Read Sidama_Qullaawa _Maxaafa KALAQAMA 9 Bible Online

KALAQAMA 9 - Sidama_Qullaawa _Maxaafa bible

KALAQAMA 9

¹Maganu Nohinna oososi, «Ille ilamme, baatto wo'me;

²saada, cea, godowunni ha'ranno kalaqaminna qulxu'mu baalu waajjanno'ne; duuchunku ki'ne anga galanno.

³Kunni albaanni oommo'nente gede, lubbo noosihu milli yaanno kalaqami baalu, ittinanni sagale ikkanno'ne;

⁴ikkollana, mundeete giddo lubbo noo daafira, mundee giddo noo maala ittinoonte.

⁵Manna shaannohu baalu xa'mamanno; manna shiinoha qorichinshanni; manna shitino saadano shinanni.

⁶«Mannu kalaqaminohu Maganu akatinniiti; kunni daafira, afanni hee're manna shaannohu baalu mannu anga reyanno.

⁷«Ki'ne ille ilamme; sirchi'ne baatto wo'mo» yee maassi'rinsa.

⁸Hakkunni gedensaanni Maganu Nohiranna oososira,

⁹«Kuneeti ki'nenna sirchi'ne,

¹⁰lubbo afi'rino kalaqami baalu, markaawete giddonni fultino cea, saadanna dubbu moyichi baalu ledo gondooro e"eemmo.

¹¹Ledo'ne eummo gondoori garinni, kunni ka'a lubbo afi'rino kalaqami baalanku baote wayinni horonta diba"anno; baattono layinkimeeshsho baote wayinni dihuneemmo.

¹²Ki'nenna lubbo afi'rino kalaqami baalu ledo e"eemmohu kuni hegere gondoori malaate ikkanno gede,

¹³magani-seemo'ya gomichu aana woroommo; tini magani-seemo kalqete ledo eoommo gondoorira malaate ikkite heedhanno.

¹⁴Gordo gomichunni diweemmo yannaranna magani-seemo gomichu aana leeltanno yanna baalantera,

¹⁵‹Kunni ka'a baote wayinni, lubbo afi'rino kalaqama baala horonta dihuneemmo› yee ki'nenna wolootu lubbo afi'rino kalaqami baalu ledo eoommo gondooro qaageemmo.

¹⁶Magani-seemo gomichu aana laeemmo yanna baalantera, anenna baattote aana noori lubbo afi'rino kalaqami mereero nooha hegere gondooro qaageemmo.

¹⁷Tini magani-seemo lubbo afi'rino kalaqami baalaho eoommoha gondooro qaagiissitanno malaateeti» yii.

¹⁸Markaawetenni fulturi Nohi ooso Seemi, Kaamiitinna Yaafeetiiti; Kaami Kana"aani annaati.

¹⁹Xa baatto wo'me noo manni baalu ilaminohu kuri sasu Nohi oosonniiti.

²⁰Nohi baatto loosi'rannoha ikkinohura woyinete haqqe kaasi'ri;

²¹mitto barra Nohi woyinete xajje age dimbe, mullichu dukkanu giddo goxi.

²²Kana"aani anna ikkinohu Kaami annisi Nohi mullichu noota afi yannara, gobbara fule, lamunku roduuwisira kuli.

²³Seeminna Yaafeeti darbata qotinsara wodhite, dukkanunniwa higge badhillitte marte, anninsa mullimma la"a saalfattino daafira shawwu yite heedhe teedasi dibbu.

²⁴Nohi dimbu higisihu gedensaanni, maa'nu beettisi assinosita afe,

²⁵«Kana"aani rumaminoha ikko! Roduuwisira borojjicho, borojjinsarano woriidi borojjicho ikko!

²⁶«Qoleno, Seemi Magani Kaaliiqi galataminoha ikko; Kana"aani Seemi borojjicho ikko.

²⁷Maganu Yaafeeti baatto halashsho; Yaafeeti sirchi Seemi sirchi ledo mitteenni hee'ro; Kana"aani Yaafeeti borojjicho ikko» yii.

²⁸Baote wayi gedensaanni, Nohi 350 diro hee'ri.

²⁹950 diro ikkisita reyi.