Read Sidama_Qullaawa _Maxaafa LAYINKI MOOTOOLLA 24 Bible Online

LAYINKI MOOTOOLLA 24 - Sidama_Qullaawa _Maxaafa bible

LAYINKI MOOTOOLLA 24

¹Iyoaaqeemi moohe noo yannara, Baabilooni moote Nabukadanatsoori Yihuda qase qeeli. Iyoaaqeemino 3 diro gabbarisihu gedensaanni isira badhe wodhi.

²Kaaliiqi soqqamaanosi himanaanote widoonni qole Yihuda hunate coyi'rino coyi wo'manno gede horritannore Baabiloonoota, Sooriyoota, Moaabootanna Amoonoota Iyoaaqeemi aana kayisi.

³Kuni coyi ikkinohuno moote Minaase loosino cubbi baalu daafira Yihudu manna albisinni hunate Kaaliiqi hajajino coyi wo'manno gedeeti.

⁴Minaase keeraano manna shee Yerusaalame mundee calla assino. Kunnira, Kaaliiqi hakkonne cubbo agurara dihasi'rino.

⁵Iyoaaqeemi assinohu wolu coyi baalu Yihudu mootoolla dhagge amadino maxaafi giddo borreessineenna no.

⁶Iyoaaqeemino annuwasinte gede reenna, beettisi Yoakiini isi darga moohi.

⁷Baabilooni moote Nabukadanatsoori Efiraaxisi Wayinni kayise Gibitsete aliyye qacce geeshsha noo gobba baala amadino daafira, hakkunni gedensaanni Gibitsete mootenna olantosi olaho difultino.

⁸Yoakiini moohinohu 18 dirisinniiti. Yerusaalame teesso assi're 3 agana moohino. Amasi Nehushita Yerusaalamete manchi Elinaataani ilinote.

⁹Isono annisi faale ganteennasi Kaaliiqi giwanno coye assino.

¹⁰Isi gashshe noo yannara Baabilooni moote Nabukadanatsooriti olu hajajaano olantote ledo dagge Yerusaalame gaangeessitu.

¹¹Insa gaangeessite heedheenna Nabukadanatsoorino kae Yerusaalame dayi.

¹²Yihudu moote Yoakiini, amasi, soqqamaanosi, olu hajajaanonna ledosi gashshaano baalu Baabiloonootaho anga uyitu. Nabukadanatsoori moohihunni settikki diro Yoakiini qafade haa're ha'ri.

¹³ Qullaawa Minenna mootete mine noo jajja baala co'o asse Baabilooni adhe ha'ri. Alba asse Kaaliiqi coyi'rinonte gede, moote Selemooni Qullaawu Minira seekkisiisinoha culku uduunne baala hiiqqaqqi.

¹⁴Nabukadanatsoori Yerusaalamete manna baala, olu hajajaanonna mootete ledo gashshaano, mitteenni 10,000 manna qafade haa're ha'rino. Insa ledo angate ogimma afidhinorenna siwiila tuntannore baala haa're ha'ri; dargaho noori nookki buxane calla gattino.

¹⁵Nabukadanatsoori Yoakiini, amasi, meentosi, ledosi gashshaanonna Yihudu ayirradda baala gamba asse Baabilooni haa're ha'ri.

¹⁶Qoleno 7,000 olantonna angate ogimmano afidhinore 1,000 siwiila tuntannore gamba asse Baabilooni haa're ha'ri. Kuri baalunku jawaatootahonna olama dandiitannoreeti.

¹⁷Nabukadanatsoori Yoakiini wosiila Maataaniya Yihudu moote asse moohise su'masi Sedeqiyaasi yee soorri.

¹⁸Sedeqiyaasi moohinohu 21 dirisinniiti. Yerusaalame teesso assi're 11 diro gashshino. Amasi Hamuxaali Libina Katami manchi Ermiyaasi ilinote.

¹⁹Sedeqiyaasino Iyoaaqeemi gede Kaaliiqi giwanno coye assino.

²⁰Kaaliiqi Yerusaalamennihanna Yihudu manna hanqe albisinni huni. Moote Sedeqiyaasino Baabilooni moote Nabukadanatsoorira mokkookki.