Read Sidama_Qullaawa _Maxaafa UMI MOOTOOLLA 7 Bible Online

UMI MOOTOOLLA 7 - Sidama_Qullaawa _Maxaafa bible

UMI MOOTOOLLA 7

¹Selemooni mootimmasi mine 13 dirinni mine gudino.

²«Libaanoosi Dubbooti» yinoonni hari seendille 44 qaafo, godowa 22 qaafootinna, hojja 27 cigileeti. Haraho mittu mittu dirira tonaa onte, tonaa onte assine sasewa dirre uurrinsoonniti 45 tuuqqa noosi. Tuuqqate baddera daguwu dereersuwa worroonni. Insara umoonni tuuqqa amaddinoti uduunne worranni shae no. Haru qalcho giddoyido daguwunni seekkinoonni. Uduunne worranni shaeno giddoyido daguwunni seekkinoonnite.

⁴Qote qoteho nootera minunnitera lamente xarrara aante aantetenni sase sase masikoote noonsa.

⁵Lamenka widoonni mimmitoho alba higginoti sase sase cufanna no. Mittu mittunku waatira mimmitoho alba higginoti aante aantetenni sase sase masikoote no. Cufannatenna masikoottate 4 madde afidhino gooro noonsa.

⁶«Batinye Tuuqqa Haraati» yinanni mini seendille 22 qaafooti, godowa 13 qaafootinna darateho. Albaannino lowo tuuqqa gannoonniti aanaanni ha'rammanni shae no.

⁷Selemooni yoo yaanno woyite ofollannohu ayirrinyunnihu, «Yoote Barcimi Hara» yinannihu uullanni iima qalchu geeshsha aanaho xarafaame daguwu haqqe dirroonniho.

⁸Selemooni yoo yaanno harira badheenni konne hara lawanno mine minsiisi'ri. Gibitsete moote beettora galtesirano hattoo mine mini.

⁹Tini baala minnanna jawu hari hundunni kayise gumayichote geeshsha dancha jajjabba kinnanni biifinse minnoonnireeti. Kinnano darroonni darga albiidonna badhiido bonce taashshinoonnireeti[3]

¹⁰Mineno hakkiicho bonce abbinoonnitenni jajjabba kinnanni sanfoonni. Tini jajjabba kinna mitte mittenti seendille sette sette cigile ikkitanno; wolootu kayinni tonne tonne cigileeti.

¹¹Tenne jajjabba kinnara umoho bikki bikkinsanni seekkinoonniri wole kinnanna daguwu haqqe no.

¹²Mootete mini nafari gaangaawira, Qullaawu Mini gafonna giddoyidi holgi gede, dirimu dirimunni worroonni xarra daguwi ledo nooti boncoonnitenna 3 dirimi kinnanni seekkinoonnihu kinchu huxxi no.

¹³Moote Selemooni Xiroosi Kataminni Huraami yinanni mancho abbanno gede manna soyi.

¹⁴Huraamira camo daashshe seekkate ogimma noosi. Xiroosi ilama ikkinohu alba reyinohu annisino camo daashshe seekka egennino ogeessaati. Huraami ama Nifitaalemi ilamaati. Lowo ogimma afi'rinohu Huraami Selemooni woshshinosi garinni Yerusaalame daye kulloonnisiha camote looso baala loosi.

¹⁵Huraami hojja 18 cigilenna du'mille 12 cigile ikkitannota 2 mokkollo seekki.

¹⁶Lamente mokkollo aana worrannita hojja 5 cigile ikkitannota 2 camote guuto seekki.

¹⁷Mokkollote umi aana noo guuto biifisate 7 dira assine worroonni migiri no. Lamente guutora mitte mitte cagaage seekki.

¹⁸Mokkollote umira noo guuto biifisate 2 dira asse shaffo seekki. Mitte mittente guutora hatto asse wori.

¹⁹Gafote mokkollo umi aana nooti suufu daraaro labbanno guuto hojja 4 cigileeti.

²⁰Lamente mokkollo umi aana noo guuto migiraho iimaanni hige qunqumame noo darga worri. Mitte mittente guuto gaangaawira 2 dira assine worroonniti 200 shaffo no.

²¹Huraami camotenni seekkinoonnire 2 mokkollo Qullaawu Minira albaanni uurrisi. Qullaawu Minira e'nanniwa wodiidoonni uurrinsoonni mokkollicho, Yakiini[4] yine, aliyye ragaanni noo mokkollicho qolle, Boeezi[5] yini.

²²Mokkollote umi aana suufu daraaro labbannoti camotenni seekkinoonni guuto no. Mokkollote loosino kunni garinni loosame goofi.

²³Huraami afuu hala'linye 10 cigile, giddo 5 cigilenna baqo 30 cigile ikkitinota mitte qunqumado Baaraho yinanni gawate camotenni seekki.

²⁴Gawatete afii goorora cigile cigilete mereero camotenni taashshine seekkinoonniri 10 qooncho lawannori lamewa dirame no.

²⁵Gawate, camotenni seekkinoonnitera 12 boottate misilla badhera worreenna no. Bootta baalanti alba gobbara higge 3 aliyyera, 3 wodiidira 3 soojjaatira 3 qolte galchimira higge la'annore labbanno.

²⁶Gawatete gooro du'milli taakkote darate ikkanno. Daraarchu gedeeti gawatete afii gooro suufu daraaro labbanno. Tini gawate 40,000 litire ikkanno waa amaddanno.

