Read Sidama_Qullaawa _Maxaafa UMI MOOTOOLLA 18 Bible Online

UMI MOOTOOLLA 18 - Sidama_Qullaawa _Maxaafa bible

UMI MOOTOOLLA 18

¹Moolle ubbuhunni sayikki diro Kaaliiqi Eeliyaasi, «Ani baattote aana xeena dirriseemmona, marte moote Akiaabira leelli» yee coyi'ri.

²Eeliyaasino Akiaabira leellara fule ha'ri. Hatte yannara Samaariyaho hude lowo geeshsha batidhe no.

³Moote Akiaabino mootete mini roorricha Abidiyu woshshi. (Abidiyu Kaaliiqa lowo geeshsha waajjanno manchooti.

⁴Elzaabeeli Maganu himanaano shiishiishshu yannara Abidiyu, 100 himanaano 50, 50 asse lamewa beehe godu giddo maaxe sagalenna waa aanni towatinonsa.)

⁵Akiaabi Abidiyura, «Faradunna gaangootu reyannokki gede hayisso anfa ikka? Hanni xashshunna lagu noowa marte lai. Guma gede saada reyotenni gatisi'neemmoha ikkannona» yiisi.

⁶Hadhanno raga ma'lituhu gedensaanni, Akiaabi wole raga, Abidiyuno wole raga hige ha'ri.

⁷Abidiyu ha'ranni hee're hedeweelcho doogote Eeliyaasinni xaadi. Eeliyaasi ikkinota buuxihu gedensaanni, umo heeshshi yee baatto kise keere haa're, «Mooticha'ya Eeliyaasi! Halaalintanni isi kuni ateenti?» yii.

⁸Eeliyaasino, «Ee aneetina, marte mootichikkira konniicho noommota kulisi» yii.

⁹Abidiyuno, «Ani soqqamaanchikki ma"asseenna Moote Akiaabi shaannoe gede assattoe?

¹⁰Heeshshote Kaaliiqi Maganikki afanna, moote ate hasate manna soyinokkiti mitte gobbano dino. Gobba gashshinohu baalu ati hakkiicho noottokkita xaare kulannosi gede xa'mi'rino.

¹¹Ati kayinni, ‹Eeliyaasi konniicho no› yite kuli yitanni noottoe.

¹²Ani kawiichinni ka"anni hee'reennanni ate Maganu Ayyaani anfannikkiwa haa're ha'rihero ani hiikka higeemmo? Akiaabira konniicho noottota kuleenna daye ate hooganno woyite ane shaannoe. Ani anje'yanni kayise Kaaliiqa waajjeemmoha ikkoommota ati egennootto.

¹³Elzaabeeli Kaaliiqi himanaano shiishiishshu waro, 100 himanaano 50, 50 asse lamewa beehe godu giddo maaxe sagalenna waa aanni towatoommota dimacciishshootto?

¹⁴Tenne affanni, ‹Eeliyaasi konniicho no› yee kulammora mayira soyattoe? Moote Akiaabi shaannoewe!» yii.

¹⁵Eeliyaasino, «Soqqameemmosihu Olantote Mootichi Kaaliiqi halaali afanna, techo ani moote Akiaabira leelleemmo» yee dawarisi.

¹⁶Hakkunni gedensaanni Abidiyu ha're Akiaabira kuli. Akiaabino Eeliyaasinni xaadara kae ha'ri.

¹⁷Akiaabi Eeliyaasi afe, «Israeelete lowo qarra kalaqittohu ati hada kawiicho nootto?» yii.

¹⁸Eeliyaasino, «Israeelete qarra ani dikalaqoommo. Kaaliiqi hajajo huntine Ba"aali magansi'ratenni qarra kalaqqinoonniri ateetinna annikki mineeti.

¹⁹Xa Israeelete manna baala Qermeloosi Ilaalira gamba yaanno gede assie. Mootitte Elzaabeeli itissanna heedhannore 450 Ba"aali himanaanonna 400 Asheera himanaanono haadhe abbi» yii.

²⁰Akiaabino Israeelete manninna himanaano baala Qermeloosi Ilaalira gamba yitanno gede hajaji.

²¹Eeliyaasino mannaho, «Lamu wodaninni dintinanni heedhinannihu mamooti geeshshaati? Kaaliiqi Maganohoro iso magansidhe! Woy Ba"aali Maganohoro Ba"aali magansidhe!» yiinsa. Mannu kayinni mitto qaaleno didawarino.

²²Eeliyaasi qole, «Kaaliiqi himanaano giddonni ani callu gatoommo. Ba"aalira kayinni 450 himanaano noosi.

²³Hanni 2 woraamma abbitineenna, mitto Ba"aali himanaano doodhite gorritona. Maalano murmurte haqqete aana dirtona; giira kayinni giirtoonke. Anino layinki woraamo haa're hatto asseemmo.

²⁴Hakkunni gedensaanni Ba"aali himanaano maganinsawa higge woxarattona. Anino Kaaliiqi su'ma woshshi'reemmo; giiratenni dawaro qolannohu, Magano hakku ikko» yii. Mannu baalunkuno, «Yootto coye banxoommo» yee coyi'ri.

