Read Sidama_Qullaawa _Maxaafa UMI MOOTOOLLA 10 Bible Online

UMI MOOTOOLLA 10 - Sidama_Qullaawa _Maxaafa bible

UMI MOOTOOLLA 10

¹Saaba mootitte Kaaliiqi Selemoonira maala'linanni egenno uyinota macciishshitu. Kunnira lowo geeshsha qarrissanno xa'monni fonqolte la'asira Yerusaalame hadhu.

²Lowo manni dukkiseennase gaallate shitto, ayirrado ilkanna lowo culka hogobbe hadhu. Selemooni ledo xaadde wodanisenni heddinore baala xa'mitusi.

³Isino xa'mitinosi xa'mo baala qoli. Dawarinokkitinna go'litinositi mitte xa'mono dino.

⁴Saaba mootitte Selemooni hayyo maccasenni macciishshitu. Mi'ninoha mootete mineno la'u.

⁵Selemooni mini sagale, ledosi gashshaano galtanno minna, mootete mini loosaasine qixxaabbino garanna uddidhino imaana, angannire shiqinshannire, jilaho soqqantannorenna Kaaliiqihu Qullaawu Minira shiqinshanni kakkalo baala la'u. Konne baala la'e dhaggeeffattino daafira yitannori baise.

⁶Moote Selemooni, «Loosootto loosinna egennokki daafira gobba'yara hee're macciishshoomma coyi addaho!

⁷Daye illetenni la"amma geeshsha kulloonniere diammanoomma. Macca'yanni macciishshoommahu xa ille'yanni laummahu darate nafa di"ikkino. Egennokkinna jirokki gobba'yara hee'reenna kulloonnietenni lowo geeshsha roorete.

⁸Mulekki hee're hayyonniha hasaawakki macciishshannohu mannikkinna ledokki gashshaano ba'raadhinoreeti!

⁹Maganikki Kaaliiqi galatamo! Isi ate doore Israeelete moote assasinni atenni hagiidhinota leellishino. Israeelete noosihu baxillu hegereha ikkino daafira, taalonna halaale agaratto gede ate Israeelete moote assinohe» yitu.

¹⁰Saaba mootitte massitinosi afansha baala Selemoonira uyitusi. Culka 4,000 kiilo roorannoha, lowo geeshsha bati'ra shittonna dilqa kincho massitinosi. Ise uyitinosi shitto hakkunni gedensaanni massinoonnisi shitto baalatenni lowo geeshsha roorete.

¹¹Ofeerinni culka abbituti Kiraami markabba hakkiichinni Ofeerinni lowo sandale, haqqenna ayirrado ilka abbitinosi.

¹²Selemooni hattenne sandalete haqqenni Qullaawa Minenna mootete mine irki'ne ofollinannire, bagananna maasinqo seekki. Kuni haqqino Israeelete gobbanni abbinoonni haqqi baalunkunni rooranno. Hakkunni gedensaanni hattoo haqqe Israeelete anfe diegenninoonni.

¹³Moote Selemooni isi umisi afe uyinose afanshi gobbaanni Saaba mootitte xa'midhinore baala uyinose. Hakkunni gedensaanni Saaba mootitte dukkisinose manni ledo galagalte gobbase higgu.

¹⁴Moote Selemooni diru dirunkunni 23,000 kiilo ikkanno culka afi'ranno.

¹⁵Konne afi'rannohu daddalaasine boocce uyitannoha, daddalunni lexxannohanna Arabete mootoollawiinninna Israeelete gashshooti giddonni daanno giwire agurrannaati.

¹⁶Moote Selemooni 200 jajjabba wonqo seekkisiise mitte mittentera lamala lamala kiilo culka xallisiisi.

¹⁷Hattonni 300 manaadda wonqo seekkisiise, mitte mittentera lame lame kiilo culka xallino. Tenne wonqo baala, Libaanoosi Dubbi Hari giddo worino.

¹⁸Qoleno Moote Selemooni daaniichu hinkonni mitto ayirrado barcima seekkisiise aanaho fila culka xallisiisino.

¹⁹Ayirradu barcimiwa marrannihu 6 dirimi no. Ayirradu barcimi umo qunqumadoho. Ayirradu barcimi lamenta anga irkisi'nanniwa afi'rino. Lamenka widoonni mitte mitte doobbiichu misile no.

²⁰Ayirradu barcimi lamenka widoonni lee lee dirima afi'rino. Mittu mittunkura doobbiichu misile no. Mitteenni 12 misileeti. Hattoo barcimi wole mitte gobbarano dino.

²¹Selemooni yannara, birra woximma kiirrannikki daafira, Selemooni mitore aganno uduunne baalanna, Libaanoosi Dubbi Hari giddo noo uduunne wo'manka filu culkinni ikkinnina birrunni diseekkinoonni.

²²Selemoonira Kiraami markabba ledo lowo baari aana ha'ra dandiitanno markabbano noosi. Tinino sayikki sayikki dirinni culka, birra, daaniichu hinko, qamalenna galado haadhe abbitannosi.

²³Moote Selemooni jirotenninna egennotenni baattote aana noo mootoolla baala rooreho.

²⁴Gobba baalate hee'ranno manni Maganu uyinosiha hayyote hasaawa macciishshate isiwa daa halchanno.

²⁵Isiwa daannohu baalu diru dirunkunni birranna culka, imaana, olu bagado, shitto, faradonna gaangoota haa're abbannosi.

²⁶Selemooni 1,400 faradi gaarenna 12,000 farado gamba assi'ri. Gama isiwa Yerusaalamete, gama qole wole katammara hee'ranno gede assi.

²⁷Selemooni yannara Yerusaalamete birra kinchimma, Libaanoosi daguwa Yihudu gaarra hundanna base baalate fultino odahe gede assine kiirranni.

²⁸Selemooni daddalaasine farado Gibitsetenninna[7] Qewenni[8] woxunni hirte abbitanno. Kunni daddalira insa calluwu annattanno.

²⁹Daddalaasine faradi gaare Gibitsetenni abbite Hitootunna Sooriyu mootoollara hirtanno. Mitte mitte faradi gaare 600 kinchu birrira, mitto mitto farashsho qolte 150 kinchu birrira hirtanno.