²⁷Huraami doyannoha 10 uduunnicho camotenni seekki. Mittu mittunku seendille 4 cigile, hala'linye 4 cigilenna hojja 3 cigile ikkanno.

²⁸Konne uduunnicho taashshinoonnitenni 4 xarafaame camonni seekkine, suwashshu camote daabbinni xaadinse qixxeessinoonni.

²⁹Taashshine seekkinoonnihu aanano doobbiyu, boottatenna kirubeeli misilla no. Tenne misillara umiidonna lekkaalliido daraarote migiri suudinni seesiinsoonni.

³⁰Mittu mittunku uduunne worrannihu, camotenni seekkinoonniha 4 kasanna qale aanaanni doyitannota camote daabbuwa afi'rino. Qoleno shoolente maddera hayishshi'nanni gawate irkissanno daabbi no. Daabbuno daraarote migiri suudinni seesiinse seekkinoonniho.

³¹Hayishshi'nanni gawate afii mitte cigile ikkanno qunqumadooti. Hojjaseno mitte cigileeti. Afiiseno seesiinsoonniho. Gawate aanaho worrannirichi 4 maddeho ikkinnina qunqumado di"ikkino.

³²Shoolenti qale hojja mitte cigileetinna darateho. Qale baalanti uduunne worrannitera xarafaame camora woroonni no. Qale baalante daabbuwa uduunne worrannihu ledo xaadinse seekkinoonni.

³³Qallano faradi gaarennita labbanno. Daabbuwa, mudukkuwa, dabbanna goorose baala camo daashshine seekkinoonnireeti.

³⁴Mittu mittunku uduunne worrannihu shoolente maddera noo kasi, qalete aana daashshine xaadinse mittu daninni seekkinoonnita 4 dabba afi'rino.

³⁵Uduunne worranni kassa aana hojja cigilete darate ikkitannoti qunqumado xiyyo no. Dabbanna xarafaame camo uduunne worrannirichi ledo mitteenni seekkinoonnireeti.

³⁶Tenne tuuqqanna xarafaame camo mereero noo kassanna fanu dargi baalu kirubeelinni, doobbiyunninna saattu suudinni seesiinsoonniho. Gaangaawasino daraarote migira lawannorinni seesiinsoonni.

³⁷Tonnunku uduunne worranni uduunnichi kunni garinni seekkinoonniho. Deerrinsano suudinsano mitto ikkino daafira baalunku taaloho.

³⁸Huraami mittu mittunku uduunne worrannirichira mitte mitte hayishshi'nanni gawate seekki. Mitteenni 10 hayishshi'nanni gawate seekkino. Mitte mittente gawate afii hala'linye 4 cigile ikkanno. Mitte mittenti 800 litire waa amaddanno.

³⁹Huraami 5 uduunne worranniha Qullaawu Minira wodiidoonni, 5 qole Qullaawu Minira aliyyeenni wori. Baaraho yinanni gawate qole Qullaawu Minira wodiidi soojjaati maddera wori.

⁴⁰Huraami gawatta, buluulo fushshinannirenna xiltaame saanna seekki. Kunni garinni moote Selemooni hedinoha Kaaliiqi Mini looso loose gudi. Loosinohu qaru qaru loosi kunninni aane nooho:

⁴¹Lame mokkollo, mokkollote umira worranni guuto, mokkollote umira noo guuto dibbanno migirra,

⁴²mitte mittente guuto aana migiru daninni seekkine worroonni cagaage, mitte mittente guuto aana 2 dirira worroonniti 400 camotenni seekkinoonni shaffo,

⁴³uduunne worranniha 10 uduunnicho, 10 hayishshi'nanni gawate,

⁴⁴Baaraho yinannita waa worranni gawate, gawate tuuqqe amaddannore 12 boottate suudi misile,

⁴⁵gawatta, buluulo fushshinannireetinna xiltaame saannaati. Huraami, moote Selemoonira Qullaawu Mini Kaaliiqihura ikkanno gede konne uduunne baala fiinoonni camonni seekkino.

⁴⁶Moote Selemooni kore baala seekkisiisinohu, Yordaanoosi Lagichira Sukootinna Tsaritaani mereero siwiila daashshinanni dargaati.

⁴⁷Camotenni seekkinoonni uduunni lowo geeshsha bati'rino daafira Selemooni keennanni gede diassino. Kunnira mageeshsha ikkannoro dibuunxoonni.

⁴⁸Selemooni Kaaliiqi Minira ikkanno gede kunninni aane noo uduunne seekkisiisi. Kunino: Culkunniha kakkalote uduunnicho, Kaaliiqira shiqinshanniha qullaawa tima worranniha culku xarapheezza,

⁴⁹Qullaawu Holgira albaanni caabbicho worranniha 10 culkunni seekkinoonniha 5 qiniiteenni, 5 qole guraanni, daraarote suudinni seekkinoonnire caabbicho qansannire, giira kayinsannire,

⁵⁰finiinna, qarabba, xiltaame saanna, hixaana giirranni bacceetinna giira bushshinannireeti. Qullaawu Holgitanna Qullaawu Mini cufanna gobbaanni waalchu ledo xaadinsoonni. Kuri baalu culkunni seekkinoonnireeti.

⁵¹Moote Selemooni Qullaawu Mini looso baalanka gudihu gedensaanni, annisi Daawiti Kaaliiqi Mini hajora ikkanno gede worino birra, culkanna wole uduunne baala Qullaawu Mini uduunne worranniwa masse wori.