Read Sidama_Qullaawa _Maxaafa LAYINKI SAAMUEELI 22 Bible Online

LAYINKI SAAMUEELI 22 - Sidama_Qullaawa _Maxaafa bible

LAYINKI SAAMUEELI 22

¹Maganu Daawiti Saaoolinna wolu diini baalu anganni gatisinosihura, Kaaliiqira kunninni aante noo faarso faarsino:

²Kaaliiqi golo'yaati; jawaata qiisho'yaatinna gatisaancho'yaati.

³Maganu golo'ya ikkinoehura, isi ledo keerunni hee'reemmo; wonqo'ya ikke gargarannoe. Hale'ya ikke keerunni worannoe; isi gatisaancho'ya ikkinohura, shettotenni fushshannoe.

⁴Galatu hasiisannosiha Kaaliiqa woshshi'reemmo; isino diinna'yawiinni gatisannoe.

⁵Reyote dambali doyissie; baote lolahino egemmie.

⁶Jeennaatu siiwo aanaho xaaxantue; reyote woshshaadono amaddue.

⁷Qarru iillie yannara Kaaliiqa woshshi'roommo; kaa'laera Magani'yawa hige raaroommo; Isino Qullaawu Minisira hee're, qoonqo'ya macciishshino; raare'yano isiwa iillitino.

⁸Maganu hanqeenna baatto huxidhe shafantu; gordu safono milli yitu.

⁹Sanosinni hanqu wiliile fultu; afiisinnino ittanno giiranna buwanno kashili fuli.

¹⁰Gordo dare baattote aanira dirri; kolishshu gomichi lekkasira woroonni no.

¹¹Kirubeeli aana ofolle buuwi; bubbete qooli aana ofolle leelli.

¹²Kolishsho gomicho dukko assi'ri; qooxeessisira noo dukkonna, xeena amadinohu du'mu gomichi doyissisi.

¹³Albasiinni noo beleqinni, buwanno kashili fuli.

¹⁴Kaaliiqi gordoho hee're beleqi; Wo'munkura Aliidi Magani hirbasi macciishshiishi.

¹⁵Digaanunni worbicho kaachishi; baarigaarrasino billaallisi; banqote beleqinni shorrinsa.

¹⁶Kaaliiqi baarigaarrasi rufita, sanosi giddonni fulino foorarinni ufita, baaru hundi leelli; baattote hundino reqecci yii.

¹⁷Kaaliiqi iima hee're angasi diriirse haarie; wayi diime giddonni fushshie.

¹⁸Lowo geeshsha wolqissinoe baarigaarrawiinninna, gibbannoeri baalunkuwiinni gatisie.

¹⁹Qarramummo barra aana'ya ka'ue; Kaaliiqi kayinni irko'ya ikkinoe.

²⁰Baxinoe daafira qarru giddonni fushshe, faffote darga masse worinoe.

²¹Kaaliiqi halaalaanchimma'ya garinni uyinoe; wodani'ya keeraanchimma garinni maassi'rinoe.

²²Kaaliiqi seerano agadhoommo; bunshe loosate yee Magani'yara badhe diwodhoommo.

²³Hajajosi baala alba'yaanni no; wogasiwiinnino difafoommo.

²⁴Isi albaanni sao diassoommo; cubbono qorophoommo.

²⁵Kaaliiqi halaalaanchimma'yanna, keeraanchimma'ya garinni daware aannoe.

²⁶Kaaliiqa, ammanaminohehura ati ammanamoottoho; taashshanno manchira ati taashshattoho.

²⁷Suwashshu manchira suwatto; shokkashshu manchira kayinni gara giwatto.

²⁸Umonsa heeshshi assitinore gatisatto; heeshshi assitansara illekki boonaleeyye la'anno.

²⁹Kaaliiqa, ati anera caabbicho'yaati; Kaaliiqa'ya ati, tunsicho'ya xawisatto.

³⁰Ate wolqanni baarigaarra'ya qeeleemmo; ate Magani'yanni qiishonsa giddora kubbe e"eemmo.

³¹Magani'ya doogo guutate! Kaaliiqi qaali ximbiiwaminoho; hexxitannosirira baalaho isi wonqote.

³²Kaaliiqa agurranna wolu Magani dino; Maganinke callu irkonkeeti.

³³Wolqa aannoehunna, doogo'ya keerunnita assannoehu Maganoho.

³⁴Lekka'ya geedimunnite gede kaajjishannoe; gaarrate aana wodani gede qaafisannoehu isooti.

³⁵Anga'yara ola rosiisino; camote digaana bedeedate cigile'ya kaajjishino.

³⁶Gargadhinannita wonqokki oottoe; towanyokkino jawa assitinoe.

³⁷Qaafo'ya halashshoottoe daafira, shalaqe diuwoommo.

³⁸Baarigaarra'ya shorre amade cancanoommo; insa gudummokkinni agure badhera dihigoommo.

³⁹Layinkimeeshsho ka'annokki gede asse ganoommo; insano qeelante lekka'ya hunda ubbino.

⁴⁰Olaho wolqa oottoe; gawajjitannoere lekka'yara woroonni karootto.

⁴¹Diinna'ya badheegge xooqqanno gede assootto; gibbannoereno gudoommo.

⁴²Raartanno; kaa'lannonsaha kayinni diafidhanno; Kaaliiqiwa higge raartino; isi kayinni didawarannonsa.

⁴³Bukote gede asse maniisseemmonsa; doogote sabbi gede asse lilleemmonsa.

⁴⁴Haxawarru manni'yawiinni gatisattoe; dagate umo assoottoe; egennoommokki gosano gashshantannoe.

⁴⁵Wole gobba manni ayirrinye aannoe; anere macciishshanni hee'renni hajajamannoe.

⁴⁶Insa wolqa hooggu; ri'inowiinni huxidhanni fultu.

⁴⁷Kaaliiqi heeshshonniho; gatisannoehu golo'ya ikkino Magani galatamo; gatisinoe Magani ayirro.

⁴⁸Rabba qolannoe Magani, daga ane anga galtanno gede assanno.

⁴⁹Diinna'ya anganni gatisse fushshattoehu ateeti; gawajjitannoerira iimaanni qoloottoe; kaajjadu manni anganni gatisoottoe.

⁵⁰ Kunni daafira Kaaliiqa, ate dagate mereero galaxxeemmohe; su'makkino faarsotenni guwiseemmo.

⁵¹Moohisinosihura jawa qeelle aanno; buurinoha bagamannokki baxillinni baxannosi; Daawitinna sirchosino hakko baxillinni baxannonsa.