Read Sidama_Qullaawa _Maxaafa UMI MOOTOOLLA 14 Bible Online

UMI MOOTOOLLA 14 - Sidama_Qullaawa _Maxaafa bible

UMI MOOTOOLLA 14

¹Hatte yannara Iyorbiaami beetti Abiya dhiwame no.

²Kunnira Iyorbiaami galtesi, «Ane galte ikkakki ayino afannokki gede uddanokki soorridhe wole labbe Israeelete mooheemmota kulie himanaanchiwa Akiyawa Seelo mari.

³Tonne buddeencho, shiimmaadda timmanna mitto gambayicho malawo haadhe massisi. Qaaqqu ikkannore isi kulannohena» yiise.

⁴Iyorbiaami galte isi kulinosere baala haadhe Seelo hee'rannohuwa Akiyawa hadhu. Akiya geedhino daafira illeno afa gibbe noosi.

⁵Ikkollana Iyorbiaami galte qaaqqise dhibbire xa'midhara isenee maaxxe wole labbe daggannotanna isino ma qola hasiissannosiro Kaaliiqi balaxe kulinosi.

⁶Kunnira Akiya, ise dagge xullo iillituta hirbase macciishshe, «Ei! Iyorbiaami galte ikkoottata afoommo. Wole lawate mayira wo'naalitta? Atera busha duduwo kulammohera hajanjoonnie.

⁷Hadhe Iyorbiaamira Israeelete Magani Kaaliiqi, ‹Manni'ya giddonni doore manni'yara Israeelete gashshaancho assoommohe.

⁸Gashshooteno Daawiti mininni dare atera oommohe. Ati kayinni co'o yiino wodaninni hajajo'ya agadhinohunna ani baxeemmo coye assinohu soqqamaanchi'ya Daawiti gedeeha di"ikkootto.

⁹Atera albaanni gashshitino gashshaanohunni saino cubbo loosootto. Ane facci assite agurte insa magansi'rate kaphu magannanna siwiilu misilla qixxeessidhe hanqisoottoe.

¹⁰« ‹Kunni daafira minikkira busha coye abbeemmo. Qataanyunnitinna irkote galte iltinota labballi ooso baala Israeelete giddonni gudeemmo. Iyorbiaami sircho ishinu gede co'o asse huneemmo.

¹¹Katamaho reyannoha Iyorbiaami mini manna baala woshshu itanno. Xawoho reyannoha doowiru itanno. Konne coye coyi'roommohu ani Kaaliiqaati› yiino yite kulisi» yii.

¹²Akiya lede, «Xa ati ka'e minikkira ha'ri. Marte katama iillitanni heedheennanni qaaqqu reyanno.

¹³Israeele baalanti wi'lite madaartannosi. Iyorbiaami mini manni giddonni Israeelete Magani Kaaliiqi hagiidhinohu iso calla ikkino daafira, garunni madaaramannohuno iso callaati.

¹⁴Kaaliiqi Iyorbiaami mine gude Israeelete moohannoha techonni kayisanno. Hakkuno xaati.

¹⁵Kaaliiqi Israeele qorichishanno. Mannuno wayi giddo noo haqali gede leqe leqe yaanno. Asheera yinannita kaphu magano seekkidhe Kaaliiqa hanqissinosi. Kunnira, akaakkansara uyinotenni danchanna shaqqado baattonni buqqise Efiraaxisi Wayira widoonni fushshe billaallisannonsa.

¹⁶Iyorbiaami cubbo loose Israeeleno cubbu giddora eessino daafira Kaaliiqi Israeele aguranno» yii.

¹⁷Iyorbiaami galte Tiritsa Katama iillite minisera e'anni heedheennanni qaaqqu reyi.

¹⁸Kaaliiqi soqqamaanchisi himanaanchu Akiya widoonni coyi'rino garinni Israeelete manni baalunku wi'le madaarisi.

¹⁹Iyorbiaami assinohu wolu coyi baalu, olamino olinna gashshino gari Israeelete mootoolla dhagge borreessinoonni maxaafi giddo no.

²⁰Iyorbiaami 22 diro moohihu gedensaanni annuwasinte gede reenna madaarroonnisi. Isi darga beettisi Naadaabi moohino.

²¹Moote Selemooni beetti Roobiaami Yihudaho moohi yannara dirisi shoyilliina mittoho. Isino Kaaliiqi magansi'nasira doodhino darga Yerusaalame teesso assi're 17 diro gashshino. Amasi Amoonittete; su'maseno Naima yinanni.

²²Yihudu manni Kaaliiqi giwanno coye assi. Akaakkansa assitinohunni roore bunshe loose Kaaliiqa hanqisi.

²³Wole gobba maganna magansi'nanni darga seekkidhu. Gaarrate aananna sinnaame haqqe hunda magansidhanno sooddiyyenna Asheera mokkollo uurrisidhu.

²⁴Hakkiinni sa'ino bunshe loosatenni magansidhanno darga foortannori no. Insawa gamba yaanni ha'ri deerrinni, Yihudu manni Kaaliiqi albinsanni fushshe shorrino daga assitannoha saalsiisanno coye assino.

²⁵Roobiaami moohihunni ontikki diro, Gibitsete moote Shishaaqi Yerusaalamete bala tugi.

²⁶Qullaawa Minenna mootete mine noo jajja baala, Selemooni culkunni seekkisiisino wonquwa nafa gattukkinni baalankare adhe ha'ri.

²⁷Moote Roobiaami kunni uduunni darga wonqo camotenni seekkisiise annimma mootete mini agaraasinera ee towattanno gede assi.

²⁸Moote Qullaawu Minira daanno kiiro, Qullaawu Mini agaraasine wonqo amaxxite haadhannosi. Isi ha'rihu gedensaanni galagalchite agaraasinete mine wortanno.

²⁹Moote Roobiaami assinohu wolu coyi baalu, Yihudu mootoolla dhagge borreessinoonni maxaafi giddo no.

³⁰Hatte yanna baalantera Roobiaaminna Iyorbiaami mimmitu ledo olantanni heedhino.

³¹Roobiaami annuwasinte gede reenna ahaahisi Daawiti Katamira mootete waammara madaarroonnisi. Isi darga Amoonitte Naima iltinohu beettisi Abiya moohino.