Read Sidama_Qullaawa _Maxaafa LAYINKI MOOTOOLLA 4 Bible Online

LAYINKI MOOTOOLLA 4 - Sidama_Qullaawa _Maxaafa bible

LAYINKI MOOTOOLLA 4

¹Himanaanote gaamo giddoha galtese shiidhinoti mitte gunnitte mancho Elsaiwa dagge, «Mooticha'ya! Ayiddaanni'ya reyino; afittonte gede isi Kaaliiqa waajjanno manchooti; xa kayinni kune isira woxe liqiissinohu mittu manchi daye lamenta ooso'ya borojje assi'rara hasi'rino» yite ku'litu.

²Elsaino, «Ani ma"assammohera hasi'roottayya? Mine marichi nooherono kulie!» yiise. Iseno, «Shiima maaqqe giddo noota ejersu zayite agurranna woliri nooeri dino» yitu.

³Elsaino, «Ollaa hadhe dandiitta deerrinni mulloota gambayibba huuccidhe gamba assi'ri.

⁴Hakkunni gedensaanni atinna oosokki e'ine mine cufidhe; zayiteno gambayibba baalate galchi; wo'miha ka'a shiqqi assi!» yiise.

⁵Mancho hadhe oosose ledo e'e cufana cufidhu. Shiima maaqqe giddo noo zayite haadhe oosose shiqqi assitanna gambayibbate galchitu.

⁶Gambayibba baalantera wonshituhu gedensaanni beettose, «Wolu gambayichi dinoni?» yite xa'mitu. Beettise qole, «Mullichu gambayichi mittuno dino!» yee dawarise. Zayiteno hakkawonyitenni uurritu.

⁷Iseno ikkino coye marte Elsaira kultu. Isino, «Marte zayite hirte asalekki baaxxi; gatino woxi ateranna oosokkira qiniite ikkanno'ne» yiise.

⁸Mitto barra Elsai mitte dureette mancho heedhannowa Suneemi Katama ha'ri. Hakkiicho dureette manchonni xaadeenna sagale itanno gede koyissusi. Hatte yannanni kayise Suneemi Katama maranno kiironni sagale isewa itanno.

⁹Iseno ayiddaannisera, «Kuni wo'manka woyite kawiira daannohu, Maganunniha qullaawa mancho ikkinota seekke afoommana,

¹⁰mininkera iimaanni mitte shiima kifile seekkine daallasa, xarapheezza, barcimanna faanoose worreennasi kawiira daanno kiiro hakko fooliishshi'rona» yitu.

¹¹Mitto barra Elsai galagale Suneemi ha're, uyinoonnisi kifile mare e"e fooliishshi'ri.

¹²Soqqamaanchosi Giyaazi, «Hanni marte mancho woshshi!» yii. Giyaazi woshsheenna mancho dagge albaanni uurritu.

¹³Elsai Giyaazira, « ‹Ninkera yite lowo geeshsha qarramoottana, ma"assinahera hasi'ratta? Mootete woy olantote hajajaanchira kullanniheri nooni?› yiino yite xa'mise» yii. Manchono, «Ani fiixi'ya ledo noomma daafira mitiimma dinoe!» yite dawartu.

¹⁴Elsaino Giyaazira, «Hanni ma"assoseyya?» yii. Giyaazi daware, «Ayiddaannise geerchoho; iseno ila afidhinokkita afoommo» yii.

¹⁵Elsaino, «Hanni maahoyyena daggona woshshise» yii. Isino woshsheennase dagge waalchoho uurritu.

¹⁶Elsaino, «Daanno diro tenne yannara labbaa qaaqqo hanqafi'ratta» yiise. Iseno, «Mooticha'ya Maganu mancho ballo eeggatena, wo'mitannokki hexxo uyitootie!» yitusi.

¹⁷Ikkollana mancho godobbe, Elsai kulinosente gede yiino yanna iillituta labbaa qaaqqo iltu.

¹⁸Qaaqquno lophi; mitto barra birrate aganira gide gamba assannosi manni ledo noohuwa annisiwa kae mari.

¹⁹Isino, «Woo! Umo'ya! Umo'ya!» yaanni annaho ku'li. Annisino soqqamaanchisira, «Haadhe amasiwa massisi!» yii.

²⁰Soqqamaanchuno duhe amanniwa haa're ha'ri; amano qaaqqo hanqaffe heedheennanni barru taalooti dayita reyi.

²¹Iseno haadhe massite Maganu manchi daallasi aana goxisse, waalcho cuffe agurte hadhu.

²²Hakkunni gedensaanni ayiddaannase woshshite, «Rahe Maganu manchiwa mare higeemmana, mitto soqqamaanchonna mitto harricho uyie» yitusi.

