Read Sidama_Qullaawa _Maxaafa KALAQAMA 31 Bible Online

KALAQAMA 31 - Sidama_Qullaawa _Maxaafa bible

KALAQAMA 31

¹Laabati labballi ooso, «Yaiqoobi anninke jiro gudhe dureessa ikkino» yite hasaabbanna Yaiqoobi macciishshi.

²Laaba alba la"anno woyiteno, bashsho geeshsha ikkinosikkita afi.

³Kaaliiqino Yaiqoobira, «Ledokki hee'reemmona, galagalte annikki gobba fiixikkiwa higi» yiisi.

⁴Kunnira Yaiqoobi Raaheelinna Liya saada allaa'le noowa daanno gede woshshiishe,

⁵«Anni'ne bashsho geeshsha ikkinoekkita afoommo; ikkirono anni'ya Magani ane ledo no.

⁶Ani nooe wolqa duuchantenni anni'nera soqqamoommota affinoonni.

⁷Anni'ne kayinni daafuri'ya waaga 10 hige soorranni doginoe; Maganu kayinni gawajjaera wore diagurino.

⁸Daafurikki waagi burroota ikko yiieta, saada burroota qaltinoe; qoleno daafurikki waagi muraamurroota ikko yiieta, saada muraamurroota qaltinoe.

⁹Maganuno anni'ne saada haa're anera uyinoe.

¹⁰«Saada gocca uurritanno yannara, badhe sa'annoti meu gocca muraamurroota burrootanna eleellaamma ikkitinota haaqeete afoommo.

¹¹Maganu sokkaasinchi haaqeete, ‹Yaiqoobi!› yee woshshinoe. Anino, ‹Yee› yoommo.

¹²‹Me"eho badhe sa'anno gocca burroota, muraamurrootanna eleellaamma ikkitinota lai. Laaba ate aana assino sao afoommo daafira konne coye assoommohu aneeti.

¹³Qaaggote kincho kaasse, zayite dunte xa'nitto darga Beeteli leellummohe Magani aneeti; xa ka'e tenne gobbanni fulte, ilamootto gobba higi› yiinoe» yiinsa.

¹⁴Raaheelinna Liya qole, «Anninke mininni adhineemmori gantori nooni?

¹⁵Isi ninke wole gobba manni gede asse kiirinonke. Ninkeno hire itino.

¹⁶Kunnira, Maganu anninkewiinni haa're uyinoheti tini jiro baalanti ninketenna oosonkete; atino Maganu yiinohere baala assi» yiisi.

¹⁷Yaiqoobino ha'rara kae, oososinna meentosi gaalla gulufisiisi.

¹⁸Saada baalantanna, Mesiphexoomiyaho hee're afi'rinore baala adhe annisi Yisihaaqi gobba Kana"aani ha'ri.

¹⁹Laaba ge'reewu orda haxi'rara ha're hee'reenna Raaheeli angatenni bonce seekkinoonnita annise maganna moorte adhitu.

²⁰Yaiqoobino, ha'rannota kula hoogasinni Sooriyicha Laaba doginosi.

²¹Yaiqoobi noosire baalanka adhe ha'ri; Efiraaxisi Waa fule, alba gaaraame Geleaadi gobba widira hige ha'ri.

²²Yaiqoobi ha'rinota Laabara sayikki barra kulloonnisi.

²³Ayiddisi ledo 7 barri doogo geeshsha hordofe, gaaraame Geleaadi gobbara mare iilli.

²⁴Maganu hashsha haaqeete Sooriyichu Laabawa daye, «Yaiqoobira busha coye coyi'rattosikki gede qorophi» yiisi.

²⁵Yaiqoobi gaaraame Geleaadi gobbara dukka'ne hee'reenna Laaba mare iilli; iillihu gedensaanni isino ayiddisi ledo hakkiicho dukka'ni.

²⁶Hakkunni gedensaanni Laaba Yaiqoobira, «Togo mayira assittoe? Aneno mayira dogittoe? Seenne'yano qafandoonni manni gede assite mayira muddite haadhe ha'ritto?

²⁷Kulittoekkinni maaxante ha'ratenni mayira dogittoe? Kuloottoeha ikkoommero, hagiirrunninna faarsotenni, dibbetenninna baganunni geegiissineemmohe.

²⁸Seenne'yanna seenni'ya ooso sunqe keerunni yeemmota mayira hoolittoe? Tinino hambekkiiti.

²⁹Gawajjammo'nera dandeemmo; kayinnilla, ankarro anni'ne Magani, ‹Yaiqoobira busha coye coyi'rattokki gede qorophi› yee kulinoe.

