Read Sidama_Qullaawa _Maxaafa UMI MOOTOOLLA 19 Bible Online

UMI MOOTOOLLA 19 - Sidama_Qullaawa _Maxaafa bible

UMI MOOTOOLLA 19

¹Moote Akiaabi galtesira Elzaabeelira Eeliyaasi assinore baalanna Ba"aali himanaano asse gudino gara kulise.

²Iseno, «Ateno ga'a tenne yannara tenne himanaano assitto gede assa hoogummahero, aneno maganna shitoe» yite Eeliyaasira sokka sokku.

³Eeliyaasino waajjino daafira lubbosi gatisi'rate soqqamaanchisi ledo Bersaabehi yinanniha Yihudu katama xooqi. Soqqamaanchosino hakko agure,

⁴mitto barra wo'ma halallitte gobba hige ha're mare mittu ittanchu haqqi hunda ofolli. Reyo hasi're, «Kaaliiqa'ya! Xaate ikkinoe. Ani akaakka'ya dirooroommona lubbo'ya haa'ri» yaanni huucci'ri.

⁵Hakkunni gedensaanni haqqichote hunda haawinowa hee're goxe bai. Hedeweelcho sokkaasinchu daye kise, «Ka'e iti!» yiisi.

⁶Eeliyaasino kae wirri yee la"anno woyite, umaallosiinni raino timinna maaqqete wayi nooha afi. Itinna agihu gedensaanni galagale goxi.

⁷Kaaliiqi sokkaasinchi galagale daye, «Ha'rattoti doogo seedatena ka'e iti» yiisi.

⁸Isino kae sagale ite waano agi. Hattenne itino wolqanni Siina yinannihu Kaaliiqi ilaali geeshsha 40 barranna 40 hashsha wo'ma ha'ri.

⁹Hakkiichira iille mittu godi giddo e"e gali. Kaaliiqino hedeweelcho, «Eeliyaasi, konniicho ma"assitanni nootto?» yee xa'misi.

¹⁰Eeliyaasino, «Olantote Mooticha Kaaliiqa! Ane ate laala amaddinoe. Israeelete manni ate ledo eino gondooro hunino; kakkalote dargakkino diigino; himanaanokki baalano shee gudeenna kune ani callu gatoommo. Kune aneno shaaera hasanni nooe» yee dawari.

¹¹Kaaliiqino Eeliyaasi, «Noottowiinni fulte ilaalu birxera ane albaanni uurri» yiisi. Hakkunni gedensaanni Kaaliiqi mulesiinni hige sai. Lowo bubbe soye ilaalla daddari. Kinnano cancani. Kaaliiqi kayinni hattenne bubbe giddo dino. Bubbe uurrituhu gedensaanni, baatto huxidhu. Kaaliiqi baattote huxi'ra giddono dino.

¹²Baatto huxidhuhu gedensaanni giira daggu. Giirate giddono Kaaliiqi dino. Giirate gedensaanni shiima huuro no.

¹³Eeliyaasi tenne huuro macciishshe uddanotenni alba guggu'le godu giddonni fule xullichoho uurre, «Eeliyaasi konniicho ma"assitanni nootto» yitanno huuro macciishshi.

¹⁴Eeliyaasino, «Olantote Mooticha Kaaliiqa! Ane ate laala amaddinoe. Israeelete manni ate ledo eino gondooro hunino. Kakkalote dargakkino diigino. Himanaanokki baalano shee gudeenna kune ani callu gatoommo. Kune aneno shaaera hasanni nooe» yee dawari.

¹⁵Kaaliiqi Eeliyaasira, «Galagalte Demaasiqote mule noo gobba halallitte higi. Hakkiichira iillatto woyite Sooriyaho moohanno gede Azaheeli buuri.

¹⁶Nimishi beetto Iyuno buurte Israeelete moohanno gede assi. Abeeli-Mehola ilaminoha Saafaaxi beetto Elsai buurte ate darga amadanno gede assi.

¹⁷Azaheeli anganni gatannoha Iyu shaanno. Iyuwiinni gatannoha Elsai shaanno.

¹⁸Ikkollana Israeelete giddonni Ba"aalira kumbuultinokkirenna misilesi sunqitinokkire 7,000 manna gatisi'roommo» yiisi.

¹⁹Eeliyaasi hakkiinni kae ha're, Saafaaxi beetto Elsai 12 waaxa handanni hawuudhanni nooha afi. Tonaa layinkita isi umisi amade hawuuranni no. Eeliyaasino uddi're noo kaabba fushshe Elsai aana tugi.

²⁰Elsaino amade noo handa agure Eeliyaasi hoode dode mare, «Ha're anna'yanna ama'ya sunqe keerunni yee dayemmona agarie. Hakkunni gedensaanni hoodekki dayemmona» yiisi. Eeliyaasino qole, «Maahoyyena ha'ri. Ani assummohere kayinni habbooti» yiisi.

²¹Elsaino galagale hige isi amade noo handa gorre, maalano qambaranna kado boce giire gafe mannaho itisi. Manna itisihu gedensaanni ha're Eeliyaasira kaa'laancho ikki.