Read Sidama_Qullaawa _Maxaafa LAYINKI MOOTOOLLA 23 Bible Online

LAYINKI MOOTOOLLA 23 - Sidama_Qullaawa _Maxaafa bible

LAYINKI MOOTOOLLA 23

¹Hakkunni gedensaanni moote Iyosiyaasi Yihudunnihanna Yerusaalamete geerra baala gamba assi.

²Insano qeesootanna himanaano, aja akkala baala hoodete adhite Qullaawu Minira hadhu. Mooteno Qullaawu Mininni anfi maxaafa gudise mannaho nabbawi.

³Iyosiyaasino kae mootete heelliicho mule uurre, wo'mu wodanisinninna wo'ma hedosinni Kaaliiqi yiino gede ikkate, hajajosi, wogasinna wodhosi agadhatenni maxaafu giddo borreessinoonnire wonshate gondooro ei. Mannu baalunkuno gondooro agadhate sumuu yii.

⁴Iyosiyaasi qeesootu roorricha Hiliqiya, kaa'litannosi qeesootanna Qullaawu Mini agaraasine Ba"aalita, Asheeratanna beeddahe magansi'rate shiqinshoonni uduunne baala Qullaawu Mininni fushshite huntanno gede hajaji. Mooteno hakkonne uduunne baalanka Yerusaalamete gobbaanni masse Qedirooni Lagichira giire buluulo Beeteli haa're ha'ri.

⁵Yihudu katammaranna Yerusaalamete qooxeessira noo gaarrara kakkalote darguwa aana kakkaltanno gede Yihudu mootoolla wortino qeesoota baala soqqantannokki gede assi. Ba"aalira, arrishshote, aganahonna gordu beeddahe baalate kakkaltanno qeesoota hooli.

⁶Asheera mokkollichono Qullaawu Mininni katamaho gobbaanni fushshe Qedirooni Lagichira masse giiri; daahe buko asse hirreeyyete giddo finci.

⁷Qoleno kaphu maganna magansi'rate seerira Qullaawu Mini giddo labballu foorannowanna meentu Asheerara uddano gananno darga diigi.

⁸Iyosiyaasi Yihudu katammaranna gobba baalantera Geebainni kayise Bersaabehi geeshsha noo qeesoota baala haa're Yerusaalame abbe, kakkallanni darga baala lageessi. Qoleno katama e'nanni woyite guraanni katamu gashshaanchi Iyyaasu seekkisiisino waalchi mule noota kakkallanni darguwano diigi.

⁹Hakkonne qeesoota Qullaawa Mine soqqantannokki gede hoolloonni. Ikkollana wolootaho uyinanniha shiishinokki tima ita dihoolloonninsa.

¹⁰Iyosiyaasi Hinoomi Lagichira nooha Tofeeti yinanniha dagate maganna magansi'nanni darga lageessi. Kunni garinni labbaaha woy meyata beettosi Molookira shilqishannohu hee'rannokki gede assi.

¹¹Yihudu mootoolla Qullaawu Mini waalchira arrishsho magansi'rate uyitino farado hooli; ledo noo faradi gaareno giiri. Kuri baalunku jawu roorrichi Naataani-Meleeki yinannihu hee'ranno mini mule Qullaawu Minira e'nanni waalchi nafara nooreeti.

¹²Yihudu moote Akaazi mootete mini aana minsiisino minna giddo Yihudu mootoolla seekkisiissinota kakkalote darguwanna lamunkura Qullaawu Mini nafara moote Minaase seekkisiisinota kakkalote darguwa baala diigino. Kakkalote uduunneno cancane masse Qedirooni Lagichira hunino.

¹³Yerusaalamete soojjaatoonni Battete Ilaalaati yinannihura wodiidoonni moote Selemooni seekkisiisinota tiyyi'nannita Sidoonootu magano Astaarooti, Moaabi magano Kamooshi, Amooni magano Molooki magansi'nanni gaarrano lageessino.

¹⁴Iyosiyaasi sooddiyye hiiqqaqqino; Asheera mokkollo cancanino; insa uurrinsoonni darga, reyino manni miqqa duuni.

¹⁵Iyosiyaasi Israeele cubbu giddora eessihu Naabaaxi beetti Iyorbiaami Beeteli seekkisiisinoha magansi'nanni darga diigino; kakkalote bayichono diige kinnano cancane buko assino; Asheera mokkollichono giirino.

¹⁶Iyosiyaasi caaqqi yee la"anno woyite, gaarrate aana seekkinoonni moogga afi. Hatte moogga giddo noo miqqa baala fushshe, kakkalote darga masse giire kakkalote darga lageessi. Konne baala assatenni himanaanchu widoonni qole Kaaliiqi coyi'rino coyi wo'mi. Caaqqi yee la"anno woyite konne himana kulino manchi moogo afe,

¹⁷«Kuu"u moogi ayeho?» yee xa'mi. Hakko Beeteli hee'ranno mannino, «Yihudunni daye, kunni kakkalote dargi aana xa ati assitto coyi baalu ikkannota kulino himanaanchi moogooti» yee dawarisi.

