Read Sidama_Qullaawa _Maxaafa LAYINKI MOOTOOLLA 6 Bible Online

LAYINKI MOOTOOLLA 6 - Sidama_Qullaawa _Maxaafa bible

LAYINKI MOOTOOLLA 6

¹Himanaanote gaamo Elsaira, «Kuneeti hee'neemmo dargi ruukkinonke.

²Kunnira Yordaanoosi laga marre, haqqa mudhine abbine galleemmo mine mi'ninoni?» yitusi. Isino, «Maahoyyena hadhe!» yiinsa.

³Insa giddonni mittu, «Atino ninke ledo kaissi!» yii. Elsaino, «Maahoyye ha'reemmo» yii.

⁴Isino ledonsa ha'reenna, Yordaanoosi laga marte haqqe kara hanaffu.

⁵Insa giddonni mittu haqqicho karanni hee'reenna, meesane fulte wayi giddo ubbu. Isino, «Mooticha'ya! Sholloommo, argi're abboommo meesaneetiwe!» yee Elsaira kuli.

⁶Elsaino, «Hiikkaanni ubbino?» yee xa'mi. Manchu ubbino darga leellisheennasi, Elsai mitto kuta mure wayi giddo tuge, meesane iima higge fultanno gede assi.

⁷Hakkunni gedensaanni, «Fushshite haa'ri!» yiisi. Manchuno heeshshi yee meesane haa'ri.

⁸Mitte yannara Sooriyu moote Israeelete manni ledo olami. Isino olantote hajajaano ledo amaalamihu gedensaanni, gaa'litanno darga doori.

⁹Elsaino Israeelete mootera, «Sooriyootu gaa'lite agarte noohe daafira hakka higge martooti!» yee sokka soyisi.

¹⁰Maganu manchi kulinosi garinni Israeelete moote olantosi qorophisiisinonsa daafira, feeffatte agadhitu. Kuni coyino marro marro hige ikkino.

¹¹Kunninni kainohunni Sooriyu moote lowo geeshsha caaccaawe olu hajajaano woshshe, «Ki'ne giddonni Israeelete moote ledo elle amadinohu ayetiro dikultinannie?» yee xa'minsa.

¹²Insa giddonni mittu, «Moote! Ninke giddo hattoo coye assannohu dino; ma'nakkira heedhe coyi'rattori nafa gatikkinni Israeelete mootera kulannohu himanaanchu Elsaiiti» yee dawari.

¹³Sooriyu mooteno, «Iso manna soye qafadisiiseemmona, hanni hiikkiicho nooro buuxxe!» yiinsa. Hatte yannara Dootaani Katamira noota kullisi.

¹⁴Sooriyu mooteno faradunninna faradi gaaretenni noota jawaata olanto hakkiira soyi. Insano hashsha marte iillite katama doyissitu.

¹⁵Elsai soqqamaanchi soodo gute kae gobbara fulanno woyite, faradunna faradi gaaretenni nooti Sooriyu olanto katama doyissite no. Isino galagale Elsaiwa hige, «Mooticha'ya, kune goonfammoraatina mayi woyyannonke» yii.

¹⁶Elsaino, «Ninke ledo noo olanto insatenni rooretena waajjitooti» yiisi.

¹⁷Hakkunni gedensaanni Elsai, «Kaaliiqa'ya ballo, la"anno gede illesi fani» yee huucci. Kaaliiqino soqqamaanchoho illesi fani. Isino la"anno woyite gaaru aana giirate faradinna faradi gaare Elsai gaangeessite noota afi.

¹⁸Sooriyootu gamba yite dagguta Elsai, «Kaaliiqa'ya konne manna ille ballisi!» yee huucci'ri. Kaaliiqino Elsai huuccatto macciishshe illensa ballisi.

¹⁹Hakkunni gedensaanni Elsai insawa shiqqi yee, «Doogo sodhinoonni; hasidhinoonni katami konne di"ikkino; hasidhinoonni manchiwa ani haa're masseemmo'nena hoode'ya amme!» yee Samaariya haa're ha'rinsa.

²⁰Katama e'uhu gedensaanni Elsai, «Kaaliiqa'ya, la'ona illensa fani» yee huucci. Kaaliiqi huuccattosi macciishshe illensa fanita, Samaariyaho noota affu.

²¹Israeelete mooteno insa afe, «Mooticha'ya, konne manna shooni?» yee Elsai xa'mi.

²²Elsaino, «Shitooti! Kore agurina oluwiinni qafadde abboottore nafa shaa dihasiissannohe. Xa ittannorenna aggannore uyite galagalte mootensawa hadhanno gede assi» yiisi.

²³Kunnira Israeelete moote lowo jila jile itisihunna hayikkisihu gedensaanni, galagalte mootensawa hadhanno gede assinsa. Hatte yannanni kayisse Sooriyootu Israeele kissukkinni keeshshitu.

²⁴Shiima yanna gedensaanni Sooriyu moote Benihadaadi olantosi baalanta adhe daye Samaariya gaangeessi.

²⁵Katama gaangeessino daafira hude batidheenna, 1 harrichu umo 80 kinchu birrinni, 200 giraame ikkannoha lembooli cilo 5 kinchu birrinni hidhinoonni.

²⁶Mitto barra Israeelete moote kinchu huxxi aanaanni hige sa"anni hee'reenna mitte mancho, «Moote mooticha'ya ballo, eeggatena kaa'lie!» yite woxarattu.

²⁷Mooteno, «Kaaliiqi kaa'la giwihero ani ma"assammoheraati? Ayiddummete gidu nooetanso kooffichoho woyine nooeta afitta?

²⁸Afummona isi qarrikki maati?» yee xa'mise. Iseno dawarte, «Tini mancho, ‹Techo ate qaaqqo inte, ga'a aneha inteemmona› yiteenna,

²⁹balanxe ane qaaqqo ganfe intoommo. Layinki soodo, ‹Atehano inteemmona abbinke› yuummata, iseha maaxidhino» yite ku'litu.

³⁰Mooteno konne coye macciishshe mase uddanosi dari. Huxxu aana noo daafira mule noo manni, giddoonni uddi're noota xiddu uddano afi.

³¹Mooteno, «Saafaaxi beetti Elsai umi techo aanasi galiro, Maganu ane lubbotenni woroonke"e» yii.

³²Isino Elsai haa're abbanno mancho soyi. Hatte yannara Elsai minisira dayino geerri ledo ofolle no. Mootete soqqamaanchi hakkiira iillara rahe hee'reenna Elsai geerraho, «Hakku mundeete angahu ane shaara manna soyino! Soyinohuno kune dayinona eannokki gede mine cuffe; mooteno badheenni hoodesi daanni no» yiinsa.

³³Elsai geerraho coyi're gudikkinni, moote[6] daye, «Konne qarra abbinonkehu Kaaliiqaati. Kunni ka'a Kaaliiqi ma"assaera agadheemmo?» yii.