Read Sidama_Qullaawa _Maxaafa KALAQAMA 43 Bible Online

KALAQAMA 43 - Sidama_Qullaawa _Maxaafa bible

KALAQAMA 43

¹Hude Kana"aani gobbora lowo geeshsha batidhu.

²Gibitsetenni abbitino gide itte gudduhu gedensaanni anninsa, «Galagaltine hadhine shiima gide hirtine abbenke» yiinsa.

³Yihudi kayinni, «Hakku manchi, ‹Rodii'ne ki'ne ledo daa hoogiro anewa daa didandiitinanni› yee jawaatu qaalinni coyi'rinonke.

⁴Rodoonke ledonke ha'ranno gede assittoro ha'neemmo; gideno hirre abbineemmohe.

⁵Iso hoolittoro ninkeno diha'neemmo; manchu, ‹Rodoo'ne abba hoogginiro anewa dagginoonte› yiinonke» yiisi.

⁶Yaiqoobino, « ‹Wolu rodii noonke› yitine kultine konne qarra mayira abbitinie?» yiinsa.

⁷Insano, «Hakku manchi ninkerenna fiixinkere duu're xa'manni, ‹Anni'ne xaa geeshsha lubbotenni nooni? Wolu rodiino noo'neni?› yiinonke. Ninkeno xa'mosi garinni dawarroommosi. ‹Rodoo'ne haadhine abbe› yaannonketa balanxe anfoommoni?» yitusi.

⁸Yihudino annisira, «Ninke, ate maatenkeno hude guddannonkekki gede, ha'neemmona beetto anera uyi.

⁹Ani isira waase ikkeemmo; mittore ikkiro ane anganni adhatto; galagalche atewa haa're abba hoogummoro, hegere geeshsha sao ane aana kiiranto.

¹⁰Kawoote lameenge ha'ne hingeemmoha keeshshanke huntino» yii.

¹¹Anninsa Israeeli, «Maahoyye hatto ikkannoha ikkiro yitinoonnita asse; dancha gobbanke laalcho: Shiima buudhinanniha belesaani xagicho, shiima malawo, shitto, kaarbe, hawaawenna ocholoone haadhine ogorra'nera wortine massitine hakko manchira afansha assitine uuyye.

¹²Kunni albaanni ogorra'ne giddo worreenna galagale higino birri ledo 2 anga assitine haadhine hadhe; miteekke so'rotenni dayinoha ikkannona.

¹³Rodoo'neno haadhine rakkine manchunniwa hadhe.

¹⁴Wo'manka Dandaanno Magani ko'onne rodoo'nenna Biiniyaami ledo'ne soyannoe gede hakko manchi wodana shaqqisho'ne; ilaweelo ikke gatummorono, hige ma"asseemmo abbinoere adheemmo» yiinsa.

¹⁵Kunnira, Yooseefi roduuwi hakkonne afansha, birrano lame anga assite Biiniyaamino haadhe hadhu; marte Gibitse iillite, Yooseefi albaanni uurritu.

¹⁶Yooseefi Biiniyaami ledonsa noota afe, minisi hajajaanchira, «Konne manna haadhe minira massi; kuni manni barri sagale ane ledo itannona, saada gorrite qixxeessi» yiisi.

¹⁷Manchuno Yooseefi yiino gede insa haa're minira massi.

¹⁸Insa kayinni Yooseefi minira e'inohura waajjite, «Alba ogorrankera worreenna galagale higino birrira gawajjankera, ninkeno wolqatenni borojje assi'rankeranna harrenkeno adhara yee kawiira eessinonke» yitu.

¹⁹Yooseefi mini waalchiwa shiqqi yite hajajaanchoho,

²⁰«Mootichanke, alba gide hidhinammora dangoommo;

²¹hinganni hee'ne doogote gallammora e'noommowa ogorranke fannummo woyite, wo'munku birri ogorranke afiira gurdame nooha anfoommo; hakkonne woxe xaa kune haa'ne abbinoommo.

²²Gide hidhinammora wole birra adhine dangoommo; alba birranke ogorrankera qole worinohu ayetiro dianfoommo» yitusi.

²³Isino, «Qarru dinona, waajjitinoonte! Ki'nenna anni'ne Magani ogorra'nera maaxamino woxe uyino'ne; albihu ki'ne birri iillinoe» yiinsa. Hakkunni gedensaanni Simiooni haa're insawa abbi.

²⁴Manchuno Yooseefi roduuwa minira eesse, lekka hayishshidhanno waa uyinsa; harrensarano ittannore uyi.

²⁵Sagale hakkiicho ittannota kulloonninsa daafira, Yooseefi minira daa geeshsha insa afanshansa qixxeessidhanni agartu.

²⁶Yooseefi minisira dayita, angansa noo afansha uyitusi; albinsanni baatto kissanni heeshshi yite keere haadhusi.

²⁷Isino keere haa're kae, «Kultiniehu geerchu anni'ne keere no? Lubbotenni no?» yee xa'minsa.

²⁸Insano, «Soqqamaanchikki anninke keerella no» yite, ayirrisse umo heeshshi yitu.

²⁹Yooseefino amasi beetti Biiniyaamiwa hige lae, «Kultiniehu maa'nu rodii'ne konneetini?» yiinsa. Biiniyaamino, «Beetto'ya, Maganu maassi'rohe» yiisi.

³⁰Yooseefi rodoosi afino daafira cinca hooge, muddame albinsanni shawwu yee holgira sae wi'li.

³¹Alba hayishshi'rihu gedensaanni isonoo jawaachishi're hige, sagale sayinsanni gede hajaji.

³²Sagaleno Yooseefiranna roduuwisira addi addinni shiqinshi; ledosi ittannorira Gibitsete mannirano addinni shiqinshi; hatto assinoonnihu Ibiraawootu ledo ita insara lago ikkitinohuraati.

³³Yooseefi roduuwasi ilamansa deerri garinni ofoltanno gede assi; insano ofollansa gara la'e masse mimmito la'u.

³⁴Yooseefira shiqqino sagale aaninni haa'ne insara beenki; Biiniyaamira kayinni baalunkuhunni roorsine onte anga assine uyinisi. Kunni garinni Yooseefi ledo ittanninna agganni hagiidhitu.