Read Sidama_Qullaawa _Maxaafa KALAQAMA 4 Bible Online

KALAQAMA 4 - Sidama_Qullaawa _Maxaafa bible

KALAQAMA 4

¹Hakkunni gedensaanni, Addaami galtesi ledo goxi; iseno godobbe, labbaa beetto iltu. «Kaaliiqi kaa'lonni labbaa beetto afi'rumma» yite, «Qaayeeli»[5] yite su'ma fushshitusi.

²Aanchite rodoosi Abeeli iltu. Abeeli ge'reewo allaalannoho; Qaayeeli baatto loosi'rannoho.

³Mitto barra Qaayeeli loosi'rinohunni baattote laalchinni Kaaliiqira kakkalo shiqishi.

⁴Abeeli qole ge'reewu giddonni umihanna coominoha kakkalo asse shiqishi; Kaaliiqi Abeelinna kakkalosi widira lae, shiqishi'rinore adhi.

⁵Qaayeeliwanna kakkalosi widira kayinni dilaino; kunnira, Qaayeeli lowo geeshsha giirami; albisino kolishshi'ri.

⁶Hatte yannara Kaaliiqi Qaayeelira, «Mayira giiramitto? Albikkino mayira kolishshi'ri?

⁷Dancha assoottoha ikkoommero albikki xawanno; dancha assa hoogittoro kayinni cubbu waalchikkira rie agarannohe; hasattosino ate amadateeti; ati kayinni qeelattora hasiisannohe» yiisi.

⁸Qaayeeli rodoosi Abeeli, «Amo xawo ha'nona» yiisi; xawo hadheenna Qaayeeli rodoosi Abeeli gawajje shiisi.

⁹Kaaliiqi Qaayeeli, «Rodiikki Abeeli mama no?» yee xa'misi. Qaayeeli, «Mama nooro diafoommo; ani rodii'yara agaraanchohoni?» yee dawari.

¹⁰Kaaliiqi Qaayeelira, «Togo mayira assitto? Macciishshi; du'nantinoti rodiikki mundee rabbate baattotenni anewa higge raartanni no.

¹¹Kunnira, du'nantinota rodiikki mundee aggara afoose fantino baatto aana ati rumamoottoha ikki.

¹²Baatto loosi'ratto yannara mitto laalchono diuyitannohe; baattote aana tultaawanna raataawattoha ikkatto» yiisi.

¹³Qaayeeli Kaaliiqira, «Cubbi'ya qorichi duqqammora dandeemmokkihonna lowoho;

¹⁴kuneeti techo baattote aaninni shorroottoe; albikkinni ho'leemmo; baattote aana tultaawanna raataawoommoha ikkeemmo; afiehu baalu shaannoe» yiisi.

¹⁵Kaaliiqi isira, «Dee'ni dihattooti! Kunni ka'a ate shaannohura baalaho lamala ero rabba iillitannosi» yiisi. Kaaliiqi Qaayeeli afihu baalu shaannosikki gede malaate worisi.

¹⁶Qaayeeli Kaaliiqi albinni kae ha'ri; Edenira soojjaatoonni Noodi[6] yinanni gobbara hee'ri.

¹⁷Qaayeeli galtesi ledo goxi; iseno godobbe Heenooki iltu. Isino katama mini; katamaho beettisi su'minni «Heenooki» yee su'ma fushshi.

¹⁸Heenooki Iiraadi ili; Iiraadi Mehuyaeeli ili; Mehuyaeeli Matusaeeli ili; Matusaeeli Laamehi ili;

¹⁹Laamehi lame meento adhi; umiti Aadaati; layinkiti Tsiila yinannite;

²⁰Aada Yaabaali iltu; Yaabaali saada allaa'litanni dukkanaho heedhannori annaati.

²¹Isi rodii Yuubaali suusulle ufuuffannorinna bagana gantannori annaati.

²²Tsiila, «Tubalqayini» yinanniha labbaa beetto iltu; isi camotenninna siwiilunni addi addi uduunne seekkannoho. Tubalqayinira Naima yinanni rodoo noosi.

²³Laamehi lamunku meentisira, «Aadanna Tsiila! Hanni macciishshe"e; mittu manchi madiisseennae, shiimu beetti ganeennae shoommo;

²⁴Qaayeeli shaannohura lamala ero rabba iillitannosi yiniro, ane Laamehi shaannohura kayinni lamalayina lamala ero rabba iillitannosi» yiinsa.

²⁵Addaami galagale galtesi ledo goxi; labbaa beettono iltusi; iseno, «Qaayeeli shiinohu Abeeli darga Maganu labbaa beetto uyinoe» yite su'masi, «Seeti»[7] yitu.

²⁶Seetino labbaa beetto ile, su'ma Heenoosi yee fushshi; mannu Kaaliiqa magansi'ranna qullaawa su'masi woshsha hanafinohu hatte yannaraati.