Read Sidama_Qullaawa _Maxaafa KALAQAMA 42 Bible Online

KALAQAMA 42 - Sidama_Qullaawa _Maxaafa bible

KALAQAMA 42

¹Yaiqoobi Gibitsete gidu noota macciishshe oososi, «Mayira mimmito'ne calla la'inanni?

²Gibitsete gidu noota macciishshoommona, hude shitannonkekki gede hakkiinni gide hirtine abbenke» yiinsa.

³Kunnira tonnu Yooseefi roduuwi gide hidhitara Gibitse hadhu.

⁴Yaiqoobi, «Miteekke mite gawajjo iillitannosi» yee waajjinohura, Yooseefi amaha Biiniyaami kayinni roduuwisi ledo disoyino.

⁵Kana"aani gobbara hude batidhino daafira, Yaiqoobi oosono wolu manni gede gide hidhitara Gibitse hadhu.

⁶Hatte yannara Yooseefi gobba gashshe no; gobba baalatenni daanno mannira gide hirannohuno isooti. Yooseefi roduuwino hakkiira iillite uminsanni baatto kissanni iso keere haadhusi.

⁷Yooseefino roduuwasi lae ewelummansa bade afi; ikkollana, alba ho'le kaajjadu qaalinni coyi'ranninsa, «Ki'ne hiikkiinni dagginoonnireeti?» yee xa'minsa. Insano, «Kana"aani gobbanni gide hidhinammora dangoommoreeti» yitu.

⁸Yooseefi roduuwasi ikkitinota afirono, insa kayinni rodoonsa ikkinota badde diaffino.

⁹Yooseefi insa afita insa daafira haaqii'rino haaqee qulli yiteennasi, «Ki'ne dooyyaanote; gobbankera mayi fooqinoro la'ine hadhinara dagginoonnireeti» yiinsa.

¹⁰Insa kayinni, «Mootichanke, ninke hattoore di"ikkinoommo; ninke soqqamaanokki gide hidhinammoralla dangoommo.

¹¹Ninke baalunku mittu manchi oosooti; huluullammannire diafi'noommo; dooyyineemmoreno di"ikkinoommo» yitusi.

¹²Isi qole, «Dee'ni! Gobbankera mayi fooqinoro la'inaralla dagginoonni» yiinsa.

¹³Insano, «Ninke soqqamaanokki tonaa lamu roduuwi Kana"aani gobbara mittu manchi oosooti; maa'ninke anninke ledo no; mittu kayinni baino» yitu.

¹⁴Yooseefino, «Yuummo'nente gede ki'ne dooyyaanote.

¹⁵Halaalaasine ikkitinoonnita afeemmo gede, hadhine maa'ne rodoo'ne haadhine abbe; hakkunni ka'a kayinni Feriooni halaali afanna kawiinni milli diyitinanni.

¹⁶Coyidhinoonniri halaalehoro anfannina, ki'ne giddonni mitto sokkine rodoo'ne abbisiisse; gattinoonniri kayinni usurantine agarre. Hakkunni ka'a kayinni Feriooni halaali afanna ki'ne dooyyaanote» yiinsa.

¹⁷Insano sase barra usuru mine keeshshiishi.

¹⁸Sayikki barra Yooseefi, «Ani Magano waajjeemmohona, gattinanni gede ani yeemmo'neta asse.

¹⁹Coyi'ne addahoro ki'ne giddonni mittu rodii'ne konniicho usurame agarona, gattinoonniri hadhine gide hudi'rinohura mini'ne mannira massidhe.

²⁰Coyi'ne ammanameenna reyotenni gattinanni gede, maa'ne rodoo'ne haadhine amme» yiinsa. Insano yiinota sumuu yitu.

²¹Qolteno mimmitinsara, «Ninkera eegamanna lubbosi qarrantanna la'nanni hee'nenni macciishsha gimbe, halaalintanni rodiinke aana sao assinoommo; kuni qarri amadinonkehu iseraati» yitu.

²²Roobeeli qole, «Beettu aana sao assitinoonte diyoommo'ne? Ani yoommota ki'ne kayinni dimacciishshitinoonni. Kuneeti xa mundeesi hassanni noonke» yiinsa.

²³Wolu tiranna hasaawisinonsa daafira, Yooseefi qaalensa egenninoha dilawinonsa.

²⁴Isino albinsanni shawwu yee wi'li. Galfatihu gedensaanni galagale hige coyishshiishinsa. Simiooni ku'uriwiinni bade insa la'anna usuri.

²⁵Yooseefi ogorransara gide wonshine, mittu mittunku birra uminsa ogorira qolle worranni gedenna doogote ikkanno sinqe uyinanninsa gede hajaji. Insano yiino gede assineennansa,

²⁶gide harrensara hogophite hadhu.

²⁷Insa giddonni mittu galtinowa harrichoho itannore aara ogorosi fananno woyite afooho noo birra afi.

²⁸Roduuwisira, «Birri'ya galagale higino; isino kune ogori'yara no» yiinsa. Wodaninsa maseenna, huxidhanni insa insanaawa, «Maganu togo mayira assinke?» yitu.

²⁹Anninsa Yaiqoobiwa Kana"aani gobba iillite, iillinonsa coye baalanka kultusi.

³⁰«Gobba gashshino manchi kaajjado coye coyi're, gobba dooyyinammora marroommore asse kiirinonke.

³¹Ninkeno, ‹Ninke huluullammannire diafi'noommo; dooyyaanono di"ikkinoommo.

³²Ninke anninke ooso tonaa lame roduuwaati; mittu albaanni baino; maa'nu Kana"aani gobbara xa anninke ledo no› yinoommo.

³³Manchuno, ‹Coyi'ne addahoro afeemmona, mitto rodoo'ne anewa agurtine, hudi'rinohura mini'ne mannira gide haadhine hadhe.

³⁴Dagginanni woyite maa'ne rodoo'neno haadhine amme; halaalaasine ikka'ne hakkawoyite afeemmo; konne nooha rodoo'neno qoleemmo'ne; ki'neno gobbankera dadda'litinanni hee'ra dandiitinanni› yiinonke» yite kultusi.

³⁵Hakkunni gedensaanni ogorransa fantanno woyite, mittu mittunku ogori giddo birrinsa gurdame nooha affu; insano anninsano gurdame noo birra la'e waajjitu.

³⁶Anninsa Yaiqoobino, «Ilaweelo assitine gatissinie; Yooseefi dino; Simioonino dino; Biiniyaamino anewiinni haadhine hadhinaraati; kuni manchiti baalu anella amadanno» yiinsa.

³⁷Roobeeli annisira, «Biiniyaami qole atewa abba hoogummoro, lamenta labballi ooso'ya shii; galagalche haa're abbeemmona, Biiniyaami aneralla uyi» yii.

³⁸Yaiqoobino, «Beetti'ya ate ledo diha'ranno; amasi beetti rodiisi reenna isi callu gatino; doogote aana miteekke mite gawajjo iillitusiro, manchitunni kainohunni rahe geedhe waamma e"eemmo gede assitinaeraati» yii.