Read Sidama_Qullaawa _Maxaafa KALAQAMA 27 Bible Online

KALAQAMA 27 - Sidama_Qullaawa _Maxaafa bible

KALAQAMA 27

¹Yisihaaqi geedheenna ille afa gibbe heedheennasi, bayira beettosi Eesawu, «Beetto'ya!» yee woshshi; isino, «Yee» yii.

²Yisihaaqino, «Kune ani geedhoommo; reemmo barrano diafoommo.

³Kunnira, ugaaxattore worbichonna digaana adhite, dubbo hadhe ugaaxxe maala abbie.

⁴Reyummokkinni godowi'ya maassi'rannohe gede, coommitino sagale ani baxeemmo gede assite qixxeessite iteemmona abbie» yii.

⁵Ribiqano Yisihaaqi beettisira Eesawura yaannore macciishshitanni no. Kunnira, Eesawu ugaaxara ha'rita,

⁶Ribiqa beettisera Yaiqoobira, «Annikki Eesawura yiinore macciishshoomma.

⁷‹Ugaaxxe maala abbie; reyummokkinni ite Kaaliiqi albaanni maassi'reemmohena baxeemmo gede assite coommitanno sagale qixxeessie› yee coyi'ranna macciishshoomma.

⁸Xa maahoyyena beetto'ya, yeemmahere assi;

⁹annikki reyikkinni ite maassi'rannohe gede coommitanno sagale baxanno gede asse woreenna haadhe massattona marte saadate giddonni 2 meu goodanna haadhe abbi» yitusi.

¹¹Yaiqoobi kayinni amasi Ribiqara, «Rodii'ya Eesawu biso baancaamoho; ane bisira kayinni mittu dananchino dino;

¹²miteekke anni'ya biso'ya amammade dogoommota afiro maassi'ra agure rumannoewe!» yiise.

¹³Amasino, «Beetto'ya! Rumo anera higgoena, yoommata calla macciishshite, hadhe goodanna abbie» yitusi.

¹⁴Isino mare abbe amasira uyi; amasino coommitino sagale annisi baxanno gede assite qixxeessitu.

¹⁵Ribiqano isewa mine noota bayiru beettiseta Eesawuta holgi uddano abbite, maa'nu beettisera Yaiqoobira uddisiissusi.

¹⁶Goodannu goga angasiranna shaqqadu goowisira xaaxxu.

¹⁷Wortinota coommitino sagale maalu ledo beettise Yaiqoobira uyitu.

¹⁸Yaiqoobino haa're annisiwa mare, «Annaanna!» yee woshshi. Annisino, «Yee beetto'ya; ati hiikkonne beetto'yaati?» yee xa'misi.

¹⁹Yaiqoobino annisira, «Ani bayira beettokki Eesawuuti; hajajoottoe gede assoommona, godowikki maassi'rannoe gede gotti yite ofolte, ugaaxe abboommo maala iti» yiisi.

²⁰Yisihaaqino beettosi, «Beetto'ya! Hiitto rakke afi'ritto?» yee xa'mi. Yaiqoobino, «Kaaliiqi Maganikki qineesseennaeeti» yii.

²¹Yisihaaqino Yaiqoobira, «Beetto'ya hanni ati beetto'ya Eesawu ikkakkinna hoogakki amammade laeemmona anewa shiqqi yii» yiisi.

²²Yaiqoobino annisi Yisihaaqiwa shiqqi yii; isino amammade lae, «Qoonqokki Yaiqoobi qoonqooti; anguwa kayinni Eesawu anguwa labbanno» yii.

²³Yaiqoobi ikkinotano diafino; anguwasi rodiisi Eesawu anguwa gede baancaame ikkitino daafira maassi'rasira kai.

²⁴Qoleno, «Halaalinta ati beetto'ya Eesawuunti?» yii. Yaiqoobino, «Ee aneeti» yee dawari.

²⁵Yisihaaqino, «Beetto'ya godowi'ya maassi'rannohe gede ugaaxxe abbootto maala iteemmona shiqqi assi» yiisi. Isino shiqqi asseennasi iti; woyinete xajjeno abbeennasi agi.

