Read Sidama_Qullaawa _Maxaafa LAYINKI SAAMUEELI 24 Bible Online

LAYINKI SAAMUEELI 24 - Sidama_Qullaawa _Maxaafa bible

LAYINKI SAAMUEELI 24

¹Kaaliiqi galagale Israeelete mannira hanqino daafira, Daawiti kakkayise qarru iillannonsa gede, «Marte Israeelenna Yihudu manna kiiri» yii.

²Kunnira Daawiti olu roorrichira Iyoaabira, «Ledokki noore olu hajajaano haadhe marte gobbate qaccenni qaccete geeshsha baalanta ga're iillite, Israeelete manni mageeshsha ikkinoro afate hasi'roommo daafira kiiri» yiisi.

³Iyoaabi kayinni, «Moote'ya, Maganikki Kaaliiqi Israeelete olanto kunninni xibbe ero assanna la"atto gede dirokki seedisohe. Ikkollana moote'ya ballo, konne coye mayira heditto?» yii.

⁴Moote kayinni Iyoaabiranna olantote hajajaanora yiinore wonshitanno gede qarrisinonsa daafira, Israeelete manna kiirtara albisinni fulte hadhu.

⁵Yordaanoosi Waa fulte Gaadi gobbara noo lagichi mereero Aroeeri Katamira wodiidoonni shiima yanna keeshshitu. Hakkiinni ka'e, aliyye widoonni higge Yaizeeri Katama martu.

⁶Qolteno Geleaadinna Hitootu heedhannowa Qaadesi marte iillitu. Hakkiinnino Daani gaangaabbe Sidoona iillitu.

⁷Hakkiichinnino ka'e wodiidi ragaanni qiinshoonniha Xiroosi Katamanna qolteno Hiwootunna Kana"aanootu katamma baala iillitu. Goofimarchohono Yihudaho wodiidoonni Bersaabehi martu.

⁸Kunni garinni gobba baala doyituhu gedensaanni, honsu aganinna lemuu barrinni Yerusaalame higgu.

⁹Iyoaabi Israeelete 800,000, Yihudaho 500,000 ola dandaanno manni noota mootete kuli.

¹⁰Daawiti kayinni mannu kiiro afihu gedensaanni wodanunni yaade Magano, «Ani konne coye assa'yanni lowo cubbo loosoommo. Magano'ya ballo, ani borojjichikki assoommoha konne gowwimmate coye agurattoe gede huucci'reemmohe» yii.

¹¹Kaaliiqi Daawiti himanaancho Gaadi soye, «Marte Daawiti, ‹Kuneeti doodhattora 3 coye eemmohena mitto doodhi; anino ati doodhootto coye calla wonsheemmohe› yiino» yite kulisi yii. Daawiti goxinowiinni soodo gute kae hee'reenna,

¹³Gaadi daye Kaaliiqi yiinosire kulanni, «Gobbakkira 3 diri hude ubbannotanso, woy 3 agana diinu shorrannohetanso, woy 3 barri qoomami dirrannota doodhatto? Hanni wodanikkinni malte ka'e, Kaaliiqira kuleemmo gede doodhoottoha kulie» yiisi.

¹⁴Daawitino Gaadira, «Kuneeti ani addinta shetoommo. Ikkollana mannu angara eammontenni Kaaliiqi maarannoha ikkino daafira isi qorichishiero woyyate» yee dawari.

¹⁵Kunnira Kaaliiqi hakko barrinni kayise hedino yanna wo'mita geeshsha Israeelete baattora lowo dhibba dirrisi. Gobbate qaccenni qaccete geeshsha hee'rannohu 70,000 Israeelete manni reyi.

¹⁶Kaaliiqi Sokkaasinchi Yerusaalame hunara angasi diriirsi yannara, Kaaliiqi mannaho abbino qoricha uurrisara hede, manna gudanni noo sokkaasincho, «Xaate ikkinona aguri» yii. Hatte yannara sokkaasinchu Yabuusichu Oorina ayiddummera uurre no.

¹⁷Daawitino manna qoomanni noo sokkaasincho afe Kaaliiqa, «Sao anete; so'roommohuno aneeti. Kuni manni beebbaataamoho. Hanqikki kunni manni aana dirrantenni anenna mini'ya manni aana dirrona» yii.

¹⁸Hakko barra himanaanchu Gaadi Daawitiwa mare, «Marte Yabuusichu Oorina ayiddummera Kaaliiqira kakkalote darga seekki» yiisi.

¹⁹Daawitino Kaaliiqi yiinota macciishshe himanaanchu Gaadi kulinosi gede assi.

²⁰Oorina eela qole la"anni hee'reenna moote Daawitinna ledosi gashshaano isiwa higge dagganna afi. Isino heeshshi yee albunni baatto kise Daawiti keere haa'ri.

²¹Oorina qole, «Mooticha'ya, kawiira mayira dayitto?» yee xa'misi. Daawitino, «Kaaliiqi konne qoomama mannu aaninni hoolanno gede ayiddummekki hidhe Kaaliiqira kakkalote darga seekkammoraati» yiisi.

²²Oorinano Daawitira, «Mooticha'ya, ayiddumme adhite hedootto garinni Kaaliiqira kakkalo shiqishi. Shilqinshanni kakkalora kune boottano no; giirateno qambarunna gide gannanni kuttano no.

²³Maganikki Kaaliiqi kakkalokki adhannohe gede halchanni konne baala ate mootichi'yara oommo» yii.

²⁴Moote Daawiti Oorinara, «Dee'ni, hatto di"ikkanno! Baatummohero ikkinnina calla diadheemmo. Calla adhoommore Kaaliiqira kakkalo asse dishiqisheemmo» yii. Hakkunni gedensaanni, Daawiti Oorina ayiddummenna boottasi 50 kinchu birrinni hidhi.

²⁵Hakkiicho Kaaliiqira kakkalote darga seekke shilqonnitanna mittimmate kakkalo shiqishi. Kaaliiqino Daawiti huuccatto macciishshe, Israeelete manni aana dirrisino qoomama uurrisi.