Read Sidama_Qullaawa _Maxaafa KALAQAMA 22 Bible Online

KALAQAMA 22 - Sidama_Qullaawa _Maxaafa bible

KALAQAMA 22

¹Hakkunni gedensaanni, Maganu Abirihaami jife laisi. Qoleno, «Abirihaami!» yee woshshisi; isino, «Mooticha'ya macciishsheemmona coyi'ri» yee dawari.

²«Baxattoha mitto beettokki Yisihaaqi haadhe Mooriyu Gobba ha'ri; hakkiicho ani kuleemmohe ilaali aana gorrite shilqote kakkalo assite shiqishie» yiisi.

³Abirihaami soodo gute kae kakkalote ikkitanno haqqe boce, harrichoho hogowi; lame soqqamaanosinna beettosi Yisihaaqi anga adhe Maganu kulinosiwa ha'ri.

⁴Sayikki barra Abirihaami alba qole lae, hakkonne darga fafe nooha afi.

⁵Isino soqqamaanosi, «Ki'ne harrichu ledo konne agarre; aninna beetti'ya ka'a marre Magano magansi'nummohu gedensaanni hingeemmona» yiinsa.

⁶Abirihaamino kakkalote giirranni haqqe beettisi Yisihaaqira duhisiisi; isi billawanna giira baccichoho haa'reenna lamunku mitteenni hadhu.

⁷Yisihaaqi annasi Abirihaami, «Annaanna!» yee woshshi. «Annisino maaho beetto'ya?» yiisi. Yisihaaqino, «Kune giiranna haqqe noonke; kakkalote ikkanno ge'rechi hiikko nooyya?» yee xa'mi.

⁸Abirihaamino, «Beetto'ya! Shilqote kakkalora ikkanno ge'recho Maganu qixxeessanno» yiisi. Lamunku mitteenni doogonsa hadhu.

⁹Maganu kulinosi darga iillituta, Abirihaami hakkiicho kakkalote darga seekki; haqqeno duuni; beettosi Yisihaaqi usure kakkalote darga haqqete aana haawiisse kari.

¹⁰Abirihaamino beettosi gorrara billawa haa'ri.

¹¹Billawa haa're hee'reenna, Kaaliiqi sokkaasinchi gordoho hee're, «Abirihaami! Abirihaami!» yee woshshisi. Isino, «Mooticha'ya macciishsheemmona coyi'ri» yii.

¹²Isino, «Beettokki kissooti; aanasi mittoreno assitooti; mitticho beettokki dimararootto; Magano ayirrasattohanna isira hajajamattoha ikkoottotano xa afoommo» yiisi.

¹³Abirihaamino caaqqi yee la"anno woyite, mitto ge'rechu goco dubbu giddo buuddasi dubbi-xuxe xaaxxe amadde nooha afi; Abirihaamino mare goco haa'ri; beettisi darga shilqote kakkalo asse shiqishi.

¹⁴Abirihaami hakko dargira, Yaahiwe Yirie[29] yee su'ma fushshi. Techo geeshsha mannu, «Kaaliiqi ilaalu aana qixxeessanno» yaanno.

¹⁵Kaaliiqi sokkaasinchi gordoho hee're Abirihaami layinkimeeshsho woshshe,

¹⁶«Kaaliiqi: Lowo geeshsha maassi'reemmohe gede su'mi'yanni xaareemmo. Konne assoottohuranna mitto beettokki anera ho'loottoekkihura, anino sirchokki gordu beeddahe gedenna baaru shaafi gede asse batiseemmo; sirchikki diinnansa qeele katammansa amadanno.

¹⁸Anera hajajamoottohura baattote aana noo manni baalunku sirchikkinni maassamanno» yiisi.

¹⁹Hakkunni gedensaanni Abirihaami soqqamaasinesiwa higeenna mitteenni galagalte Bersaabehi hadhu. Abirihaamino Bersaabehi hee'ri.

²⁰Kuni baalu ikkihu gedensaanni, Abirihaami Milka rodiisi Naakoorira ooso iltinosita macciishshi. Iltinosi oosono:

²¹Umihu Uutsi, Buuzi, Araami anni Qemueeli;

²²Keseedi, Haazo, Fildaashi, Yidilaafiitinna Beetueeliiti.

²³Beetueeli Ribiqa ili; Milka kuri settenta ooso Abirihaami rodiira Naakoorira iltino.

²⁴Reuma yinanniti Naakooriti irkote galte Xeebaahi, Gehaami, Tehaashanna Maaka yinanni ooso iltusi.