²⁶Hakkunni gedensaanni annisi Yisihaaqi, «Beetto'ya! Shiqqi yite sunqie» yiisi.

²⁷Yaiqoobino shiqqi yee sunqisi. Yisihaaqi Yaiqoobi uddano su'niissi're lae, «Beetti'ya fooli, Kaaliiqi maassi'rino gati fooli gedeeho.

²⁸Kaaliiqi gordunni qufisanno loja oohe; baattokkino shaqqishohe; gidekkinna haaro woyinete xajjekki batisohe.

²⁹Atera daga kumbuultohe; gosa soqqantohe; roduuwikki baalunkura roorricha ikki; amakki oosono kumbuultohe; runtannoheri rumantinore ikkito; maassidhannoheri maassantinore ikkito» yii.

³⁰Yisihaaqi maassi're kaisihu gedensaanni Yaiqoobi fule ha'ri; isi fulanni hee'reennanni, Eesawu ugaaxetewiinni dayi.

³¹Eesawuno coommitino sagale qixxeesse, annisira haa're abbi; annasino, «Anna'ya ka'e, godowikki maassi'rannoe gede ani beettikki ugaaxe abboommohe maala iti» yiisi.

³²Yisihaaqino, «Ati ayeti» yee xa'mi. Isino, «Ani bayira beettokki Eesawuuti» yee dawari.

³³Yisihaaqino lowo geeshsha mase huxi'ranni, «Ikkina, wona ayi ugaaxe abbinohalla itummo? Ati daattora mule heedheenna sagale ite maassi're kaoommo; maassono hakkunnita ikkite ka'ino» yiisi.

³⁴Eesawu annisi yiinota macciishshihu gedensaanni, lowo geeshsha raare wi'lanni, «Anna'ya ballo, aneno maassi'rissie» yii.

³⁵Yisihaaqino, «Rodiikki daye ane doge ate maasso adhino» yii.

³⁶Eesawuno, «Isi ane xagaranna tini layinkite; Yaiqoobi yinoonnisihu anfeeti; kunni albaanni bayirroonye'yano adhino; xaano qole maasso'ya adhino. Afummona, anera gatisoottoti mitte maassono dinoni?» yii.

³⁷Yisihaaqi qole Eesawura, «Balaxe iso ate mooticha asse kaoommo; ayiddisi baalunku isira soqqamanno gede assoommo; gidunna woyine batidhannosi gede yoommo; beetto'ya hanni atera ma"assohe?» yii.

³⁸Eesawuno annisira, «Anna'ya ballo! Maassokki mitte callateni? Anna'ya ballo! Aneno maassi'rie» yee qoonqosi naggi asse wi'li.

³⁹Annisi Yisihaaqino daware, «Kuneeti shaqqado baattowiinni faffe hee'ratto; gordu qufichono diafi'ratto.

⁴⁰Bagadaancho ikkatto; rodiikkirano borojjicho ikkatto; giwittoro kayinni gadadishshisiwiinni fulatto» yiisi.

⁴¹Annisi maassi'rinosi daafira Eesawu Yaiqoobi murci're giwi; wodanisinnino, «Anni'ya muli barra reyanno; hakkunni gedensaanni rodoo'ya Yaiqoobi sheemmo» yee hedi.

⁴²Ribiqa kayinni bayiru beettise Eesawu hedinore affe, maa'ne beettose Yaiqoobi woshshiishshe, «Rodiikki shaahera hedinona,

⁴³xa beetto'ya yeemmahe gede ikki; rakke Kaaraani hee'rannohuwa rodii'ya Laabawa ha'ri;

⁴⁴rodiikki hanqi qiida geeshsha, shiima yanna isiwa hee'ri.

⁴⁵Rodiikki hanqi higeenna, assoottosire hawanno yannara hakkiinni soye abbisiiseemmahe; lamenka mayira mitto barra hoogeemma'ne» yitu.

⁴⁶Ribiqa Yisihaaqira, «Kunni Hitootu seenni ikkitonni heeshsho cee'mishshinoe; Yaiqoobi tenne gobba seenne adhannoha ikkiro lubbotenni ma"assi'rammara hee'reemma» yitu.