²⁵Hakkunni gedensaanni Eeliyaasi Ba"aali himanaano, «Ki'ne kiiro haammattinoonni daafira balaxxine mitto woraamo doortine adhitine gorritine magano'ne huuccidhe. Haqqete woroonnilla giira giirtinoonte» yiinsa.

²⁶Insano abbinoonninsa booto gorrite, maalano biddi assite worte barru taalooti geeshsha Ba"aali huuccidhu. Qolteno, «Ba"aali! Eeggatena macciishshinke!» yitanni woxarattu. Kakkalote darga hechemmo kaddanni doyitu. Ikkollana mitte dawarono diafidhino.

²⁷Barru taalootira Eeliyaasi, «Qoonqo'ne naggi assitine huuccidhe! Isi dimaganoho? Wodanaho malannori bati'rinosihawe ikkanno. Woy fooliishshi're hee'ranno; woy doogo ha'rinoha ikkanno; woy goxe nooha ikkiro baqqi assesi» yaanni qacifatinsa.

²⁸Ba"aali himanaanono qoonqonsa naggi assite huuccidhanni, rossino garinni bisinsa mundaa geeshsha billawunninna cuwetenni madiissidhu.

²⁹Barru taalootino saeenna hawarro kakkalo shiqinshanni yanna geeshsha gajaffanni qurbaanyitu. Ikkollana mitte dawarono diafidhino, macciishshinonsahuno dino. Huurono dino.

³⁰Hakkunni gedensaanni Eeliyaasi manna, «Anewa shiqqe yiiyye!» yii. Baalunku isiwa shiqqi yiteenna diigame nooha Kaaliiqiha kakkalote darga biddi asse seekki.

³¹Hakkunnira albaanni Kaaliiqi, «Israeeli» yee fushshinohu tonaa lamunku Yaiqoobi ooso su'minni 12 kincho haa'ri.

³²Hattenne kinna dire Kaaliiqi su'minni kakkalote darga seekki. Kakkalote dargi gaangaawirano 14 litire waa haadhanno geeshshi bale umi.

³³Kakkalote darga haqqe dire, bootu maalano murmure haqqete aana wori. Hakkunni gedensaanni, «Shoolu gambayichira waa wonshitine abbitine kakkalotenna haqqete aana dunne!» yiinsa. Insano yiino gede assitu.

³⁴«Xaano ledde!» yiinsa. Insano yiino gede assitu. Xaano qole, «Leddine hatto asse!» yiinsa. Insano ledde yiino gede assitu.

³⁵Wayino kakkalote dargi gaangaawira du'nami; baleteno wo'mi.

³⁶Barru taalooti gedensaanni hawarro kakkalo shiqinshanni yanna iillituta, himanaanchu Eeliyaasi kakkallanni dargira shiqqi yee, «Abirihaami, Yisihaaqinna Yaiqoobi Magano Kaaliiqa! Ati Israeelete Magano ikkoottota, anino ate soqqamaancho ikkoommotanna kuni asseemmori baalu ate qaalinni ikkinota techo egensiisi.

³⁷Tini gosakki ati Kaaliiqi halaalaancho Magano ikkoottotanna atewa qoloottohu ate ikkoottota affanno gede eeggatena dawaro qolie» yaanni huucci'ri.

³⁸Hakkunni gedensaanni Kaaliiqiwiinni giira dirrite kakkalo, haqqe, kinnanna bushshano itte, balete giddo noo waano mooshshitu.

³⁹Mannuno konne coye lae baattote aana gombisame, «Kaaliiqi Maganoho! Halaalaanchu Magani iso callaati!» yii.

⁴⁰Eeliyaasino, «Ba"aali himanaano amadde! Mittuno gatoonke» yee hajaji. Mannuno himanaano gudise amadi. Eeliyaasino baalanka haa're masse Kiishooni Wayi eela gorrisiise gudi.

⁴¹Hakkunni gedensaanni Eeliyaasi Akiaabira, «Xaate hadhe mitore afooho wodhi. Ani xa wolqaataamu xeeni gugatto macciishshanni noommo» yiisi.

⁴²Akiaabi sagale itara ha'ranni hee'reenna, Eeliyaasi Qermeloosi Ilaali iimira fuli. Hakkiicho umosi lamunku guluchi qarrira wodhe heeshshi yii.

⁴³Soqqamaanchosino, «Hanni marte baaru widira higge lai!» yiisi. Soqqamaanchisino lae galagale hige, «Leellinoeri dino» yii. Eeliyaasino 7 hige mare la"anno gede hajajisi.

⁴⁴ Lamalki la"ara soqqamaanchisi, «Kune mannu anga geeshshihu shiimu gomichi baaru giddonni fulanni no» yiisi. Hakkunni gedensaanni Eeliyaasi soqqamaanchosi, «Marte Akiaabi, ‹Xeenu ha'ra ho'lannohekki gede rakke faradi gaarekki biddi assi'ri› yiinohe yite kulisi» yii.

⁴⁵Shiima yanna gedensaanni gordo kolishshu gomichi guggushshi. Bubbeno bubbisi; xeenano gani. Akiaabino faradi gaaresira ofolle Iyiziraeeli Katama ha'ri.

⁴⁶Kaaliiqi wolqano Eeliyaasi aanira daggu. Eeliyaasino uddanosi halloho duu're usudhe Iyiziraeeli hige Akiaabi balaxe albaanni hige dodanni ha'ri.