Read Sidama_Qullaawa _Maxaafa LAYINKI MOOTOOLLA 21 Bible Online

LAYINKI MOOTOOLLA 21 - Sidama_Qullaawa _Maxaafa bible

LAYINKI MOOTOOLLA 21

¹Minaase moohinohu 12 dirisinniiti. Yerusaalame teesso assi're 55 diro gashshino. Amasi su'ma Hefitsiiba yinanni.

²Israeele gobba amaddu waro, Kaaliiqi fushshe huninota tiyyi'nannita dagate woga amade Kaaliiqi giwanno coye assino.

³Annisi Hiziqiyaasi diige huninota daga magansidhanno gaarra aana galagalche kakkalote darguwa seekkino. Israeelete moote Akiaabi gede Ba"aali maganirano kakkallanni darguwa seekke, Asheera mokkollichono uurrisino; gordu beeddahe baala magansi'rino.

⁴Kaaliiqi, magansi'nannisi gede doodhino darga Yerusaalamete Qullaawa Mine daganniha kakkalote darga seekkino.

⁵Lamunku Qullaawu Mini nafarchira beeddahe magansi'rate yee kakkalote darguwa seekki'rino.

⁶Ilinoha beettosi shilqote kakkalo asse shiqishino. Qoleno kiilanninna hellee la"anni qaallichimmatenninna ekera hasaawisatenni hee'rannoha ikkino. Kunni garinni Kaaliiqi giwanno coye asse iso hanqisino.

⁷Qullaawa Mine, angasinni boce seekki'rinota Asheera mokkollicho worino. Kuni Qullaawu Mini Maganu Daawitiranna beettisi Selemoonira, «Kuni Yerusaalamete noohu Qullaawu Mini ane magansi'nannie gede tonaa lamente Israeelete ga're gobba giddonni doodhoommo dargaati.

⁸Qoleno Israeelete manni Muse widoonni qole oommo seera, woganna wodho seekke agadhiro akaakkansara oommo gobbanni galagalte fulte hadhanno gede diasseemmonsa» yee coyi'rino.

⁹Yihudu manni kayinni Kaaliiqi hajajo dimacciishshino. Minaaseno Kaaliiqi albinsanni shorre huni gosa assitinotenni roore bunshe loossanno gede assinonsa.

¹⁰Kaaliiqi soqqamaanosi himanaanote widoonni qole,

¹¹«Moote Minaase konne tiyyi'nanni cubbo baala assino; assino bunshe Kana"aanootu assitinotenni roorete. Seekki'rino misillanni Yihudu manna cubbu giddora eessino.

¹²Kunnira ani Israeelete Magani Kaaliiqi Yerusaalametenna Yihudu aana macciishshihu baalu bararraaqanno coye abbeemmo.

¹³Samaariya bikkinanni gede qixxeessoommo siiwonna Akiaabi mine bikkoommo daabba Yerusaalamete aana diriirseemmo. Fiine ka'ne gombinse worranni saane gede Yerusaalameno co'o asse fee gombiseemmo.

¹⁴Gatinoha manna'ya diinu angara sayise ee agureemmo. Diinnansa baala mulqidhannonsa; jajjansano saantanno.

¹⁵Togo asseemmohu akaakkansa Gibitsetenni fushshummohunni kayisse techo geeshsha cubbo loossanni ane hanqissinoe daafiraati» yiino.

¹⁶Minaase Yihudu manni cubbo loose Kaaliiqa dadillisanno gede assatenni sae, keeraano lowo manna shee Yerusaalamete doogga mundee calla assino.

¹⁷Minaase assinohu wolu coyinna loosino cubbi baalu Yihudu mootoolla dhagge amadino maxaafira borreessineenna no.

¹⁸Isino reenna mootimmasi mini mule, Uuza Gate madaarroonnisi. Isi darga beettisi Amooni moohino.

¹⁹Amooni Yihudaho moohinohu 22 dirisinniiti. Yerusaalame teesso assi're Yihuda 2 diro gashshino. Amasi Meshulemeeti Yaaxiba Katami manchi Haruutsi ilinote.

²⁰Annisi Minaase gede isino Kaaliiqi giwanno coye assino.

²¹Isono annisi faale ganteennasi annisi magansi'rino maganna magansi'rino.

²²Akaakkasi Magano Kaaliiqa agure hajajosino ayirrisa giwino.

²³Ledosi gashshaano gano gante mootimmasi mine shitinosi.

²⁴Yihudu mannino Amooni shiture baala shee, beettosi Iyosiyaasi isi darga moohisino.

²⁵Amooni assinohu wolu coyi baalu Yihudu mootoolla dhagge amadino maxaafira borreessineenna no.

²⁶Isono, Uuza Gate umisi waammara madaarroonnisi; beettisi Iyosiyaasi isi darga moohino.