Read Sidama_Qullaawa _Maxaafa UMI MOOTOOLLA 15 Bible Online

UMI MOOTOOLLA 15 - Sidama_Qullaawa _Maxaafa bible

UMI MOOTOOLLA 15

¹Naabaaxi beetti Iyorbiaami Israeelete moohihunni tonaa settikki diro, Abiya qole Yihudaho moohi.

²Abiya Yerusaalame teesso assi're Yihuda 3 diro gashshino. Maaka yinanniti amasi Abeseloomi beettooti.

³Abiyano annisinte gede cubbo loosino. Awurisi Daawiti gede ikke co'o yiino wodaninni Maganisi Kaaliiqira diammanamino.

⁴Ikkollana Daawitira caabbichu xoannokki gede Maganisi Kaaliiqi Yerusaalamete moohanno gedenna Yerusaalame agaranno gede mitto labbaa beetto uyinosi.

⁵Kaaliiqi hatto assinohu Daawiti Hitichu Ooriyooni aana loosino cubbo agurranna lubbotenni noo geeshsha isi baxanno coye assino daafiraatinna hajajosino seekke agadhinohuraati.

⁶Abiya lubbotenni hee'ri geeshsha Roobiaaminna Iyorbiaami mereero kalaqamino oli diuurrino.

⁷Abiya assinohu wolu coyi baalu Yihudu mootoolla dhagge borreessinoonni maxaafi giddo no. Abiyanna Iyorbiaami mereerono olu no.

⁸Hakkunni gedensaanni Abiya annuwasinte gede reenna Daawiti Katamira madaarroonnisi. Isi darga beettisi Aasa moohino.

⁹Iyorbiaami Israeelete moohihunni lemiikki diro Aasa Yihudaho moohi.

¹⁰Isino Yerusaalame teesso assi're 41 diro gashshino. Ahaahesi Maaka Abeseloomi beettooti.

¹¹Aasa awutuuttisi Daawiti assinte gede Kaaliiqi baxanno looso loosino.

¹²Akaakkasi seekkitino misillanna magansi'nanni darga foortannore baala baattote aaninni gudino.

¹³Ahaahesi Maaka Asheera maganota tiyyi'nanni misile seekkisiisidhino daafira mootimmatenni hoolinose. Seekkidhino misileno hiiqqaqqe Qedirooni Lagira masse giire hunino.

¹⁴Aasa lubbotenni hee'ri geeshsha, co'o yiino wodaninni Kaaliiqira ammaname hee'rino. Ikkollana gaarrate iima noota dagate maganna magansi'nanniwa didiigino.

¹⁵Annisi Kaaliiqi minira uyinohanna isi umisi xa'ninoha culkunninna birrunni seekkinoonni uduunne baala abbe Qullaawa Mine worino.

¹⁶Aasanna Israeelete moote Baasha gashshite noo yanna baalantera, mimmitu ledo olantanni heedhino.

¹⁷Moote Baasha Yihuda horrara yee, mannu ka'a kawa ha'ramannokki gede Raama qiisho qiishi'ri.

¹⁸Kunnira, Aasa Qullaawa Minenna mootete mine nooha culkanna birra baala fushshe Hezooni ahaaho ikkannohura Demaasiqote mootera Xabiriimi beettira Benihadaadira afansha asse ledosi gashshaanora soye,

¹⁹«Kunni albaanni annikkinna anni'ya assitunte gede aninna atino mimmitoho gondooro e'no; kuni birrunna culkuno atera soommohe afanshaati. Israeelete moote Baasha olanto gobba'yanni qase fushshate kaa'lattoe gede isi ledo namooma agurattora huucci'reemmohe» yii.

²⁰Benihadaadi Aasa yiino coyira sumuu yee, olantosi Israeelete katammara bala tugganno gede soyi. Insano marte Iyooni, Daani, Abeeli-Beeti-Maakanna Galiilu Baari mule noota Nifitaalemi baatto baala amaddu.

²¹Baashano konne coye macciishshe, Raama qiisho qiisha agure galagale Tiritsa ha'ri.

²²Hakkunni gedensaanni, moote Aasa Yihudu manni mittuno gatikkinni fule Baasha, Raama qiisho qiishi'rara gamba assi'rino kinnanna haqqe hakkiinni kayisate kaa'lannosi gede hajaji. Hakkiichinni gamba assinoonni kinnanna haqqe masse Biiniyaami gobbara nootera Mitsiphanna Geeba katammara qiisho qiishi'ri.

²³Moote Aasa assinohu wolu coyi baalu, bareendesinna qiishi'rino katamma baala Yihudu mootoolla dhagge amadino maxaafi giddo borreessineenna no. Geedhimmasi yannara kayinni lekka dhiwame naaficha ikkino.

²⁴Hakkunni gedensaanni annuwasinte gede reenna awutuuttisi Daawiti Katamira nootera mootoollate waammara madaarroonnisi. Isi darga beettisi Iyosaafiixi moohi.

²⁵Aasa Yihudaho moohihunni layinki diro, Iyorbiaami beetti Naadaabi Israeelete moohe 2 diro gashshino.

²⁶Isino annisi Iyorbiaami gede Kaaliiqi giwanno coye asse Israeele cubbu giddora eessino.

²⁷Yisaakoori ga'rehu Akiya beetti Baasha gano gane Naadaabi shii. Hatte yannara, Naadaabinna olantosi Filisxeemete gobbara nooha Gibetooni Katama doyissite amadde no.

²⁸Kuni ikkinohu Aasa Yihudaho moohihunni sayikki dirooti. Baashano Naadaabi darga amade Israeelete moohi.

²⁹Isino moohanni hee'renninni Iyorbiaami mini manna baala shee gudi. Kaaliiqi Seelo hee'rannohu soqqamaanchisi himanaanchu Akiya widoonni qole coyi'rino garinni, Iyorbiaami mini manna baala shine gundi. Gatinohu mittuno dino.

³⁰Kuni coyi ikkinohu, Iyorbiaami cubbo loose Israeelete mannano cubbu giddora eesse Israeelete Magano Kaaliiqa hanqisino daafiraati.

³¹Naadaabi assinohu wolu coyi baalu Israeelete mootoolla dhagge amadino maxaafira borreessineenna no.

³²Yihudu moote Aasanna Israeelete moote Baasha gashshite noo yanna baalantenni mimmitu ledo olantanni heedhino.

³³Aasa Yihudaho moohihunni sayikki diro, Akiya beetti Baasha Tiritsa Katama teesso assi're Israeele 24 diro gashshino.

³⁴Baashano Israeelete manna cubbu giddora eessinohu Iyorbiaami ha'rino doogo ha're, Kaaliiqi giwanno coye assino.