Read Sidama_Qullaawa _Maxaafa KALAQAMA 32 Bible Online

KALAQAMA 32 - Sidama_Qullaawa _Maxaafa bible

KALAQAMA 32

¹Yaiqoobi ha'ranni hee'reenna doogote Maganu sokkaasine isinni xaaddu.

²Isino insa afiti, «Kuni Maganu qachaati» yee, hakkonne darga Mahinayimi[52] yii.

³Hakkunni gedensaanni Yaiqoobi Edoomi gobbara Seiiri yinanni baattora hee'rannohuwa rodiisi Eesawuwa alba qole manna soyi.

⁴Soqqino mannirano, «Mootichi'ya Eesawura: Soqqamaanchikki Yaiqoobi, ‹Ani xaa geeshsha Laabawa keeshshoommo;

⁵lalo, harre, hooffille saada, meyanna labbaa borojjeno afi'roommo; xa kune haa'rattoe gede, ate mootichi'yawa manna soqqoommo› yiino yitine kullesi» yiinsa.

⁶Sonkoonni mannino Yaiqoobiwa galagale hige, «Rodiikki Eesawuwa marroommo; isino atenni xaadara daanni no; ledosi 400 manni no» yite kultusi.

⁷Yaiqoobino lowo geeshsha waajje, ledosi noo manna, ge'reewo, me"e, lalonna gaala baalanka lamewa beehi.

⁸Togo assinohuno, «Eesawu daye mitto widoonni noore gawajjiha ikkiro wole widoonni noohu gatanno» yee hedeeti.

⁹Qoleno, «Annuwa'ya Abirihaaminna Yisihaaqi Magano! Huuccatto'ya macciishshie. ‹Danchumma asseemmohena ilamootto gobba ayiddikkiwa higi› yoottoe Kaaliiqa!

¹⁰Ani borojjichikki kageeshshi geeshsha maaronna shaqqille leellishattoera hasiisannoeha di"ikkoommo; Yordaanoosi Waa fulummo waro, siqqicho'ya calla anga adhe noommo. Xa kayinni 2 tayishsha ikkoommo.

¹¹Daye anenna meento'ya oosonke ledo gudannonke yee waajjoommona, rodii'ya Eesawu anganni gatisie.

¹²Atino ‹Halaalinta danchare asseemmohe; sirchokkino batinyunni kainohunni kiirrannikkiha baaru shaafi geeshshiha asseemmo› yoottota qaagi» yee huucci'ri.

¹³Hakko hashshano hakkiicho gali. Noosihu duuchunku giddonni rodiisi Eesawura afansha fushshi.

¹⁴Afanshaho fushshino saadano: 200 me"enna 20 meu gocca, 200 ge'reewonna 20 ge'reewu gocca,

¹⁵30 qalaante gaala qalimminsa ledo, 40 lalo 10 woraamma, 20 xala harreetinna 10 wodalaati.

¹⁶Saadano gaamo gaamotenni bade soqqamaasinesi anga wore, «Albaanni sa'ine gaamo gaamotewiinni fafissine ganne» yii.

¹⁷Albaanni nooha, «Rodii'ya Eesawunni xaadatto yannara, ‹Ati ayeho? Hiikkiira hadhanni nootto? Tini gantanni nootto saadano ayete?› yee xa'mihero,

¹⁸‹Tini saada soqqamaanchikki Yaiqoobite; isi tenne saada mootichi'ya Eesawura afansha asse soyino; isino kune badhenkeenni daanni no› yii» yee hajajisi.

¹⁹Layinkiha, sayikkihanna saadate hoode noore baalanka, «Eesawunni xaaddinanni woyite hattonni yitine kullesi;

²⁰wolentenni, ‹Kuneeti soqqamaanchikki Yaiqoobi badhenkeenni daanni no› yaa habbinoonte» yii. Togo yiinohuno, «Alba assine massinanni afanshinni araarameemmo; hakkunni gedensaanni isinni xaadeemmo woyite albasi la"a dandeemmo» yee hedinohuraati.

²¹Kunni garinni afanshasi balaxe soyihu gedensaanni, isi hakko noowa gali.

²²Hakkonne hashshanni Yaiqoobi kae, lamenta meentosi, lamenta irkote meentosi, tonaa mitenta oososi adhe Yaabooqi waa widoonni fuli.

²³Insa haa're fushshihu gedensaanni, jajjasi baalankano ledo soyi.

²⁴Yaiqoobi kayinni waa gama kawaanni callisi gati. Mittu manchino sooda geeshsha ledosi sharramanni gali.

²⁵Hakku manchi Yaiqoobi sharrame qeela hoogita afe, giwooda ganisi; Yaiqoobi sharramanni hee'reenna luqqeetto darginni ka'usi.

²⁶Hakkunni gedensaanni manchu, «Soodaraatina agurie» yiisi. Yaiqoobino, «Maassi'rittoekkinni diagureemmohe» yiisi.

²⁷Manchuno, «Su'mikki ayeti?» yee xa'misi. Isino, «Su'mi'ya Yaiqoobiiti» yee kulisi.

²⁸Manchu qole, «Kunni ka'a su'makki Yaiqoobi diyinanni; Maganunna manchu ledo sharrante qeelootto daafira, su'makki ‹Israeeli›[53] yinanni» yiisi.

²⁹Yaiqoobino, «Ate su'mi ayeti?» yee xa'mi. Manchuno, «Su'ma'ya mayira hasi'rootto?» yee kae, Yaiqoobi maassi'risi.

³⁰Yaiqoobi, «Magano ille'yanni lae, xaa geeshsha lubbotenni noommo» yee, hakkonne darga su'ma, «Phiinieeli»[54] yii.

³¹Phiinieeli sa"anni hee'reennanni arrishsho fultu; isino giwoodu xissinosi daafira dinanni no.

³²Yaiqoobira luqqeetto darginni ka'ino daafira, Israeele techo geeshsha luqqeettote maala di"ittanno.