Read Sidama_Qullaawa _Maxaafa UMI MOOTOOLLA 13 Bible Online

UMI MOOTOOLLA 13 - Sidama_Qullaawa _Maxaafa bible

UMI MOOTOOLLA 13

¹Iyorbiaami kakkalara kakkalote darga uurre hee'reenna, mittu Kaaliiqi soyinohu Maganu manchi Yihudunni kae Beeteli dayi.

²Isino Kaaliiqi hajajinosi garinni hakkonne kakkalote darga dannisanni, «Kakkalote darga! Kakkalote darga! Kaaliiqi, ‹Kune Daawiti mine Iyosiyaasi yinanni beetti ilamanno. Isino gaarrate aana seekkinoonnitera kakkalote darguwara kakkaltanno qeesoota abbe ate aana gorranno. Miqqansano ate aana giiranno.

³Kuni kakkalote uduunnichi hiiqqaqqame uwanno. Aanasi noo buluulino billaallanno. Konne himana ane widoonni qole coyi'rinohu Kaaliiqa ikkinota kuni coyi ikkanno woyite afatto› yiino» yii.

⁴Moote Iyorbiaami hakkonne coye macciishshi yannara, kakkalote darga hee're anga Maganu manchi widira qole, «Amadde!» yee hajaji. Angasi kayinni dargase higgukkinni hakko diriirtinowa moolte gattu.

⁵Maganu manchi coyi'rinohu Kaaliiqi qaali garinni kakkalote uduunnichi hakkawoyintenni hiiqqaqqame uwi; buluuluno uulla du'nami.

⁶Iyorbiaami Maganu mancho, «Anga'ya darga higgannoe gede Maganokki Kaaliiqa huuccie» yiisi. Maganu manchino Kaaliiqa huucceennasi angasi darga higge albi gedeeta ikkitusi.

⁷Hakkunni gedensaanni moote Maganu manchira, «Amo ane ledo minira ha'neenna mitore afooho wodhattona; afanshano eemmohena» yiisi.

⁸Maganu manchi kayinni, «Jirokkinni taaloote badde uyiteennae nafa ledokki diha'reemmo; sagaleno di"iteemmo; waano diageemmo.

⁹Kaaliiqi, sagale iteemmokki gede, waano ageemmokki gedenna dayommo doogo higeno ha'reemmokki gede hajajinoe» yee qolisi.

¹⁰Kunnira Beeteli dayino doogo agure wole doogo hige ha'ri.

¹¹Hatte yannara Beeteli hee'rannohu mittu himanaanchu geerchi no. Oososi hakko barra marte Yihudunni dayinohu Maganu manchi assinorenna Iyorbiaamira coyi'rinore baala kultusi.

¹²Anninsano, «Hakku Maganu manchi hiittenne doogo hige ha'riyya?» yee xa'minsa. Insano ha'rino doogo leellishshusi.

¹³Hakkunni gedensaanni oososi, «Harricho koorre"e» yii. Insano harricho koorteennasi gulufe,

¹⁴hattenne doogo amade Yihudunni dayinoha Maganu mancho hordofe, mitte odakkora caa'le hee'reenna iille, «Yihudunni dayottohu Maganu manchi ateetini?» yee xa'misi. Isino, «Ee aneeti» yee dawari.

¹⁵Geerchuno, «Mini'yara ha'neenna sagale itattona kai» yiisi.

¹⁶Maganu manchino daware, «Ate ledo galagale hige diafeemmo. Hakko mare sagale ita woy waa aga didandeemmo.

¹⁷Kaaliiqi, ‹Konniicho sagale iteemmokki gede waano ageemmokki gedenna dayommo doogo hige ha'reemmokki gede› hajajinoe» yiisi.

¹⁸Geerchu qole, «Anino atente gede himanaanchoho. Kaaliiqi sokkaasinchi mini'yara masse sagalenna waa eemmohe gede kulinoe» yiisi. Yihudunni dayino himanaanchi geerchu doginosita diafino.

¹⁹Kunnira isi ledo ha're minesi sagale ite, waano agi.

²⁰Sagale ittanni heedheenna Kaaliiqi geerchu himanaanchi widoonni qole,

²¹Yihudunni dayinohura Maganu manchira, «Ani Maganikki Kaaliiqi yoommore mishshe hajajo'ya ayirrisa giwootto.

²²Galagalte higge hooloommohe basera sagale itte waano agootto. Kunnira reyiteenna reeshshakki annuwakki waammawa dimadaarranni» yee naggi yitino qoonqonni kulannasi coyi'ri.

²³Itte agge ka'uhu gedensaanni geerchu Yihudunni dayino himanaanchira harricho koorisi.

²⁴Isino harricho gulufe ha'ranni hee'reenna doogote doobbiichu amade shiisi. Reeshshu doogote aana diriireenna doobbiichunna harrichu reeshshu mule uurrite no.

²⁵Hakkaanni hige sa"anno manni doogote diriire noo reeshshanna mule uurre noo doobbiicho lai. Konne coyeno geerchu himanaanchi noowa Beeteli marte hasaabbu.

²⁶Geerchuno konne coye macciishshe, «Hakku manchi Kaaliiqi hajajo giwi himanaanchooti. Kunnira Kaaliiqi shaanno doobbiichira sayise uyinosi» yii.

²⁷Hakkunni gedensaanni geerchu oososi, «Harricho koorre"e» yii. Insano koorteennasi,

²⁸harricho gulufe ha'ri. Mare iillanno woyite reeshshu doogote diriireenna harrichunna doobbiichu mule uurrite no. Doobbiichu reeshsha di"itino; harrichono dikisino.

²⁹Geerchu Maganu manchi reeshsha kayise harrichoho hogowe, wi'lasiranna madaarasira haa're Beeteli abbi.

³⁰Reeshshano masse minisi mannira qixxeessi'rino waammara madaari. Insano, «Rodoonke! Rodoonke!» yitanni wi'litusi.

³¹Madaarshu gedensaanni geerchu oososira, «Ani reemmo waro, konne Maganu manchi waammara madaarre"e.

³²Maganu manchi Beeteli kakkalote darginna Samaariyu katammara galmuwate ledo noo gaarra magansi'nannite daafira Kaaliiqi kulinosi himani addinta wo'manno» yii.

³³Kuni baalu ikkanni hee'reennanni Iyorbiaami kayinni bunshesi diagurino. Gaarrate aana nootera kakkalote darguwara Leewi sircho ikkinokki mannano worino. Qeese ikkara hasi'rannoha baala gaarrate aana soqqamanno gede sammi yee worino.

³⁴Iyorbiaami gashshooti baattote aaninni co'o yee ba"anno gede assino cubbi konneeti.