Read Sidama_Qullaawa _Maxaafa KALAQAMA 7 Bible Online

KALAQAMA 7 - Sidama_Qullaawa _Maxaafa bible

KALAQAMA 7

¹Kaaliiqi Nohira, «Ati maatekki baala haadhe amo markaawete giddora ei; kalqete manni mereero ati callu keeraancho ikkoottota afoommo.

²Maala intanni saada baalate giddonni lamala lamala labbaahanna meyata,

³maala intannikki saada giddonni lame lame labbaahanna meyata, ceate giddonni qolte lamala lamala labbaahanna meyata baattote aaninni sirchinsa ba"annokki gede atewa haa'ratto.

⁴Lamalu barri gedensaanni, 40 barranna 40 hashsha baattote aana xeena dirrise, kalaqoommo kalaqama baalanka huneemmo» yiisi.

⁵Nohi Kaaliiqi hajajinosire baala assi.

⁶Baote wayi baattote aana lolahi yannara Nohi 600 diri manchooti.

⁷Isino, baote wayi lolahinni gatanno gede galtesi, oososinna oososi seenne haa're markaawete giddora ei.

⁸Maala intanni saada, maala intannikki saada, ceanna baattote aana milli yaannori baalu,

⁹Maganu Nohi hajajinosi garinni, lamu lamu labbaahunna meyati ledosi markaawete giddora ei.

¹⁰Lamalu barri gedensaanni, baote wayi baattote aanira lolahi.

¹¹Nohira 600 diro ikkisihunni layinki aganira tonaa lamalki barra, hakko barranni lowo diimenni bu'a baala burqitu; gordu dukkani masikooteno fa'nantu;

¹²xeenano 40 barranna 40 hashsha baattote aana gani.

¹³Hakko barra Nohi markaawe ei; Nohi, galtesi, oososi Seemi, Kaami, Yaafeetinna sasunku adhitino seenni ledosi ei.

¹⁴Dubbu moyichi baalunku sirchu sirchunkunni, saada baalanti sirchu sirchunkunni, baattote aana milli yaannori baalunku sirchu sirchunkunni, buubbanno cea baalanti sirchu sirchunkunni, qoola afi'rino kalaqami baalunku ledonsa ei.

¹⁵Lubbo afi'rinori baalunku lame lame ikke Nohiwa markaawete giddora ei.

¹⁶Lubbo afi'rinori baalunku labbaahunna meyati Maganu Nohi hajajino garinni ei. Kaaliiqi Nohira waalcho gobbaanni cufi.

¹⁷Baote wayi baattote aana 40 barra gananni keeshshi; wayino bati'ranni ha'ri; markaaweno baattote aaninni iima qole kayisi.

¹⁸Wayi baattote aana lowo geeshsha bati'ranni ha'ri yannara, markaawe wayi aana ha'ra hanaffu.

¹⁹Wayi baattote aana lowo geeshsha bati'ri; gordoho woroonni noore lowiddaanna ilaalla baala egemmi.

²⁰Wayi ilaalla egemme, 15 cigile iima hige lexxi.

²¹Baattote aana lubbo afi'rinori baalu, cea, saada, dubbu moyichi, baattote aana godowunni ha'rannorinna mannu baalunku goofi.

²²Moola baatto aana noohu foolanno kalaqami baalu reyi.

²³Baattote aana noohu lubbo afi'rinohu baalu mannunni kayise saadate geeshsha, godowunni ha'rannori baalu ceate geeshsha co'o yee goofi. Nohinna ledosi markaawete giddo noori callu gattu.

²⁴Wayi baattote aaninni xeikkinni 150 barra keeshshi.