Read Sidama_Qullaawa _Maxaafa LAYINKI SAAMUEELI 7 Bible Online

LAYINKI SAAMUEELI 7 - Sidama_Qullaawa _Maxaafa bible

LAYINKI SAAMUEELI 7

¹Kaaliiqi diinisi baaluwiinni agarinosi daafira, Moote Daawiti mootimmasi mine harshammi yee keere hee'ri.

²Mitto barra Daawiti himanaanchu Naataanira, «Kune ani daguwunni minnoonni minira noommo. Maganunnihu Gondooru Taabooti kayinni dukkanu giddo no!» yii.

³Naataanino daware, «Kaaliiqi ate ledo noona, wodanikkinni hedoottore baala assi» yiisi.

⁴Hakko hashsha kayinni Kaaliiqi Naataanira,

⁵«Marte soqqamaanchi'ya Daawitira, ‹Ani hee'reemmoha Qullaawa Mine ati diminattoe.

⁶Israeelete manna Gibitsetenni gatise fushshummo warinni kayise xaa geeshsha, dukkanu giddo galanni dargunni darga sa"anni hee'roommo ikkinnina mine dihee'roommo;

⁷Israeelete manni ledo ha'rummo yanna baalantera manni'yara allaalaasine asse woroommo albisooti giddonni mittuno daguwunni mine minaera dixa'mi'roommo.›

⁸«Kunnira xaano soqqamaanchi'ya Daawitira, ‹Olantote Mootichi Kaaliiqi, ate ge'reewo allaaltanni noottoha manni'ya Israeelete albisa ikkatto gede haa'roommohe.

⁹Ha'rittowa baala ate ledo noommo; alba higge ha'ritto bikkinni diinakki baala qeeloommohe. Kunni ka'ano baattote aana egennantino jajjabbi gede maccaha asseemmohe.

¹⁰Manni'yara Israeelete mitto darga doore hakkiicho heedhanno gede assoommo. Hakko heedhannowa kunni ka'a gadagu diamadannonsa. Kawiira daggeenna gashshitannonsare worummonsahunni kayisse, haxawarra gosa yanna yannantenni qassinonsa. Kunni ka'a kayinni hattoori di"ikkanno. Diinikkiwiinnni agarammoheranna minekkino kaajjishe ragidhannohe ilano eemmohe gede coyi'roommo.

¹²Dirikki goofeenna annuwakkinni xaadatto yannara, ate giddonni fulannoha mitto kayise moohisiiseemmo; gashshootesino jawaachisheemmo.

¹³Mine'yano isi minanno; gashshootesino muramannokki gede geedonniha asseemmo.

¹⁴Ani anna ikkeemmosi; isino beetto ikkannoe. So'ro assanno woyite annu beettosi seejjannonte gede seejjeemmosi.

¹⁵Ikkollana isi darga ate moohisate haa're hoolummosiha Saaooli assummo gede asse bagamannokkiha baxille'ya isiwiinni difafiseemmo.

¹⁶Aye yannarano sirchikki giddonni gashshootekki ragi'rannohu dihooganno; qoleno gashshootekki geedonniha asseemmo› yiino yite kulisi» yii.

¹⁷Kunni garinni Naataani Kaaliiqi xawisinosire Daawitira kulisi.

¹⁸Hakkunni gedensaanni Moote Daawiti e"e Dukkanu giddo Kaaliiqi albaanni ofolle, «Kaaliiqa Mooticha'ya, kawiira iillishittoehu ani ayeti? Maate'yano hiittenneeti?

¹⁹Kaaliiqa Mooticha'ya, xaano hakkiinni sainore assitanni nootto. Kunni ka'a daggara nootera ilama'yarano lowo hexxo ootto; Kaaliiqa Mooticha'ya, hada ati mannaho kageeshshire assatto?

²⁰Kaaliiqa Mooticha'ya, ati ane soqqamaanchokki egennootto. Kunninni sae ani hige ma coyi'reemmo?

²¹Coyi'rootto qaali daafiranna hedootto hedo garinni konne jawa coye assite, ane soqqamaanchikkira leellishootto.

²²Kunnira Kaaliiqa Mooticha'ya, ati jawaho; ate gedeehu dino. Maccankenni macciishshinummonte gede ate agurranna wolu Magani nookkita anfoommo.

²³Ateta assidhe Gibitsete borojjimmanni gatisse fushshoottoti Israeelete gedee gosa mama no? Wole daga shorrite dhaggenna maalale assite mannikki hee'ranno gede baattonsanni magannansa baala guddeenna su'mikki ayirrinsanniha ikkino.

²⁴Mannakki Israeeleno hegerera atere assi'rootto. Mooticha, atino Maganonsa ikkootto.

²⁵«Xaano Kaaliiqa Magano'ya, albillittete yanna baalantera aneranna maate'yara yoottore wonshi.

²⁶Su'mikki hegere geeshsha ayirrado ikkanno. Mannuno, ‹Olantote Mootichi Kaaliiqi Israeelete Maganooti› yaanno. Gashshoote'yano geedonniha assatto.

²⁷Israeelete Magano Olantote Mooticha, ane soqqamaanchikkira konne coye baala xawisoottoe daafiranna sircho'yano moohisattota kuloottoe daafira, tenne galatu huuccatto atewa shiqishi'ra dandoommo.

²⁸«Kaaliiqa Mooticha'ya, ati Magano ikkootto daafira, coyi'rootto qaale wonshatto; xaano ledde tenne dhaggete hexxo anera oottoe.

²⁹Kaaliiqa Mooticha'ya, gaacheena afidhanno gede maate'ya maassi'rattora huucci'reemmohe. Hexxono oottoena, maassokki maate'yara hegere geeshsha ikkitanno» yii.