³⁰Annikki mini quqquxihero ha'rattota afoommo; maganna'ya kayinni mayira mooritto?» yee xa'misi.

³¹Yaiqoobino daware, «Togo assoommohu seennekki anga'yanni wolqatenni adhattoeha laweennae waajjeeti.

³²Magannakki adhinohu giddonke hee'riro kayinni reyo; aterichi anewa hee'riro fiixinke albaanni hasidhe adhi» yiisi. Yaiqoobi konne coy'rinohu Raaheeli moortinota afinokkihuraati.

³³Laaba Yaiqoobinna Liya dukkani, qoleno lamente irkote meentisi dukkani giddorano e"e hasi; kayinnilla mittoreno diafino. Liya dukkaninni fule, Raaheeli dukkana ei.

³⁴Raaheeli magannasi haadhe gaalu koorira woroonni maaxxe, iimaho ofoltu. Laabano dukkanu giddo baalankawa hasi; kayinnilla mittoreno diafi'rino.

³⁵Iseno annase, «Ka"a hoogoommahu godowu dayinoe daafiraatina, mooticha'ya hanqitootie» yitusi. Isino hasi'rinota ikkinnina magannasi diafi'rino.

³⁶Yaiqoobino hanqe Laaba borooranni, «Ani ma"assummohe? Kageeshshi geeshsha shorrattoere assoommoni?

³⁷Xa uduunne'ya duuchanka findigge hasi'rootto; ateha mitto uduunnichono diafootto. Hanni konne coye yoonkena fiixinkewa massino.

³⁸Lemoo diro wo'ma ate ledo hee'roommo; ge'reewikkinna meikki fushshe dihunino; saadakki giddonni mitto wilii'lichono di"itoommo.

³⁹Moyichu itinoha nafa riqiwoommohe ikkinnina cage haa're diabboommohe; hashshano barrano mooraminoha baala baatisiisoottoe.

⁴⁰Barri fooggalinna hashshi qiidi qarrisinoe; gaari'yano gamba diyiino.

⁴¹Minekki 20 diro hee'roommo; 14 diro lamente seennikki daafira yee, 6 diro saadakki daafira yee daafuroommo; hakkiinnino sa'e daafuri'ya waaga 10 higge soorrootto.

⁴²Anni'ya Yisihaaqi magansi'rannohu Abirihaami Magani ledo'ya hoogoommero, mulla anganni ha'risse hoogoottoe; Maganu ankarro rufinohehu qarra'yanna daafuro'ya laeeti» yiisi.

⁴³Laaba Yaiqoobira, «Kuni seennino seenne'yaati; qaaqquullinsano qaaqquulle'yaati; saadano saada'yaati; kuni la"attohu baalunku aneho; kayinnilla konne seenne'yanna insa ilino ooso asse hooleemmo gari dino.

⁴⁴Atenna ane mereero malaate ikkanno gede xa amo sheemaate assi'nona» yiisi.

⁴⁵Yaiqoobino kincho haa're sooddicha asse uurrisi.

⁴⁶Qoleno fiixasi, «Kinna gamba asse» yii; insano kinna gamba assite duuntu; tenne duuno mule ofolte sagaleno ittu.

⁴⁷Laaba kinnate duuno, «Yigarsahaduuta»[49] yii. Yaiqoobi kayinni, «Galiidi»[50] yii.

⁴⁸Laaba, «Tini duuno techo atenna ane mereero malaateho» yii. Kunnira, hakkonne darga, Galiidi yitu.

⁴⁹Laaba, «Badammeemmo yannara Kaaliiqi anenna ate mereero hee're agaronke» yiino daafira hakkonne darga, «Mitsipha»[51] yini.

⁵⁰Qoleno Laaba, «Seenne'ya gawajjittonsaro woy insa aana wole seenne adhittoro, ani nafa afa hoogummoro anenna ate mereero Maganu noota habbooti.

⁵¹Anenna ate mereero kuneeti tini duunonna kuni sooddichi,

⁵²ani atewa hige bunshete saeemmokki gede, atino bunshete anewa higge sa"attokki gede malaateho.

⁵³Tenne xaaro diingummoro, Abirihaaminna Naakoori Magani yoonke» yii. Yaiqoobino annisi Yisihaaqi magansi'ranno Magani su'minni xaari.

⁵⁴Ilaalu aanano kakkalo kakkale, fiixasi kakkalote sagale itanno gede woshshi. Insano dagge sagale itte ka'e, hakko ilaalaho galtu.

⁵⁵Laabano soodo gute kae, seennesinna seennisi ooso sunqe maassi'rinsahu gedensaanni galagale qaesi ha'ri.