Read Sidama_Qullaawa _Maxaafa UMI MOOTOOLLA 3 Bible Online

UMI MOOTOOLLA 3 - Sidama_Qullaawa _Maxaafa bible

UMI MOOTOOLLA 3

¹Moote Selemooni Gibitsete moote Feriooni ledo elle amade beettosi adhi. Mootete minenna Qullaawa Mine mine ka"a geeshshanna Yerusaalamete Katama huxxe guda geeshsha, ise abbe Daawiti Katami widoonni worino.

²Hatte yannara Kaaliiqi su'ma ayirrisate yine Qullaawa Mine minnoonnikki daafira, mannu gaarrate aana kakka'lanni no.

³Selemooni Kaaliiqa baxannoho; annisi Daawiti kulinosireno agadhino. Ikkollana kaphu magannara saada gorre gaarrate aana kakkalino; hixaanano giirino.

⁴Wo'munkunni rooru kakkalote gaari Gebaooni yinanniwa noo daafira, Selemooni mitto barra kakkalara hakkiichira ha'ri. Hakkunnira albaannino hakkiicho 1,000 saada shilqote kakkalora gorrino.

⁵Hakko hashsha Kaaliiqi Selemoonira haaqeete, «Ma aammohera hasi'ratto?» yee xa'misi.

⁶Selemoonino, «Soqqamaanchikki anni'ya Daawiti ammanaminoha, halaalaanchonna taalo ikkino daafira, bagamannokkiha baxillekki leellishoottosi. Konne baxillekki techono leellishshe, isi darga amade gashshanno beetto oottosi.

⁷Kaaliiqa Magano'ya, ani lowo geeshsha shiimaho; gashshinanni garano diegennoommo. Ati kayinni anni'ya darga amade gashsheemmo gede assoottoe.

⁸Kune ani, ati doodhootto manni kiirre anfannikkihu giddo noommo.

⁹Kunnira, bushanna dancha bade afe, mannakki halaalunninna taalotenni gashsheemmo gede egenno uyie. Hakkunni ka'a konne bati'ra mannakki hiitto asse gashsheemmo?» yii.

¹⁰Selemooni konne coye huucci'rino daafira Kaaliiqira tashshi yiisi.

¹¹Kaaliiqino, «Umikkira seeda diro woy jiro dihuucci'rootto; woy diinikki goofanno gede dihalchootto. Halaalunni gashshate egenno huucci'rootto daafira,

¹²kune huucci'roottore eemmohe. Kunni albaanni ayerano nookkita, kunni ka'ano afi'nannikki egennonna wodancha eemmohe.

¹³Hakkunni aanano xa'mi'roottokkire lede eemmohe. Ate yannara ayee mooteno afi'rinokki jironna ayirrinye afi'ratto.

¹⁴Annikki Daawiti gede doogo'ya ha'rittoronna hajajamittoero, seera'yanna hajajo'ya wonshittoro seeda diro hee'ratto gede asseemmohe» yiisi.

¹⁵Selemooni goxanotenni baqqi yii yannara, Kaaliiqi haaqeete daye hasaawisinosita wodanchi. Hakkunni gedensaanni galagale Yerusaalame hige, Kaaliiqi Taabooti albaanni uurre shilqonnitanna mittimmate kakkalo Kaaliiqira shiqishi. Ledosi gashshaano baalanterano jila jili.

¹⁶Mitto barra 2 fooru meenti giwame Selemooniwa dayi.

¹⁷Lamente giddonni mitticho, «Mooticha'ya, aninna tini mancho mitteenni mitto mine hee'nanna ani mitto qaaqqo iloomma.

¹⁸Ani ilummahunni sayikki barra iseno mitto qaaqqo iltino. Hakko mine isenna ane agurranna wolu mittu mannino dino.

¹⁹Mitto hashsha ise qaaqqisera aanaho goxxeenna fugame reyino.

²⁰Hashsha ani goxe hee'reenna giddo wodhoommaha ane qaaqqo adhite, iseha reyinoha abbite giddo wortinoe.

²¹Soodo gute kae qansi'rammara layi'reemma woyite, ree nooha afoomma. Buuxe laeemma woyite reeshshuno ane qaaqqiha di"ikkino» yitu.

²²Ti'i mancho qolte, «Dee'ni! Lubbotenni noohu ane qaaqqooti; reyinohu ateho!» yitu. Balaxxe coyidhuti qolte, «Dee'ni! Reyinohu ateho; lubbotenni noohu aneho» yitu. Meentu kunni garinni mootete albaanni coyi'rami.

²³Hakkunni gedensaanni moote Selemooni, «Mitte, ‹Lubbotenni noohu aneho; reyinohu ateho› yitanni no. Ti'ino, ‹Lubbotenni noohu aneho; reyinohu ateho› yitanni no» yii.

²⁴Hakkunni gedensaanni moote, «Bise haadhine abbe"e» yii. Biseno abbineenna,

²⁵«Lubbotenni noo qaaqqo lamewa dartine darate darate beekkensa» yii.

²⁶Qaaqqu ama kayinni qaaqqose marartino daafira, «Moote'ya, eeggatena qaaqqo shitootina isera uyite agurise!» yitu. Ti'i kayinni, «Aterano anerano ikkoonkena, lamewa beenko!» yitu.

²⁷Hakkunni gedensaanni moote Selemooni, «Qaaqqo shitinoontena, hatti balaxxe coyidhuti amatena qaaqqo isera uuyyese!» yee hajaji.

²⁸Israeelete manni Selemooni yiino yoo macciishshihu gedensaanni, taalo coyi'ranno gede Maganu uyinosi egenno giddosi noota afe lowo geeshsha ayirrisisi.