Read Sidama_Qullaawa _Maxaafa LAYINKI SAAMUEELI 3 Bible Online

LAYINKI SAAMUEELI 3 - Sidama_Qullaawa _Maxaafa bible

LAYINKI SAAMUEELI 3

¹Saaoolinna Daawiti manni lowo yanna olamanni keeshshi. Ikkeennano, Daawiti jawaante lexxanna, Saaooli mini kayinni wolqa ajanni dayi.

²Daawitira Kebirooni 6 labballi ooso ilantusi. Bayiru, Iyiziraeelitte Akinahoomi iltinohu Aminooniiti.

³Layinkihu, Qermeloosichu Naabaali galte Abigiya iltinohu Kiliaabiiti. Sayikkihu, Geshuuri moote Talmayi beetto Maaka iltinohu Abeseloomiiti.

⁴Shoolkihu, Hagiiti yinanniti iltinohu Adooniyaasiiti. Ontihu, Abixaali yinanniti iltinohu Shefaaxiyaati.

⁵Leelkihu Egila yinanniti iltinohu Yutireaamiiti. Kuri baalunku Kebirooni ilantino.

⁶Daawiti olantonna Saaooli minira ammanantino olanto mereero olu lexxanni ha'ri deerrinni, Saaooli olanto giddo Abeneeri jawaata ikki.

⁷Mitto barra Saaooli beetti Iyaabuste, «Anni'yara irkote galte Aya beetto Ritsifa ledo mayira goxitto?» yee Abeneeri xa'mi.

⁸Abeneeri Iyaabuste coyi'rino coyira lowo geeshsha hanqe, «Ani Saaooli mine agure Yihudaho soqqameemmoha lawihe? Hundinni kayise annikki Saaoolira, roduuwisiranna fiixisira busha diassoommo; ateno Daawitira sayise dioommohe. Tenne giddoonni ati ane techo meyate daafira yekkeerittoe?

⁹Saaooli gashshoote isiwiinninna minisinni hoole, Daawiti Israeelete aliyyeenni Daaninni kayise Yihudaho wodiidoonni Bersaabehi geeshsha noo gobbara moohisannosi gede Kaaliiqi balaxe xaarinosi. Konne coye wonsha hoogummoro Maganu woroonke"e» yii.

¹¹Iyaabuste kayinni Abeneeri waajjino daafira, mittoreno didawarino.

¹²Hakkunni gedensaanni Abeneeri Daawitira, «Gobba gudisse gashsha dihasi'ratto? Israeele baalanta ate widira qoleemmona, ane ledo namoomi» yee sokka soyisi.

¹³Daawitino, «Maahoyye, ate ledo namoomeemmo. Ikkollana kayinni atewiinni mitto coye hasi'reemmo; anewa daatto woyite, Saaooli beetto Melkooli haa'rittoekkinni daggooti» yiisi.

¹⁴Qoleno Daawiti Saaooli beettiwa Iyaabustewa, «Xibbe Filisxeeme qaare adhoommota galte'ya Melkooli qolie» yee sokkaancho soqqi.

¹⁵Iyaabusteno, Melkooli adhante noowiinni Layishi beetti Felxieeliwiinni soye abbisiisi.

¹⁶Ayiddaanniseno Bahuriimi Katami geeshsha wi'lanni hoodese ha'ri. Abeneeri kayinni, «Qaera higi» yiisita agure higi.

¹⁷Abeneeri Israeelete roorrootiwa mare, «Daawiti moote'ne ikkanno gede halchitinanni keeshshitinoonni.

¹⁸Kaaliiqino Daawitire coyi'ranni, ‹Soqqamaanchi'ya Daawiti widoonni qole manna'ya Israeele Filisxeemetenna diininsa baalu anganni gatiseemmo› yee coyi'rinona, konne coye xa wonshe» yiinsa.

¹⁹Abeneeri konne coye lede Biiniyaami mannirano kuli. Hakkunni gedensaanni, Israeelenna Biiniyaami manni baalunku assitara heddinore kultara Daawitiwa Kebirooni hadhu.

