Read Sidama_Qullaawa _Maxaafa LAYINKI SAAMUEELI 17 Bible Online

LAYINKI SAAMUEELI 17 - Sidama_Qullaawa _Maxaafa bible

LAYINKI SAAMUEELI 17

¹Shiima yanna gedensaanni Akixoofeeli Abeseloomira, «Tonaa lame kume manna doore techo hashsha Daawiti shorreemmona fajjie.

²Daafure wolqa hooge hee'reenna mare dano tugeemmo. Hakkawoyite isi masanno; ledosi noori baalu agurte xooqqanno. Isi callisi nooha amade sheemmo.

³Idayicho ayiddaannisewa daggannonte gede, mannu baalu atewa higanno gede asseemmo. Ati mittu manchi callu reyara hasi'ratto; hakkuyi ka'i manni kayinni keerunni hige ate ledo hee'ranno» yii.

⁴Abeseloominna ledosi noohu Israeelete geerri baalu amaalesi baxxu.

⁵Abeseloomi, «Hanni Kuusino woshshine yaannore anfo» yii.

⁶Kuusi dayita Abeseloomi, «Akixoofeeli togo yiinona, isi yii gede assinonso ati amaalattonkeri woliri no?» yee xa'misi.

⁷Kuusino Abeseloomira, «Akixoofeeli xa tenne yannanni malino mali dancha di"ikkino» yiisi.

⁸Annikki Daawitinna ledosi noori wolqaataamma bagadaanonna qalino dagunchi gede waajjishshannore ikkitinota afootto. Qoleno annikki sia bareessa ikkino daafira hashsha olantosi ledo digalanno.

⁹Xa kawoote nafa miteekke godu giddo woy mitto darga maaxame nooha ikkanno. Daawiti ate olanto aana bala tuginota afiro, mannu baalu olantokki qeelantinohu gede asse hasaawanno.

¹⁰Israeelete manni baalu annikkinna ledosi noo manni wolqaataamma bagadaano ikkitinota afino daafira, doobbiichu gedee bareedda ikkitinori olantokki nafa waajjite huxidhanno.

¹¹Kunnira ani amaaleemmoheri, «Aliyyenni Daaninni kayise wodiidoonni Bersaabehi geeshsha noohu baaru gami shaafi geeshshihu Israeelete manni baalu atewa dayenna, ati gaadaanna ikkiteenna ledokki fuliro woyyanno.

¹²Daawitino e'nummowa e'ne noowa iillineemmo; loju baatto amadannohu gede hedeweelcho aanaho dirrineemmosi. Ledosi noo manni baalu mittuno gatikkinni gundeemmo.

¹³Xooqe qiinshoonni katama eiro nafa Israeelete manni baalu katama siiwotenni goshooshe wigidiide lagaho tuganno; mittu kinchi nafa dargaho digatanno» yii.

¹⁴Abeseloominna Israeelete manni baalu, «Kuusi mali Akixoofeeli malinni rooranno» yii. Kaaliiqino Abeseloomira bao dagganno gede assara yee woyyitannosita Akixoofeeli amaale adhantannokki gede assino.

¹⁵Hakkunni gedensaanni Kuusi qeesootaho, Saadooqiranna Abiyaataarira, Abeseloomiranna Israeelete geerrira Akixoofeeli uyino amaalenna isi malino mali hiittoohoro kulinsa.

¹⁶Qoleno, «Xa mootenna ledosi noo manni goofannokki gede, kunni hashshinni rakke halallitte gobba widoonni higge Yordaanoosi Waa fultona Daawitira kulle» yii.

¹⁷Hatte yannara Yoonaataaninna Akima"aasi Katama e'anna anfanninsakki gede Ayini-Rogeeli Buichowa ofolte no. Mitte beetto marte ikkanni noore baala kultunsa. Insano affinore hadhe moote Daawitira kultusi.

¹⁸Mitte soodo kayinni mittu beetti insa afe Abeseloomira kuli. Insano hakkiinni rakke ka'e Bahuriimi Katamira hee'rannohuwa mittu manchiwa hadhu. Hakko manchi mini mule wayi bale nootera e'e maaxantu.

¹⁹Kunni manchi galte balete afiira dado karte aanaho gide haggu. Konne coye ayino dihuluullamino.

²⁰Abeseloomi ledo manni manchonniwa daye, «Akima"aatsinna Yoonaataani hiikko no» yite xa'mituse. Manchono, «Waa tayisse fulte hadhino» yitunsa. Insano hasse hoogge Yerusaalame higgu.

²¹Insa hadhuhu gedensaanni Akima"aatsinna Yoonaataani balete giddonni fulte hadhe, ikkinore Daawitira kultusi. Akixoofeeli ganino ganono kultusihu gedensaanni, «Rakke Waa tayisse fulte ha'ri» yitusi.

²²Kunnira Daawitinna ledosi noori baalunku ka'e Yordaanoosi Waa fulte hadhu. Sooda geeshsha Waa tayise fulinokkihu mittuno dino.

²³Akixoofeeli malisi adhaminokkita afiti, harrichosi koodhe kae katama minisira ha'ri. Mine biddi assi'rihu gedensaanni angasinni qalxi're reenna, annisi waammara madaarrisi.

²⁴Abeseloominna ledosi noo Israeele Yordaanoosi Waa tayisse fultu yannara, Daawiti kayinni Mahinayimi Katama iilli.

²⁵Abeseloomi Iyoaabi darga ola hajajannoha Amaasa yinanniha wori. Amaasa Ismaeelichu Yeteeri beettooti. Isi Iyoaabi ama Tseruya rodoo Naoosi beetto Abigiya adhino.

²⁶Abeseloominna ledosi manni Geleaadi baattora marte kunseentu.

²⁷Daawiti Mahinayimi Katama dayi yannara, Amoonootu gobbanni Raaba Kataminni dayinohu Naoosi Beetti Shoobi, Lodebaari Katami manchi Amieeli beetti Makiiri, Roogiliimi Katamihu Geleaadichu Barzilayi,

²⁸Daawitinna mannisi halallitte gobbara hudidhinota, daafurtinotanna goodhinota affe, xiltuwa maaqquwanna itiilluwa haadhe abbitunsa. Qolteno Daawitiranna ledosi mannira qamade, hayixe, bullee, du'rinshoonni shoye, baaqeela, atara, malawo, burbuxxo, geintonna ge'reewo haadhe abbitunsa.