Read Sidama_Qullaawa _Maxaafa KALAQAMA 28 Bible Online

KALAQAMA 28 - Sidama_Qullaawa _Maxaafa bible

KALAQAMA 28

¹Yisihaaqi Yaiqoobi woshshe maassi'rihu gedensaanni, «Kana"aanete seenne adhitooti;

²ka'e amakki anni Beetueeli minira Mesiphexoomiya ha'ri; hakkiinnino amakki rodiita Laaba beetto adhi.

³Wo'manka Dandaanno Magani maassi'rohe; lowo oosono oohe; lowo daga annano assohe.

⁴Abirihaami maassi'rinte gede atenna sirchokki maassi'rohe; tenne Abirihaamira uyinotanna atino wosinchimma dagge hee'rootto gobba iqqa asse oohe» yiisi.

⁵Kunni garinni Yisihaaqi Yaiqoobi ha'ranno gede assi; Yaiqoobino Mesiphexoomiyaho hee'rannohuwa Laabawa ha'ri; Laaba Yaiqoobinna Eesawu ama Ribiqara rodooho; annisi Beetueeli Sooriyichaho.

⁶Yisihaaqi Yaiqoobi maassi'rinosita, seenne adhara Mesiphexoomiya soyinosita, maassi'risi woyiteno, «Kana"aani seenne adhitooti» yiinositanna Yaiqoobino annisinna amasi yitinota macciishshe Mesiphexoomiya ha'rinota buuxi.

⁸Kunni garinni Eesawu, annisi Yisihaaqi Kana"aanootu seenne baxannokkita afi.

⁹Kunnira mine noosi seenni aana lede Abirihaami beetti Ismaeeliwa mare beettosi Mahileeti adhi; ise Nebayooti rodooti.

¹⁰Yaiqoobi Bersaabehinni Kaaraani ha'rara kai.

¹¹Arrishsho e'uta mitto darga mare fooliishshi'ri; hakkiicho mitto kincho barki're goxi.

¹²Haaqeete baattotenni kae gordo iillino taqa afi; taqu aanaanni higge Maganu sokkaasine gidditanninna dirritanni no.

¹³Kaaliiqino aleenni hige uurre, «Ani, annikki Abirihaaminna Yisihaaqi Magani Kaaliiqaati; ateranna sirchikkira ikkitanno gede tenne goxxe nootto baatto eemmohe.

¹⁴Sirchokkino baattote shaafi gede asse batiseemmo; soojjaatinna galchimi, aliyyenna wodiidi geeshsha hala'latto; daga baalano atenninna sirchikkinni maassantanno.

¹⁵Kune ani ledokki noommo; ha'ratto doogo baalate agareemmohe; galagalche tenne gobba higatto gedeno asseemmohe. Kuloommohere baala wonshammohe geeshsha diagureemmohe» yiisi.

¹⁶Yaiqoobino goxanotenni kae, «Anilla diafoommona, halaalinta konne darga Kaaliiqi no» yii.

¹⁷Waajjino daafira, «Kuni dargi hiitto waajjishanno! Kuni dargi Maganu mineeti ikkinnina wole di''ikkino; gordo e'nanni waalchi konneeti» yii.

¹⁸Yaiqoobi gute kae barki're noo kincho haa're sooddicha asse uurrisi; Maganoho baxxinoha assate aanaho zayite duni.

¹⁹Hakko dargira su'ma Beeteli yee fushshi; alba kayinni hakko katami su'mi Loozaati.

²⁰Yaiqoobi, «Ati ane ledo hee'rittoro, tenne ha'reemmo doogora agarittoero, iteemmo sagalenna uddi'reemmo uddano uyittoero,

²¹anni'ya minirano keerunni qolittoero, ati Kaaliiqi Magano'ya ikkatto.

²²Sooddicha asse uurrisoommohu kuni kinchino ate magansi'nanni darga ikkanno; oottoeri baalunku giddonnino tonnunni mitte anga eemmohe» yee Kaaliiqira xano xa'ni.