²⁰Abeneeri Daawitiwa Kebirooni ha'ri woyite 20 manna anga adhe ha'rino. Daawitino Abeneeriranna ledosi mannira jila jili.

²¹Abeneerino Daawiti, «Kune Israeele baalanti atewa higganno gede asseemmo; baalunku ate mootimma baxanno; atino hasi'roottore baala afi'ratto; gobbano gudisse gashshatto» yiisi. Daawitino Abeneeri keerunni ha'ranno gede assisi.

²²Shiima yanna gedensaanni, Iyoaabinna wolootu Daawiti ledo gashshaano horrite abbidhinore baala anga adhite oluwiinni higgu. Abeneeri kayinni Daawiti keerunni ha'riseennasi ha're noo daafira insa dagganno woyite isi Kebirooni dino.

²³Iyoaabinna ledosi noo gaaddo baala dagguta, «Abeneeri mootenniwa dayenna keerunni ha'risinosi» yine Iyoaabira kullisi.

²⁴Iyoaabino mootenniwa mare, «Kuni assittohu maati? Abeneeri dayinoha mayira agurteenna ha'ri?

²⁵Abeneeri dogahera, olantokki e'annowanna fultannowa afara, assattore baala buuxara dayinota diafootto?» yiisi.

²⁶Iyoaabi Daawitiwiinni kae ha're, Abeneeri hoode manna soyi; insano iso hordoffe Siira Buicho mulinni qoltu. Daawiti kayinni tenne diafino.

²⁷Abeneeri galagale Kebirooni higita, Iyoaabi amaalete hasi'rinoha lawe huxxu waalchi widira qole haa're masse, rodiisi Asaheeli rabbara godowa qase shii.

²⁸Gedensaanni Daawiti konne coye macciishshe, «Abeneeri reyora aninna gobba'ya manni karsammoommokkita Kaaliiqi afino.

²⁹Tini mundee Iyoaabinna minesi hasso. Siimu dhibbi, woy taraawannohu gogu dhibbi woy naafimma woy shaanno bagadi woy hude minesi hanqatoonke» yii.

³⁰Iyoaabinna rodiisi Abishayi Gebaooni oliwa rodoonsa Asaheeli shiino daafira Abeneeri kunni garinni shite rabbissino.

³¹Daawiti, Iyoaabinna ledosi noo manni baalu uddanonsa dare, xiddu uddano uddi're Abeneerira wi'lanno gede hajaji. Moote Daawitino reeshsha geegiisse ledo ha'ri.

³²Abeneeri massine Kebirooni madaarri. Mooteno qoonqosi naggi asse Abeneeri waamma mule wi'li; mannu baaluno wi'li.

³³Moote Daawiti Abeneerira kule wi'lanni, «Abeneeri hiitto gowwu gede ikke reyanno?

³⁴Anga diusurroonnisi; lekka dikuttumboonnisi; bushu manni shiinohu gede ikke reyihu mayiraatiyya?» yii. Mannu baaluno lede wi'li.

³⁵Daawiti sagale itanno gede mannu barra wo'ma huuccisi. Isi kayinni, «Arrishsho e'ukkinni mittoreno afooho wodhummoro Kaaliiqi afoe» yee xaari.

³⁶Kuni coyi manna baala hagiirsiisino. Isi assannori baalu wo'manka woyite hagiirsiisannonsa.

³⁷Hakko barra, Daawiti manninna Israeele baala Abeneeri reyora Daawiti anga karsantinokkita affu.

³⁸Daawitino, «Techo Israeelete giddonni jawu ayirradu manchi reyinota diaffinoonni?

³⁹Kaaliiqi doore buurino moote ikkummorono, ani techo jawaata di"ikkoommo. Kuri Tseruya ooso anera wolqissinoe; assitino bunshera insa Kaaliiqi qorichishonsa» yii.