²³Ayiddaannise qole, «Techo Aganu Leellinohanna Fooliishshote Barri Ayyaana di"ikkinona mayira ha'ratta?» yiise. Iseno qolte, «Qarru dinona agari!» yitu.

²⁴Hakkunni gedensaanni harricho koodhite soqqamaanchose, «Ani aguri yaammahe geeshsha, harricho rakke rakke hadhanno gede gani!» yitusi.

²⁵Kunni garinni ka'e Maganu manchiwa Qermeloosi Ilaala hadhu. Maganu manchi xeertote dagganni noota afe soqqamaanchisira Giyaazira, «Kuu"une lai Suneemitte dagganni no!

²⁶Kai dodde marte, ‹Maaho dikeereho? Ayiddaannikki keere no? Beettikkino keereho?› yite xa'mise» yii. Iseno macciishshitanni heedhenni, «Keereholla» yite dawartu.

²⁷Maganu manchiwa iillituhu gedensaanni baattote gombisante lekkasi cu'midhu; Giyaazi hoolara dayita, Maganu manchi kayinni, «Agurise! Lowo geeshsha qarrante ikkitanni nooti dileeltannohe? Kaaliiqi kayinni qarrase dikulinoe» yii.

²⁸Iseno, «Mooticha'ya! Ila uyie yee xa'mi'roommaheni? ‹Wo'mitannokki hexxo uyitootie› diyoommahe?» yitusi.

²⁹Elsaino Giyaazira, «Rakke ka'e siqqicho'ya haadhe dodi. Doogote manna keere haadhanni yanna huntooti; ayino keereho yaannahe dawaro qoltanni yanna guddooti; siqqicho'ya massite qaaqqu albi aana wori» yiisi.

³⁰Qaaqqu ama kayinni Elsaira, «Atenna Heeshshote Kaaliiqi halaali afanna, horonta ate agure diha'reemma» yitu. Isino ledose ha'rara kai.

³¹Giyaazi balaxe ha're siqqichosi qaaqqu albi aana wori; ikkollana qaaqqoho qoonqo woy foolu nafa dileellino. Kunnira Giyaazi galagale hige Elsaira, «Qaaqqu dikaino» yii.

³²Elsai mare minira eanno woyite qaaqqu ree daallasisi aana diriire no.

³³Callichisi e"e mine cufi're Kaaliiqa huucci'ri.

³⁴Hakkunni gedenaanni afoo afiisi ledo, ille illesi ledo xaadise angano angasi aana wore aanasi gombisame hee'reenna qaaqqu bisi iibbi.

³⁵Elsaino kae mini giddo kawanna ka'a ha'ramihu gedensaanni, galagale qaaqqu aana gombisami; qaaqquno 7 hige hanxishshi're ille fa'ni.

³⁶Elsaino Giyaazi woshshe, «Qaaqqu ama woshshi!» yii. Iseno daggeenna, «Qaaqqikki kuneeti!» yiise.

³⁷Iseno e'e galataho lekkasira woroonni diriirte ubbu; qaaqqoseno adhite fultu.

³⁸Gobbate hude ubbe heedheenna mitto barra Elsai galagale Galgala higi. Himanaanote ledo songe hee're soqqamaanchosi, «Lowo midaano haadhe kunni mannira sagale booso worinsa!» yiisi.

³⁹Himanaanote giddonni mittichu shaanu gedeere xinqe abbara fule, dubboho karinoha baaqula lawannore afi; xinqe haa're dandii geeshsha uddanosira wonshe abbe murmure midaanote gafi; marichohoro kayinni afinohu dino.

⁴⁰Sagale fushshineenna afooho wodhitanni heedhenni, «Maganu mancho, midaanote giddo shaannori no!» yite raartu; itano didandiitino.

⁴¹Elsaino, «Hanni bullee abbe"e» yii. Abbinoonni bullee midaanote wore, «Mannu itona fushshe!» yii. Hakkunni gedensaanni midaanote giddo gawajjannore dianfoonni.

⁴²Wole yannara mittu manchi Beaalishalishi yinanniwiinni umi laalchinni qixxeessinoonnita 20 hayixu timmanna haaro badalate shoye Maganu manchira haa're abbi. Elsaino soqqamaanchisira, «Mannu itona uyi» yii.

⁴³Soqqamaanchuno, «Tenne shiima sagale 100 mannira hiitto asse iillisheemmo?» yee xa'mi. Elsai daware, «Kaaliiqi, ‹Mannu ite duuweenna gattanno› yee kulinoena, itona uyi» yii.

⁴⁴Soqqamaanchuno sagale mannaho uyi. Kaaliiqi coyi'rinonte gede sagale mannu ite duuweenna gattu.