Read Sidama_Qullaawa _Maxaafa KALAQAMA 20 Bible Online

KALAQAMA 20 - Sidama_Qullaawa _Maxaafa bible

KALAQAMA 20

¹Abirihaamino hakkiinni kae Negebi yinanni gobba widira hige ha're, Qaadesinna Shuuri mereero hee'ri. Geraaraho wosinchimma hee'ri yannara,

²Abirihaami galtesi Saara rodoo'yaati yii; hakkunnira Geraaru moote Abemeleeki manna soye Saara abbinannisi gede assi.

³Ikkollana kayinni mitto hashsha Maganu haaqeetenni Abemeleekira leelle, «Tini mancho ayiddaanna afidhinota ikkitinohura ise adhakkira ateri geeshshaho» yiisi.

⁴Abemeleeki kayinni ise kisinokkihura, «Mooticha'ya ani mitte sao nafa diassoommo; anenna manna'ya beebbatenni gudattonke?

⁵Rodoo'yaati yiinohu umosi Abirihaamiiti; iseno iso rodoo'yaati yite kultinoe; ani konne assoommohu taalu wodaninniiti ikkinnina mitte bunsheno dihedoommo» yiisi.

⁶Maganuno haaqeetenni, «Konne coye taalu wodaninni assoottota ani afoommo; ise kisse cubbu giddora eattokki gede hooloommohehu kunniraati.

⁷Xa kayinni manchu galte qolte aguri; isi himanaancho ikkino daafira reyattokki gede aterano huuccannohe. Qola giwittoro kayinni reyattota afi; ate calla ikkittokkinni mannikki baalu ledo gooffinanni» yii.

⁸Abemeleekino soodo gute kae, ledosi gashshaasine baala woshshe, konne coye kulinsa; insano lowo geeshsha waajjitu.

⁹Abemeleekino Abirihaami woshshe, «Hiissittonke? Maaho ma"asseennaheeti, anenna gashshooti'ya aana tenne beebba assittohu? Ane aana mannu assannokkire assootto.

¹⁰Togo assittohu maricho heddeeti?» yee xa'mi.

¹¹Abirihaamino, «Togo assoommohu, ‹Konniicho Magano waajjanno manni dihee'ranno› yee hedoommohura, galte'ya adhitara yite shitannoe yee waajjeeti.

¹²Qolteno ise anni'ya ilinota ikkitino daafira rodoo'yaati; ikkollana ama'ya beetto ikkitinokki daafira adhoommo.

¹³Maganu anni'ya mininni fule manni gobba ha'reemmo gede hajajie yannara, mareemmowa baala ‹ «Ani rodoosiiti» yiittaro baxattaeta hattennenni afeemmo› yoommose» yee dawari.

¹⁴Hakkunni gedensaanni Abemeleeki Abirihaamira Saara qole aguri; qoleno ge'reewonna lalo, labballonna meya borojje uyisi.

¹⁵Abirihaamino, «Gobba'yara hasi'rittowa hee'ra dandaatto» yiisi.

¹⁶Saararano, «Ati mittono saalsiisanno coye assoottakkita keeraancho ikkakki ledokki noo manni baalu afanno gede malaate ikkara rodiikkira Abirihaamira 1,000 kinchu birra oommosi» yii.

¹⁷Kaaliiqi Abirihaami galte Saara daafira yee, Abemeleeki mine noo meento baala ilannokki gede hoolinohura, Abirihaami Abemeleekiranna minisi mannira Magano huucci. Maganuno Abemeleeki, galtesinna irkote meentosi ilanno gede asseennansa ooso afi'ri.