Read Sidama_Qullaawa _Maxaafa KALAQAMA 48 Bible Online

KALAQAMA 48 - Sidama_Qullaawa _Maxaafa bible

KALAQAMA 48

¹Shiima yanna gedensaanni Yooseefira, «Annikki dhiwamino» yine kullisi; Yooseefino lamenta oososi Minaasenna Efireemi anga adhe Yaiqoobi la"ara mari.

²Yaiqoobira, «Kuneeti beettikki Yooseefi dayino» yine kullisi; Yaiqoobino jawaate kae, daallasisi aana ofolli.

³Yaiqoobi Yooseefira, «Wo'manka Dandaanno Magani Kana"aani baattora Looza yinanni darga leelle maassi're"e,

⁴‹Sirchokki halashsheemmo; batiseemmohe; lowo gosano asseemmohe; tenne baattono ate gedensaanni sirchikkira hegere iqqa asse eemmonsa› yiinoe.

⁵«Atewa daammora albaanni Gibitsete gobbara ilantinoheri lamenti oosokki anere ikkito; Efireeminna Minaase anera Roobeelinna Simiooni gedeere ikkitoe.

⁶Insa gedensaanni ilatto ooso atere ikkito; iqqa ikkitannonsa baattono roduuwinsa baatto aaninni adhitanno.

⁷Mesiphexoomiyunni dayummo waro, Efiraata eate shiimuri gate hee'reennae, Raaheeli Kana"aani gobbara reyiteenna, hakkiicho Efiraataho doogote gama madaaroommose» yii. Eferaatu techo Beetelihemete yinanniwaati.

⁸Yaiqoobi Yooseefi ooso lae, «Kuri ayeooti?» yee xa'mi.

⁹Yooseefino, «Kuri Maganu tenne gobbara hee'reenna uyinoe oosooti» yee dawari. Yaiqoobino, «Maassi'reemmonsana anewa shiqqi assi» yii.

¹⁰Yaiqoobira ille geedhimmatenni kainohunni jaaroortinohura buuxxe dila'annosi. Yooseefi oososi shiqqi asseenna, annisi hanqafe sunqinsa.

¹¹Yaiqoobi Yooseefira, «Ate layinkimeeshsho afeemmo yee dihedoommo; Maganu kayinni ate agurranna oosokki nafa leellishinoe» yiisi.

¹²Yooseefi oososi Yaiqoobi giwoodi aaninni hoole albunni baatto kisanni heeshshi yee kumbuuli.

¹³Isino Yaiqoobira Efireemi guraanni, Minaase qole qiniiteenni shiqqi asse uurrisi.

¹⁴Yaiqoobi kayinni qiniiticho angasi maa'niidihu Efireemi umi aana wori; guracho anga qiniiticho anga aanaanni qole sayise bayiriidihu Minaase umi aana wori.

¹⁵Isino Yooseefira, «Annuwa'ya Abirihaaminna Yisihaaqi, yootto gede ikkite soqqantuhe Magani, aneno anje'yanni kayisse techo geeshsha towatittoehu,

¹⁶bushu coyi baalunkunni gatisittoe sokkaasinchi, tenne ooso maassi'ri. Anehu, annuwa'ya Abirihaaminna Yisihaaqi su'mino, insanni woshshamo; insano baattote aana batidho» yee maassi'rinsa.

¹⁷Yooseefi, annisi qiniiticho anga Efireemi umi aana worinota dibaxino. Kunnira, annisi qiniiticho anga Efireemi umi aaninni hoole, Minaase umi aana woranno gede angasi amade,

¹⁸«Anna'ya, dihattooti; bayiru konneetina, qiniiticho angakki isi aana wori» yii.

¹⁹Annisi kayinni, «Afoommo beetto'ya! Afoommona kunino lowo gosa ikkanno; ikkollana, maa'nu rodiisi iso rooranno; sirchisino bati'ra gosa ikkanno» yee, Yooseefi yiinota giwi.

²⁰Hakko barra maassi'ranninsa, «Israeele maassidhanno yannara ki'ne su'minni, ‹Maganu Efireeminna Minaase gede asso'ne› yitanno» yii. Kunni garinni Yaiqoobi Efireemi Minaasera albaanni qoli.

²¹Hakkunni gedensaanni Yaiqoobi Yooseefira, «Kuneeti ani reyammoraati; Maganu kayinni ki'ne ledo hee're, galagalche annuwa'ne baatto massanno'ne.

²²Ani Amooraawootuwiinni bagadi'yanni olame adhoommota shaqqado tullichaame baatto roduuwikkira ikkikkinni atera oommohe» yiisi.