Read Sidama_Qullaawa _Maxaafa KALAQAMA 37 Bible Online

KALAQAMA 37 - Sidama_Qullaawa _Maxaafa bible

KALAQAMA 37

¹Yaiqoobino annisi wosinchimma hee'rino gobbara Kana"aani hee'ri.

²Yaiqoobi ilamano aante noote: Yooseefi 17 diri beetto ikke noo yannara, annisi meenti Bilihanna Zilfa iltinori roduuwisi ledo ge'reewonna me"e allaalanni hee're roduuwisi assitanno bunshe abbe annisira kulanno.

³Geedhimmasinni ilinoha ikkino daafira, Yaiqoobi Yooseefi wole ooso baalantenni roorse baxannosi. Kunni daafira addi addi dani kuulinni seeda seesallitte shamise gansiisisi.

⁴Roduuwisi anninsa insanni roorse baxannosita affe gibbusi; garunnino dicoyidhannosi.

⁵Mitto hashsha Yooseefi haaqee haaqii'ri; haaqee kulinsata roduuwisi albinni roore gibbusi.

⁶Isino, «Haaqii'roommo haaqee kuleemmo'nena macciishshe:

⁷Ninke gate qamade minde nadala nadala assine usurranni hee'neenna, ane nadala hossi yite uurritu; ki'neri kayinni aneta ayirrise doyisse uurre umo heeshshi yee kumbuulino» yiinsa.

⁸Roduuwisino, «Ninkera roorricha ikkite aananke moohattora hedootto?» yitusi. Haaqeesinninna coyisinni kainohunni ledde gibbusi.

⁹Qoleno wole haaqee haaqii're roduuwisira, «Kuneeti wole haaqeeno haaqii'roommo; arrishsho, aganunna 11 beeddahe umonsa heeshshi assite ayirrissannae afoommo» yee kulinsa.

¹⁰Roduuwisira kulino haaqee annisirano kulisi. Annisino, «Tini haaqii'rootto haaqee mayinnite? Halaalinta aninna amakki roduuwikkino umonke heeshshi assine ate ayirrinsammohera hedootto?» yee rufisi.

¹¹Roduuwisi hinaassusi. Annisi kayinni konne coye wodanisinni agaranni no.

¹²Mitto barra roduuwisi anninsa ge'reewonna me"e allaaltara Sekeemi hadhu.

¹³Israeeli Yooseefira, «Roduuwikki Sekeemi ge'reewonna me"e allaaltanni no; insawa soyemmohena amo ha'ri» yiisi. Yooseefino, «Maahoyye ha'reemmo» yii.

¹⁴Annuno, «Hadhe roduuwikkinna saada keere noo gedeenni la'e, duduwonsano haadhe abbie» yiisi. Yooseefino Kebirooni Lagichinni fushshe soyi. Yooseefino mare Sekeemi iilli.

¹⁵Yooseefi halalli baattora raataawanni hee're mittu manchinni xaadi; manchuno, «Maricho hasi'ratto?» yee xa'misi.

¹⁶Isino, «Roduuwa'ya hasi'ranni noommo; ge'reewonna me"e hiikkiicho allaa'lite nooro ballo eeggatena kulie» yiisi.

¹⁷Manchuno, «Insa kawiinni hadhino; ‹Dootaani ha'no› yitanna macciishshoommo» yiisi. Yooseefino roduuwasi faana gananni mare Dootaani afinsa.

¹⁸Insano fafowa hee'reenna affe, insawa iillikkinni shitasira ma'litu.

¹⁹Mimmitinsara, «Hakku haaqii'raanchu kune dayino;

²⁰xa amme shine mitte balera tunge, ‹Moyichu itino› yineemmona; haaqeesino marte fultannowa anfeemmona» yitu.

²¹Roobeeli konne coye macciishshe angansanni gatisasira hasi're, «Lubbo shinoonke;

²²mundee duntinoonte; shitinantenni konne halalla balete giddo tuggine agurre» yiinsa. Hatto yiinohuno angansanni gatise annisiwa qole soyara hedeeti.

²³Yooseefi roduuwisiwa iillita, uddi'rinota addi addi dani kuulinni gannoonnita seeda seesallitte shamise aanisinni mulqitu;

²⁴isono massite wayi nookkitera moola balera tuggusi.

²⁵Hakkunni gedensaanni sagale ittara ofoltu; ittanni heedhe xeertote Ismaeelete daddalaasine Gibitse hadhara Geleaadinni dagganna affu; insano gaallansara shitto, hixaananna kaarbe hogophite no.

²⁶Yihudi roduuwisira, «Rodoonke shine maanxummoro maricho lexxineemmo?

²⁷Maalankeetina shaa agurre amme Ismaeelootaho hirrona» yiinsa. Roduuwisino isi yiino coye baxxu.

²⁸ Yooseefino baletenni fushshite hakkaanni higge sa'anni noorira Midiyaamete daddalaasinera 20 kinchu birrira hirtusi; Ismaeelootuno Yooseefi Gibitse haadhe hadhusi.

²⁹Roobeeli mare la"anno woyite, Yooseefi balete giddo dino; kunnira dadille uddanosi dari.

³⁰Galagale roduuwisiwa daye, «Beettu hakko dinona, hanni ani hiikkummoro woyyanno?» yii.

³¹Yooseefi shamise haadhe, meichu goco gorrite mundeete giddo cuu'u.

³²Addi addi dani kuulinni seesiinse gannoonnita seeda shamisesi haadhe anninsawa massite, «Tenne shamise ba'inota anfoommona, hanni beettikkiteronna woletero lai» yitusi.

³³Isino buuxe laihu gedensaanni, «Tini beetti'ya shamiseeti! Hunsha bayisibao beetto'ya moyichu itisi? Halaaleho beetto'ya moyichu bibbide itino!» yii.

³⁴Yaiqoobino dadillunni uddanosi dare, xiddu uddano uddi're beettisira lowo barra wi'li.

³⁵Oososinna seennisi baalunku sheshifachishshasira daggu. Isi kayinni «Manchite hee'renni beetti'yawa jeennaate dirreemmo» yee sheshifata giwi. Kunnira manchitanni hee'ri.

³⁶Hakkuri Midiyaamete daddalaasine kayinni Yooseefi massite Gibitsete Feriooni agaraasine roorrichira Phoxifaarira hirtusi.