno gede wori.

⁹Kaaliiqi Maganu illete biiffinota sagalimmate dancha ikkitinota addi addi haqqe mu'risi. Gennetete mereerono heeshsho uyitanno haqqicho no; danchanna busha badde leellishshannoti wole haqqichono no.

¹⁰Genneti hayikkisanno wayi Edeninni fulanno; kuni wayi Edeninni fule shoolewa beehamanno.

¹¹Umi wayi su'ma Fishooni yinanni; kuni wayi culku noowa Hawiila yinanni baatto baala gaangeesse lolahanno.

¹²Hatte gobba culki xumaho; qoleno, hatte gobbara muxxe ikkitino shittonna muxxe ikkitinoti dilqa kinna no.

¹³Layinki wayi su'ma Giyooni yinanni; kuni wayi Itiyophiyu[1] gaangaawira lolahanno.

¹⁴Sayikki wayi su'ma Xegiroosi yinanni; kuni wayi Asoorira soojjaatoonni lolahanno. Shoolki wayi su'ma Efiraaxisi yinanni.

¹⁵Kaaliiqi Maganu manna, loosannonna agaranno gede, Edeni Gennetete masse wori.

¹⁶Kaaliiqi Maganu mannaho, «Edeni Gennetete noo haqqe baalate laalo ita dandaatto.

¹⁷Bushanna dancha bade afate egenno uyitanno haqqicho laalo kayinni ittooti; tenne haqqicho laalo itootto barra, halaalinta reyatto» yee kulisi.

¹⁸Kaaliiqi Maganu, «Mannu callisi hee'ra dancha di"ikkitino; kunnira, labbannosita kaa'laancho kalanqosi» yii.

¹⁹Kaaliiqi Maganu baattote bushshunni saada baalanna cea baala kalaqi. Su'ma fushshanno gedeno haa're Addaamiwa[2] abbi. Addaamino lubbo afi'rino kalaqami baalunkura su'ma fushshi; hatte su'muwano woshshinanninsata ikkitu.

²⁰Kunni garinni Addaami ceatenna saada baalantera su'ma fushshinsa. Addaamira kayinni labbannositanna kaa'litannosita dianfoonnisi.

²¹Kunnira, Kaaliiqi Maganu Addaami lowo goxano amaddannosi gede assi. Goxe hee'reenna midaadisinni mitto miqicho haa're, hakko darga maala wonshi.

²²Kaaliiqi Maganu Addaami midaadinni haa'rino miqicho meyata asse seekki; iseno haa're Addaamiwa abbi.

²³Addaamino, «Xa kune ani ane labbannota afi'roommo; kuni miqichi miqicho'yaati; maaluno maala'yaati; labbaahuwiinni anfoonnita ikkitino daafira meyate[3] yinose» yii.

²⁴Kunnira, mannu annasinna amasi agure, galtesi ledo mitto ikkanno; lamunku mitto biso ikkitanno.

²⁵Addaaminna galtesi mullootu no; ikkollana mimmitonsa disaalfattino.