Read Sidama_Qullaawa _Maxaafa KALAQAMA 3 Bible Online

KALAQAMA 3 - Sidama_Qullaawa _Maxaafa bible

KALAQAMA 3

¹Hamashshu Maganu kalaqino moyichi baalunkunni roore xagaraamoho; hamashshu manchote, «Halaalintanni Maganu Edeni Gennetete noo haqqe baalante laalo ittinannikki gede hoolino'neni?» yee xa'mise.

²Manchono hamashshoho, «Edeni Gennetete noo haqqe laalo ita dandiineemmo;

³ikkollana Maganu, ‹Edeni Gennetete giddo noo haqqicho laalo ittinoonte; kissinoonte; gibbine kissiniro kayinni reyitinanni› yiinonke» yite dawartusi.

⁴Hamashshu qole manchote, «Reyo nafa direyitinanni;

⁵Maganu hatto yiinohu, hattenne haqqicho laalo ittinanni barra ille'ne fa'nitannotanna isi gede danchanna busha baddine affinannire ikkitinannita afinohuraati» yiise.

⁶Manchono haqqichote laalo itate halchishshannota, illete biiffinotanna egenno uyitannota ikkitinota affe haadhe ittu; ayiddaanniserano uyitusi; isino iti.

⁷Hakkawoyintenni lamunku elle fa'niteenna mullootu noota huwattu; kunnira, balasete haqqicho daro xaadisse gobbe qodhite teedansa diphitu.

⁸Hatte hawarro Kaaliiqi Maganu Edeni Gennetete giddo ha'ramanna hirbasi macciishshite, Addaaminna galtesi Kaaliiqi Maganu albinni wirri yite Gannatete haqqe mereero maaxantu.

⁹Ikkollana, Kaaliiqi Maganu Addaami woshshe, «Hiikko nootto?» yee xa'misi.

¹⁰Addaami, «Edeni Gennetete giddo ate hirba macciishshoommo; mullichu noommo daafira, waajje maaxamoommo» yii.

¹¹Kaaliiqi, «Mullichu noottota ayi kulihe? Itattokki gede hajajummoheta haqqichote laalo itittoni?» yiisi.

¹²Addaami, «Tini ledo'ya heedhara oottoe mancho, haqqichote aaninni laalo haadhe uyiteennae itoommo» yii.

¹³Kaaliiqi Maganu mancho, «Konne mayira assitta?» yee xa'mise. Iseno, «Hamashshu so'risiiseennae itoomma» yitu.

¹⁴Kaaliiqi Maganu hamashsho, «Konne assootto coyira saadatenna dubbu moyichi baalunkuwiinni baxxite rumamoottoha ikki; godowikkinni goshooshantanni ha'ratto; hee'ratto diri baalunkunni bushsha itatto;

¹⁵atenna manchote mereero, sirchikkinna sirchise mereero diinoomu hee'ranno gede asseemmo; isi umokki cancananno; atino gindesi qasatto» yii.

¹⁶Manchono, «Godowatta yannara, qarrakki lowo geeshsha batiseemmo; qarrunni ilatta; kuni ikke hee'reennanni, ayiddaannakki yora diaguratta; isino gashshannoheha ikkanno» yiise.

¹⁷Addaamirano, «Galtekki qaale macciishshite, ‹Ittooti› yoommohe haqqicho laalo itoottohura, atenni kainohunni baatto rumantinota ikkito; heeshshokki diri baalunkunni daafurte loosse itatto.

¹⁸Baatto utanna kokko'le fushshitannohe; atino baatto fushshitanno laalo itatto.

¹⁹Dayotto baatto higatto geeshsha sagale hunkiikkinni itatto; ati bushshahona, galagalte bushsha higatto» yiisi.

²⁰Addaami galtesira, Heewani[4] yee su'ma fushshise; togo yiinohu lubbo afi'rinohura baalaho ama ikkitinohuraati.

²¹Kaaliiqi Maganu Addaamiranna Heewanira gogu uddano seekke uddisiisinsa.

²²Kaaliiqi Maganu, «Kuneeti mannu bushanna dancha bade afate ninke giddonni mittu gedeeha ikkino; xaano heeshshote haqqicho laalo adhe ite, hegerera heeshshonniha ikke hee'ra dihasiissannosi» yii.

²³Kunnira, Kaaliiqi Maganu manna Edeni Gennetete darginni fushshi; kalaqamino baatto loose shaqqishanno gede assisi.

²⁴Manna shorrihu gedensaanni, Edeni Gennetete soojjaati ragaanni kirubeeli yinanni sokkaasinenna raga baala falaqqi yitanni giirate gede wala yitanno bise heeshshote haqqichowa massitanno doogo agartanno gede wori.