¹⁸ Iyosiyaasino, «Iso kissinoonte; isi miqqa darginni kayissinoonte!» yiinsa. Kunnira isihanna Samaariyu himanaanchi miqqa darginni dikayinsoonni.

¹⁹Iyosiyaasi Israeelete katammara Israeelete mootoolla seekkisiissinota Kaaliiqa hanqissannota dagate maganna magansi'nanni darguwa baala diigino. Hattenne kakkalote darguwa baala Beeteli assino gede assino.

²⁰Iyosiyaasi hattenne gaarra aana magansidhanno qeesoota baala shee miqqansano kakkalote darguwa aana giiri. Konne duucha assihu gedensaannni Yerusaalame higi.

²¹Iyosiyaasi mannu wo'munku Kaaliiqa ayirrisate gondooru maxaafi giddo borreessinoonni garinni Mararrote Ayyaana ayirrisanno gede hajaji.

²²Ejjeetto gashshitu dirinni kayise, Israeelete woy Yihudu mootoolla baalante yannara Mararrote Ayyaana hakkunni garinni ayirrinse diegenninoonni.

²³Iyosiyaasi moohihunni tonaa settikki diro kayinni Kaaliiqiha Mararrote Ayyaana Yerusaalamete ayirrinsi.

²⁴Qeesootu roorrichi Hiliqiya Qullaawu Mininni afino maxaafi giddo borreessinoonni coyi wo'manno gede, Iyosiyaasi Yerusaalametenna Yihudu katammanni ekera hasaawiissannorenna kiilaano baala ayiddu maganna, kaphu magannanna dagate maganna magansi'nanniha tiyyi'nanni uduunne baala hune gudi.

²⁵Muse Seeri giddo borreessinoonni garinni wo'mu wodanisinni, wo'ma lubbosinninna wo'ma wolqasinni Kaaliiqira soqqaminohu Iyosiyaasi gedee moote isira albaannino ikko gedensaanni horontanni dino.

²⁶Ikkeennano, moote Minaase assino coyinni kainohunni Yihudu aana buwinohu waajjishannohu Kaaliiqi hanqi diqiidino.

²⁷ Kunnira Kaaliiqi, «Yihudano Israeele hunummo gede asse huneemmo; Yihudu mannano albi'yanni hooleemmo; doodhoommoha Yerusaalamete Katamanna, ‹Konniicho magansi'nannie› yoommoha Qullaawa Mineno agureemmo» yii.

²⁸Iyosiyaasi assinohu wolu coyi baalu Yihudu mootoolla dhagge amadino maxaafi giddo borreessineenna no.

²⁹Iyosiyaasi moohe noo yannara, Gibitsete moote Nikau Asoori mootera ha'lara Efiraaxisi Wayiwa ha'rino. Moote Iyosiyaasi Gibitsete olanto ittisara fulinowa Megido Katamira Nikau shiinosi.

³⁰Ledosi gashshaanono reeshshasi Megidonni faradi gaarete worte abbite Yerusaalamete umisi qixxeessi'rino waammara madaartusi. Gobbasi mannino beettosi Iyoahaazi buure isi darga moohisi.

³¹Iyoahaazi Yihudaho moohinohu 23 dirisinniiti. Yerusaalame teesso assi're 3 agana gashshino. Amasi Hamuxaali Libina Katami manchi Ermiyaasi ilinote.

³²Iyoahaazino akaakkasi gede Kaaliiqi giwanno coye assino.

³³Mitto barra Gibitsete moote Nikau Yerusaalamete moohannokki gede Iyoakaazi amade Haamaati gobba Ribila yinanniwa masse cagaagetenni usurisi. Mootimmasi kunni garinni gooffino. Yihudu mannino 3,400 kiilo birra, 34 kiilo culka giwire aannosi gede assi.

³⁴Qoleno Iyoahaazi rodoo Eeliyaaqeemi dargasi moohise, su'masino Iyoaaqeemi yee soorri. Iyoahaazi kayinni haa're Gibitse masseenna hakkiicho reyino.

³⁵Iyoaaqeemino moote Nikau xa'mino birranna culka baati. Kunni coyira kaa'lannosi gede, gobbasi manni dandii deerrinni birranna culka baatanno gede assi.

³⁶Iyoaaqeemi moohinohu 25 dirisinniiti. Yerusaalame teesso assi're 11 diro gashshino. Amasi Zebiida Ruuma Katami manchi Pedaya ilinote.

³⁷Iyoaaqeemino akaakkasi gede Kaaliiqi giwanno coye assino.