Read Sidama_Qullaawa _Maxaafa KALAQAMA 44 Bible Online

KALAQAMA 44 - Sidama_Qullaawa _Maxaafa bible

KALAQAMA 44

¹Yooseefi minisi hajajaancho, «Ogorinsa haa'ranno geeshshi gide worinsa; baalunku birrano ogorinsa afiira wori.

²Maa'niidihu ogori afiira birrunni seekkinoonniha finiincho'yanna gideho abbi'rino birra ledo wori» yiisi. Manchuno Yooseefi yiino gede assi.

³Soodita harrensa hogophiteenna geegiissininsa.

⁴Katamunni faffe hadhukkinni Yooseefi minisi hajajaanchira, «Hakkonne mannoota rakke hordoffe, ‹Assinoonni'ne danchummara bunshe mayira qoltini?

⁵Go'linore leellishannosiha mootichi'ya aganno uduunnicho mayira moortini? Kuni assitinoonni coyi lowo geeshsha bushaho› yite kulinsa» yiisi.

⁶Isino mare iille, Yooseefi yiinota kulinsa.

⁷Insano, «Mootichanke, togoo coye mayira coyi'rattonke? Ninke soqqamaanokki hattoo coye assine diegenninoommo.

⁸Kunni albaanni ogorranke afiinni haa'noommo birra Kana"aani gobbanni haa'ne abbinoommota ati afootto. Mootichikki mininni birra woy culka hiissine moorreemmo?

⁹Ninke soqqamaanokki giddo finiincho haa'rinohu hee'riro reyo; ninkeno mootichinkera borojje ikkineemmo» yitu.

¹⁰Isino, «Maahoyye yitinoonni gede ikko; finiincho anfihu borojjicho'ya ikko; gattinoonniri kayinni keerunni hadhinanni» yiinsa.

¹¹Insano rakke ogorransa harrete aaninni dirrisse, umi uminsa ogoro fantu.

¹²Yooseefi soqqamaanchino bayiriidihunni kayise maa'niidihu ogori geeshsha findige hasi; finiincho kayinni Biiniyaami ogori giddo afi.

¹³Insano masillunni uddannansa darte, baalunku ogorransa hogophite galagalte Yooseefiwa higgu.

¹⁴Yihudino roduuwisi ledo Yooseefiwa ei; e'anno woyite Yooseefi wona darginni dikaino; insano baattote aana diriirte ubbu.

¹⁵Yooseefino, «Kuni assitini coyi maati? Ane gedee manchi go'lino coye afannoha ikkinota diaffinoonni?» yiinsa.

¹⁶Yihudino, «Mooticha'ya maricho dawarreemmo? Marichono coyi'neemmo? Tenne saonni gantoommo yaateno didandiineemmo. Maganu ninke soqqamaanokki cubbo leellishinohe; kune ogorisira finiincho anfihuno ninkeno ate borojje ikkineemmo» yiisi.

¹⁷Yooseefino, «Hatto diasseemmo; ogorisira finiincho anfoonnihu callu borojjicho'ya ikkanno; ki'ne kayinni anni'newa keerunni hadhe» yiinsa.

¹⁸Yihudino isiwa shiqqi yee, «Mooticha'ya ballo, ani soqqamaanchikki mitto coye calla coyi'reemmona macciishshie; ati Feriooni gedeeha ikkittorono, ane soqqamaanchikkira hanqitootie.

¹⁹Mootichi'ya ati ninke soqqamaanokki, ‹Annu woy roduu noo'neni?› yite xa'mittonke yannara,

²⁰ninkeno ate mootichinkera, ‹Geerchu anni noonke; qoleno geedhimmate yannara ilinohu maa'nu rodii noonke; amasihu rodiisi reenna isi callu gatino; annisino lowo geeshsha baxannosi› yine kulloommohe.

²¹Atino, ‹Laeemmona haadhine abbe› yootto.

²²Mootichanke, ‹Beettu annasi agure daye diafanno; agure dayiha ikkiro kayinni annisi reyanno› yinoommo.

²³Ati kayinni qolte ninke soqqamaanokkira, ‹Maa'nu rodii'ne ki'ne ledo daa hoogiro layinkimeeshsho anewa daa didandiitinanni› yoottonke.

²⁴«Soqqamaanchikki anninkewa hingummo woyiteno ati yoottore kulloommosi.

²⁵Anninkeno, ‹Galagaltine hadhine shiima gide hirtine abbenke› yiinonke.

²⁶Ninkeno, ‹Maa'ne rodoonkeno ledonke haa'ne ha'neemmo; isi ledonke ha'rannokkiha ikkiro kayinni diha'neemmo; iso agurre ha'ne manchu albira mara didandiineemmo› yinoommosi.

²⁷Soqqamaanchikki anninke, ‹Galte'ya Raaheeli lame labballi ooso iltinoeta ki'ne affinoonni;

²⁸mittu mininni fule higikkinni gateenna, «Moyichu bibbide itino» yee aguroommo; techo geeshsha hooge aguroommo.

²⁹Konneno anewiinni haadhine hadhineenna mite gawajjo iillitusiro, manchitunni kainohunni rahe geedhe waamma e"eemmo gede assitinaeraati› » yiinonke.

³⁰«Xa anni'ya soqqamaanchikkiwa ha'neenna, beettu ledonke nookkita afiro, iso lubbo fule baxanno daafira, soqqamaanchikki anni'ya reyanno; kunninni kainohunni ninke soqqamaanokki annanke manchitunni kainohunni rahe geedhe waamma eanno gede assankeeti.

³²Ani soqqamaanchikki anni'yawiinni beettoho umi'ya waase ikke, ‹Iso atewa qole abba hoogummoro hegere geeshsha sao ane aana kiiranto› yoommo.

³³«Kunni daafira, ani soqqamaanchikki ate mootichi'yara beettu darga borojjicho ikkeemmohe; beettu kayinni roduuwisi ledo ha'rona.

³⁴Iso haa'rummokkinni anni'yawa hiitto ikke mareemmo? Anni'yara iillanno qarra lae cince diafeemmo» yii.