Read Sidama_Qullaawa _Maxaafa LAYINKI MOOTOOLLA 25 Bible Online

LAYINKI MOOTOOLLA 25 - Sidama_Qullaawa _Maxaafa bible

LAYINKI MOOTOOLLA 25

¹Sedeqiyaasi moohihunni honsikki diro tonnikki aganira, tonnikki barra Nabukadanatsoori olantosi baala adhe daye Yerusaalame qasara doyisse amadi. Olantosino katama gaangeessite huxxu qooxeessira bushsha duuntu.

²Kunni garinni Sedeqiyaasi moohihunni tonaa mitikki diri geeshsha doyissite keeshshitu.

³Hakko diro shoolki aganira, honsikki barra mannaho itannori goofeenna hude batidhu.

⁴Hakkunni gedensaanni katamu huxxi dhooheenna, Yihudu olanto hashsha fulte ba'u. Baabilooni olanto agarte heedheennanni, lamenka huxxa xaadisanno waalchi widoonni mootete gati muleenni higge Yordaanoosi Lagichi widira higge xooqqu.

⁵Ikkollana Baabilooni olanto Sedeqiyaasi shorrite Iyyaarko mule noo xawira amaddu. Gaaddosi baalanti iso hunte xooqqu.

⁶Iso qafadde Ribila yinanni katamira noohuwa Nabukadanatsooriwa haadhe massitu. Isino Sedeqiyaasi bunshe egensiisi.

⁷Sedeqiyaasi illesinni la"anni hee'reenna oososi shini. Hakkunni gedensaanni Nabukadanatsoori lamenta illesi giddonni fushshine hunnanni gede assi. Angasinna lekkasino camote cagaagenni usurre Baabilooni haa'ne ha'ni.

⁸Nabukadanatsoori moohihunni tonaa honsikki diro, ontikki aganira lamalki barra, mootete mini agaraasine roorrichi Nabuzardaani Yerusaalame ei.

⁹Qullaawa Mine, mootete minenna Yerusaalamete minna baalate giira qasi; wole umo umo ikkitino minnano giire huni.

¹⁰Nabuzardaani olantono Yerusaalamete huxxa diiggu.

¹¹Nabuzardaani katamaho gatte noorenna woloota, hattono gobbansa gibbe Baabiloonootu hale ikkitinore qafade haa're ha'ri.

¹²Horo buxxinore kayinni hakkiicho dargaho agurino. Insa woyinete kaashsho shuquntanno gedenna baatto loossanno gede assino.

¹³Baabiloonootu Qullaawa Mine noore camotenni seekkinoonni mokkollo, uduunne aanaho worrannire lekka afi'rinorenna Baaraho yinannita waa worrannita jawa gawate hiiqqaqqitu. Camo baala kayinni Baabilooni haadhe hadhu.

¹⁴Camotenni seekkinoonni kerra, qarabba, buluulo fushshinannire, xiltaame saannanna mooqquwa, qoleno camotenni seekkinoonniha Qullaawu Mini hajora ikkanno uduunne baala adhite hadhu.

¹⁵Culkunninna birrunni seekkinoonnire xiltaame saannanna hixaana giirranni bacce baala adhite hadhu.

¹⁶Moote Selemooni Kaaliiqi Minira ikkanno gede seekkisiisino uduunni: Lame mokkollo, uduunne aanaho worranniha lekka afi'rinore, Baaraho yinanni gawate baala seekkinoonni camo lowota ikkitino daafira keena didandiinanni.

¹⁷Lamenti mokkollo mittu suudinni seekkinoonnite; mittu mittunku mokkollichi seendille 18 cigileeti. Mokkollote camotenni seekkinoonni guuto noonsa; mitte mittenti guuto hojja 3 cigileeti. Mitte mittente guuto laayyora shaffo lawanno shuri noose.

¹⁸Nabuzardaani qeesootu roorricha Seerayanna isi hoodeha qeesicha Soffooniyaasinna wole 3 Qullaawu Mini roorroota amade haa're ha'ri.

¹⁹Hatte yanna geeshsha katamaho keeshshitinore gaaddote hajajaancho, 5 mootete amaalaasine, manna olaho filannoha olantote hajo borreessannohanna wole 60 jajjabba manna haa're ha'ri.

²⁰Konne manna baala Hamaati Gobbara Ribila Katamira noohuwa Baabilooni mootewa haa're massi.

²¹Mooteno insa hakkiicho shiishiishi. Kunni garinni Yihudu manni gobbansanni qafadame ha'ri.

²²Nabukadanatsoori Saafaani beetti Ahiqaami ilinohu Gedaaliya Yihudaho gatino manna gashshanno gede wori.

²³Anga uyitinokkiri olu hajajaanonna olanto konne coye macciishshite Mitsipha noohuwa Gedaaliyawa hadhu. Hadhinori olu hajajaano: Naataaniya beetti Ismaeeli, Qaareha beetti Yohanaani, Nexofa Katami manchi Tanihumeeti beetti Seerayanna Maaka ilaminohu Yaizaaniyaati.

²⁴Gedaaliyano olantote hajajaanoranna olantote, «Baabilooni gashshaano la'ine waajjitinannikki gede seekke kuleemmo'ne; tenne gobbara loosidhine heedhe; Baabilooni mooterano giwire baatte; hatto assitiniro baalunku coyi qinaanno'ne» yiinsa.

²⁵Ikkollana kayinni hakko dironni lamalki aganira mootete fiixa ikkinohu Elishamai beetti Naataaniya ilinohu Ismaeeli 10 manna anga adhe Mitsipha mare Gedaaliya shii. Gedaaliya ledo noore Yihudunna Baabilooni mannano shee gudi.

²⁶Kunnira Baabilooni manna waajjitino daafira, Yihudu manni aja akkala yinikkinni baalunku olu hajajaano ledo Gibitse xooqi.

²⁷Moote Ewili-Merodaaki Baabilooni moohi yannara, Yoakiini qafadamihunni sajjiina lamalki diro, tonaa layinki aganira lemiina lamalki barra usurunni tirisi.

²⁸Ewili-Merodaaki Yoakiinira dancha coye assino. Isi gede qafadante Baabilooni heedhino mootoolla baalantenni roore ayirrado darga uyinosi.

²⁹Yoakiinino usuru mini imaana soorri're, reya geeshsha mootete ledo itanno gede assinisi.

³⁰Lubbotenni hee'ri geeshsha barru barrunkunni hasiisannosire baala uyinannasi hee'rino.