Read Sidama_Qullaawa _Maxaafa KALAQAMA 50 Bible Online

KALAQAMA 50 - Sidama_Qullaawa _Maxaafa bible

KALAQAMA 50

¹Yooseefi annisi reeshshi aana gombisame albasi sunqanni wi'li.

²Hakkunni gedensaanni, reeshsha cuukka egentinori soqqamaanosi annisi reeshsha xaggatenni cuukkitanno gede hajaji; insano Yaiqoobi reeshsha xaggatenni cuukkitu.

³Xagicho egentinori gobbate rosi garinni reeshsha mooshshitanni 40 barra keeshshitu. Gibitsete manni Yaiqoobira 70 barra wi'lisi.

⁴Wi'la gooffuhu gedensaanni, Yooseefi Feriooni ledo gashshaanora, «Maahoyye yitinieha ikkiro Ferioonira,

⁵‹Anni'ya reyara rahe hee're, Kana"aani gobbara qixxeessi'rino waammara madaareemmosi gede xaarsiisinoe; kunni daafira, hakkiicho anna'ya madaadhe higeemmo gede fajjie yiino› yitine kulle"e» yiinsa.

⁶Ferioonino, «Xaarsiisinohe garinni annakki massite madaadhi» yiisi.

⁷Yooseefi annasi madaadhara ha'ri yannara, Feriooni ledo gashshaano, mootete mini jajjabbinna Gibitsete geerri baalu ledosi hadhu.

⁸Yooseefi mini manni, roduuwisinna annisi mini manni baalu ledo hadhu; Geeseemi shiimmaadda oosonna saada calla gattino.

⁹Faradi gaarenna faradaasineno ledosi hadhu; ledosi ha'rino manni lowo geeshsha bati'raho.

¹⁰Yordaanoosi Waa widoonni Axaadi yinanni ayiddummewa iillituta, mannu baalunku hururame wi'li; Yooseefino hakkiicho annisira 7 barra ofolle wi'li.

¹¹Kana"aani mannino Axaadi ayiddummera wi'linoonni wi'la lae, «Kuri Gibitsootu hiitto xissiisidhe wi'litanno!» yii. Kunni daafira, hakkonne Yordaanoosi xawira noo dargira su'ma Abeeli Mitsirayimi yini.

¹²Yaiqoobi ooso anninsa hajajinonsa gede assitu.

¹³Hakkunni garinni reeshsha Kana"aani massite Memirera soojjaatoonni noohura Makiphela godira madaartu; kuni godino Abirihaami waammate ikkanno gede Hitichu Efirooniwiinni hidhino baatto aana nooho.

¹⁴Yooseefi annasi madaadhihu gedensaanni, roduuwisinna ledosi ha'ri manni baalunku ledo galagale Gibitse higi.

¹⁵Yooseefi roduuwi anninsa reyihu gedensaanni, «Miteekke Yooseefi xaa geeshsha koma amade noonkeha ikkiro, assinoommosi bunshe baalate bado qo'lanke ikka» yite yaaddu.

¹⁶Kunnira, «Anninke reyara albaanni, ‹Roduuwikki assitinohe beebbaranna saora yite, koma amaddootinsa! Yiino yitine kullesi› yee hajajinonke; kunni daafira, ninke anninke Magani soqqamaano assinoommohe sao baalanta agurattonkera huucci'neemmohe» yite manna soqqitu. Yooseefi tenne sokka macciishshi yannara wi'li.

¹⁸Hakkunni gedensaanni, roduuwisi saonsa agurannonsa gede dagge albasiinni gombisante, «Kuneeti ninke ate borojjeeti» yite eegantu.

¹⁹Yooseefi kayinni, «Waajjitinoonte! Bado qolammora ani Magano di"ikkoommo!

²⁰Ki'ne busha coye heddinierono, Maganu kayinni techo la'nanninte gede lowo manna gatisate danchummate qolino.

²¹Xaano ikkiro waajjitinoonte; ani ki'nenna ooso'ne itiseemmo» yee owaatu qaalinni coyi're wodana diggi assinsa.

²²Yooseefi annisi maate ledo Gibitsete hee'ranna, 110 diro ikkisi.

²³Efireemi oosonna oososi oosono afi; Minaase beetti Makiiri ooso, ilasi gede asse kiidhi.

²⁴Yooseefi roduuwisira, «Ani reyammoraatina, Maganu kayinni addintanni kaa'la'nera daanno; tenne baattonnino fushshe Abirihaamira, Yisihaaqiranna Yaiqoobira aansara xaarino baattono iillishanno'ne» yiinsa.

²⁵Qoleno Israeelete oosora, «Maganu kaa'la'nera daanno waro, miqicho'ya kawiinni ledo'ne haadhine hadhe» yee xaarsiisinsa.

²⁶Yooseefi 110 dirisinni reyi; reeshshasino xaggatenni cuukkine, Gibitsete gobbara saaxinete giddo worre agurri.