Read Sidama_Qullaawa _Maxaafa KALAQAMA 47 Bible Online

KALAQAMA 47 - Sidama_Qullaawa _Maxaafa bible

KALAQAMA 47

¹Yooseefino Feriooniwa mare, «Anni'yanna roduuwi'ya ge'reewonsa, me"ensa, saadansanna noonsare baalanka adhite Kana"aaninni dagge, Geeseemi no» yee kulisi.

²Roduuwisi giddonni onte haa're Feriooniwa massi.

³Ferioonino Yooseefi roduuwa, «Maricho assidhine heedhinanni?» yee xa'minsa. Insano Ferioonira, «Ninke soqqamaanokki, akaakkankente gede saada ce'ne hee'neemmoreeti.

⁴Gobbakkira wosinchimma hee'nammora dangoommo; Kana"aani gobbara hude batidhino daafiranna saada ittannore hoogginohura, ninke soqqamaanokki Geeseemi hee'neemmo gede fajjattonkera huucci'neemmohe» yitu.

⁵Ferioonino Yooseefira, «Annikkinna roduuwikki atewa daggino.

⁶Gibitsete baatto angakki noona, annakkinna roduuwakki woyyitino baatto Geeseemitera heedhanno gede assinsa; insa giddonni saada seekkite allaala egentinore afoottoha ikkiro ane saadano annimmatenni towattanno gede assi» yee coyi'ri.

⁷Yooseefi annasi Yaiqoobino haa're Feriooniwa massi; Yaiqoobino Feriooni maassi'risi.

⁸Feriooni Yaiqoobi, «Dirikki me"eho?» yee xa'misi.

⁹Yaiqoobino, «Basetenni base sa"anni hee'roommohu 130 dirooti; kunino haranchohonna qarru bati'rino dirooti; annuwa'yahu geeshshano di"ikkino» yiisi.

¹⁰Qoleno Feriooni maassi're, keerunni yee fule ha'ri.

¹¹Yooseefino annasinna roduuwasi Gibitsete gobbara heedhanno gede, Feriooni hajajino garinni woyyitinota Raamise yinanni baatto insara hornya asse uyinsa.

¹²Yooseefino annisiranna roduuwisira, annisi mini manni baalunkura oosonsa batinyi garinni hasiisannonsa gide uyinsa.

¹³Baatto baalate aaninni gidu goofi; hude lowo geeshsha batidhe, Gibitsennihanna Kana"aani manna lowo geeshsha gawajjitu.

¹⁴Yooseefi Gibitsennihunna Kana"aani manni gide hidhate uyino birra baalanka gamba asse mootete minira eessi.

¹⁵Kunni garinni Gibitsetenna Kana"aani gobbara woxu goofeenna, Gibitsete manni baalunku Yooseefiwa daye, «Ati la'anna reyineemmo? Birru goofinonkena gide uyinke» yitusi.

¹⁶Yooseefino, «Birru goofi'nero, gidunni soorreemmo'nena saada'ne abbe» yiinsa.

¹⁷Insano saadansa haadhe abbitu; Yooseefino abbitino faradi, ge'reewi, mei, lalunna harrete darga gide uyinsa; hakko diro saadansa baalante darga gide adhitu.

¹⁸Hakku diri saeenna layinkihura, Yooseefiwa dagge, «Ate mootichinkera maanxeemmori dinona, birru co'o yee goofino; saadankeno atewa no; umonkenna baattonke agurranna mitturino gatinonkeri dino.

¹⁹Ninke ati la'anna reyineemmo? Baattonkeno fano mayira ba'anno? Ninkeno baattonkeno gidunni hidhi; ninkeno Ferioonira borojje ikkineemmo; baattonkeno isita ikkito; ninke reyineemmokki gedenna baattonkeno fano gattannokki gede wixi'neemmo wixano uyinke» yitu.

²⁰Yooseefino Gibitsete baatto baala hire Ferioonira uyi; Gibitsete manni baalunku hude batidheenna baattonsa hiri. Baatto kunni garinni Ferioonita ikkitu.

²¹Yooseefi qaccetenni qaccete geeshsha nooha Gibitsete manna baala Ferioonira borojje assi.

²²Qeesootu qeechansa Feriooniwiinni afidhanno daafira, Yooseefi hidhikkinni insa baatto calla gattino.

²³Yooseefi Gibitsete mannira, «Kuneeti techo ki'nenna baatto'ne Ferioonira hiroommona, konne wixa massidhine baatto'nera wixidhe.

²⁴Gide gamba assidhinanni yannara, ontunni mitte anga Ferioonira uuyye; shoole anga kayinni wixaho, umi'nera, mini'ne manniranna ooso'nera sagalete wodhe» yiinsa.

²⁵Mannuno, «Mootichanke, lubbonke gatisoottona, atilla elte haa'rittonkero ninke Ferioonira borojje ikkineemmo» yitusi.

²⁶Kunnira Yooseefi loonsoonnihu giddonni ontunni mitte anga Ferioonira ikkitanno gede assi. Kuni coyino techo geeshsha Gibitsete gobbara seera ikke hee'ranno. Mootennita ikkitukkinni gattinoti qeesootu baatto callate.

²⁷Israeelootu Gibitsete gobbara Geeseemi heedhe, lowo jiro afidhu; ilanteno lowo geeshsha batidhu.

²⁸Yaiqoobi Gibitsete gobbara 17 diro hee'ri; mitteenni 147 diro hee'rino.

²⁹Yaiqoobi reyanno yanna rakkinota afe beettosi Yooseefi woshshe, «Baxattoeha ikkiro giwooda'ya amadde, Gibitsete gobbara madaarattoekki gede taalu wodaninni xaarie.

³⁰Reemmo woyite annuwa'ya madaarantinowa madaarama hasi'roommo daafira, Gibitsete gobbanni fushshite insa madaarroonniwa madaarie» yiisi. Yooseefino, «Maahoyye yoottoe gede asseemmo» yii.

³¹Yaiqoobino, «Hanni maahoyyena, ‹Hatto asseemmo› yite xaarie» yiisi. Yooseefino xaari; Yaiqoobino daallasu aana hee'renni umo heeshshi yee Magano galaxxi.