Read Sidama_Qullaawa _Maxaafa KALAQAMA 21 Bible Online

KALAQAMA 21 - Sidama_Qullaawa _Maxaafa bible

KALAQAMA 21

¹Kaaliiqi coyi'rinonte gede Saara towate yiino coye wonshise.

²Saarano godobbu; Maganu yiino yanna iillituta Abirihaamira geedhimmasi giddo labbaa beetto iltusi.

³Abirihaami, Saara iltinohura qaaqqisira su'ma Yisihaaqi yee fushshi.

⁴Maganu hajajinosi gede Abirihaami qaaqqosi Yisihaaqi settikki barra barcimshiishi.

⁵Abirihaami beettisi Yisihaaqi ilami yannara 100 diri geerchooti.

⁶Saarano, «Maganu oso'leemma gede assinoena, konne coye macciishshannohu baalu ane ledo oso'lanno» yitu.

⁷Qolteno, « ‹Saara Abirihaamira ooso ilte qansidhanno› yee hedinohu nooni? Xa kayinni kune geedhimmasi yannara labbaa beetto iloommasi» yitu.

⁸Qaaqquno lophe unuuna qana aguri; qaaqqoho unuuna hoollisi barra Abirihaami lowo jila jili.

⁹Mitto barra Saara Gibitsitte Aggaara Abirihaamira iltinosihu Ismaeeli, qaaqqise Yisihaaqi ledo godo'lanna affu.

¹⁰Mitteenni godo'litanni noore affe Abirihaamira, «Tenne borojjicho beettise ledo kawiinni hoolie; tenne borojjichote beetti qaaqqi'ya Yisihaaqi ledo ragi'ra dihasiissannosi» yitusi.

¹¹Ismaeelino beettosi ikkino daafira kuni coyi Abirihaami lowo geeshsha qarrisisi.

¹²Maganu kayinni Abirihaamira, «Qaaqqunna borojjichokki Aggaara daafira qarrantooti; sirchikki sirannohu Yisihaaqi widoonni ikkino daafira Saara yitannohere baala assi.

¹³Borojjichokki beettino ateha ikkino daafira lowo gosa ikkanno gede sirchosi batiseemmo» yiisi.

¹⁴Layinki soodo Abirihaami gute kae, shiima sagalenna waa maaqqete wonshe Aggaarara bayisiise qaaqqise ledo mininni fushshe ha'risise; iseno hakkiinni fulte Bersaabehi yinannitera molo baattora raataabbanni heedhu.

¹⁵Maaqqete noo wayi goofita, qaaqqo shiimu citi giddo worte agurtu.

¹⁶Iseno, «Qaaqqi'ya reyanna illetenni dilaeemma» yite hakkiichinni 100 qaafo geeshsha xeertidhe ofoltu; hakkiicho heedhe wi'litu.

¹⁷Maganuno qaaqqu raare macciishshi; Maganu sokkaasinchi gordoho hee're, «Aggaara! Mayi qarrisinohe? Maganu qaaqqu raare macciishshinona waajjitooti.

¹⁸Kai, qaaqqo haadhe hanqaffe dogisiisi; isono lowo gosa asseemmosi» yiise.

¹⁹Maganuno illese faneenna, wayi buicho affu; marte maaqqete waa wonshite abbite qaaqqoho hayikkissu.

²⁰Qaaqqu lophi geeshsha Maganu ledosi no; Ismaeeli halallitte gobbara Faaraani hee'rino; digaanunni ugaaxate egennaminoha ikkino. Amasino Gibitsete ilama ikkitino beetto haadhusi.

²²Hatte yannara Abemeleeki olantosi hajajaanchi Fiikooli ledo mare Abirihaamira, «Assatto coyi baalunkura Maganu ate ledo no.

²³Xa anera, ooso'yaranna ooso'ya oosora busha coye assattokki gede Maganu su'minni xaarie; qolteno, atera dancha assummohe gede, atino aneranna hee'ratto baattora dancha coye assattoe gede Maganu su'minni xaarie» yiisi.

²⁴Abirihaamino, «Maahoyye, yootto gede asseemmo» yiisi.

²⁵Abirihaami, Abemeleeki soqqamaasine wolqatenni adhitinositera wayi bale daafira Abemeleekira qaxxadhi.

²⁶Abemeleekino, «Konne assinohu ayitiro diafoommo; atino dikuloottoe; konne coye techo macciishsha'yaati» yiisi.

²⁷Hakkunni gedensaanni Abirihaami ge'reewonna lalo abbe Abemeleekira uyisi; hakko barra lamunku mimmitu ledo sheemaate e'u.

²⁸Abirihaami 7 ge'reewo hoshshatewiinni badi.

²⁹Abemeleekino, «Konne lamalanka ge'reewo mayira badde uurrisitto?» yee xa'misi.

³⁰Abirihaamino, «Konne lamalanka ge'reewo adhi; konne ge'reewo adhittoro tenne bale u'moommohu ane ikkoommota afatto» yii.

³¹Lamunku xaarte sheemaate e'inowa ikkino daafira hakkonne darga Bersaabehi[27] yini.

³²Konne sheemaate Bersaabehi assidhuhu gedensaanni Abemeleekinna olantosi hajajaanchi Fiikooli Filisxeemete gobba higgu.

³³Hakkunni gedensaanni Abirihaami Bersaabehira Tamaarisiki[28] kaase Hegere Magano Kaaliiqa magansi'ri.

³⁴Abirihaami Filisxeemete gobbara wosinchimmatenni seeda yanna hee'ri.