Read Sidama_Qullaawa _Maxaafa KALAQAMA 23 Bible Online

KALAQAMA 23 - Sidama_Qullaawa _Maxaafa bible

KALAQAMA 23

¹Saara 127 diro heedhuhu gedensaanni,

²Kana"aani baattora, Qiriyaati Arbai yinannihura Kebirooni Katamira reyitu; Abirihaamino Saarara wi'le lowo geeshsha manchiti.

³Abirihaamino reeshshu mulinni kae, Heeti oosora,

⁴«Ani ki'nera wosinchoho; qoleno manni gobba manchooti; galte'ya madaadheemmo gede, waammate darga hirre"e» yiinsa.

⁵Heeti oosono, Abirihaamira,

⁶«Mooticha hanni macciishshinke; ati ninke mereero ayirrado manchooti; ninkewa galtekki madaadhattoha waammate darga doodhite adhi; galtekki madaadhatto darga atera hoolannohehu dino» yite dawartusi.

⁷Abirihaamino kae, gobbate manna Heeti ooso umo heeshshi yee galaxxe,

⁸«Galte'ya konne madaadhate fajjitiniero Tsohaari beetti Efirooni,

⁹gobba dannira nooha Makiphela yinanni goda hirannoe gede xa'me"e; kuni dargi waammate darga ikkannoe gede ki'ne affinanna baatto fushshitannore baate adheemmo gede asse"e» yii.

¹⁰Hatte yannara Efirooni katamu waalchi mule songote darga wolootu Hitooti ledo ofolle no; isino hakkiicho noo manni baalunku macciishshanna Abirihaamira,

¹¹«Dee'nina, hanni mooticha macciishshi! Baattonna aanase noo goda oommohe; galtekki madaadhatto gede fiixi'ya Hitootu affanna oommohe» yee dawarisi.

¹²Abirihaami kayinni Hitootu affanna xaano umo heeshshi yee galaxxe,

¹³baalunku macciishshitanna Efiroonira, «Eeggatena macciishshie; darga raawe hidheemmona, kuneeti womaashsha adhi; galte'yano hakkiicho masse madaadheemmona» yiisi.

¹⁴Efiroonino Abirihaamira,

¹⁵«Mooticha ballo atino macciishshie! Baatto 400 kinchu birralla fushshitanno; kuni assannori dinona, agurte galtekki massite madaadhi» yee dawarisi.

¹⁶Abirihaamino Efirooni yiinota macciishshe, mannu afanna kulino garinni Abirihaami 400 kinchu birra keene uyisi.

¹⁷Kunni garinni Memire baattora soojjaatoonni Makiphelaho Efirooni gobba Abirihaamira utuwasi ikkitu; baattonna hakko noo godi, baattosi gaangaawira noo haqqe baalanti,

¹⁸Abirihaamita ikkitinota hakkiicho noo Hitooti baalu affu.

¹⁹Hakkunni gedensaanni, Abirihaami galtesi Saara Kana"aani Gobbara Kebirooni (Memire) Katamira soojjaatoonni Makiphela noo godira madaadhi.

²⁰Kunnira, tini Hitootu baatto giddo noo godi ledo Abirihaamira waammate darga ikkitu.