Read Sidama_Qullaawa _Maxaafa LAYINKI MOOTOOLLA 8 Bible Online

LAYINKI MOOTOOLLA 8 - Sidama_Qullaawa _Maxaafa bible

LAYINKI MOOTOOLLA 8

¹Elsai qaaqqose reyotenni kayisise manchora, «Kaaliiqi tenne gobbara 7 diri hude soyaraatina, lubbo gatisi'rate minikki manni ledo fulte wolewa ha'ri» yee kulinose.

²Iseno Elsai kulinosere macciishshite minise manni ledo fulte hadhe Filisxeemete gobbara 7 diro heedhino.

³Lamalunku hudete diri saihu gedensaanni, galagalte gobbase higge, mootenniwa marte minesenna baattose qollannise gede xa'midhino.

⁴Tini mancho, moote Elsai soqqamaanchi Giyaazi ledo hasaawanni hee'reenna daggu. Moote Giyaazi hasaawisinohu Elsai assino maalale afara hasi'reeti.

⁵Giyaazi reyino qaaqqo Elsai kayisinota mootete kulanni hee'reenna, mootete eegantara mancho qaaqqise ledo ka'e daggu. Giyaazino, «Mooticha'ya, kune manchono tenneeti; Elsai reyotenni kayisihu qaaqqiseno konneeti» yii.

⁶Mooteno ikkino coye baala mancho lede xa'me buuxi. Hakkunni gedensaanni moote ledosi gashshaano giddonni mitto woshshe, «Isere baalanka, baattosenna 7 diro wo'ma baattosera loonsoonni gide hirre haa'noonni woxi nafa gatikkinni qolise» yee hajaji.

⁷Sooriyu moote Benihadaadi dhiwame hee'reenna Elsai Demaasiqo ha'ri. Mooteno Elsai hakkiira dayinota macciishshe,

⁸ledosi gashshaano giddonni Azaheeli woshshe, «Himanaanchoho konne afansha haadhe massite, ani kunni dhibbinni hureemmoronna hoogeemmoro Kaaliiqa xa'mannoe gede kulisi» yii.

⁹Hakkiinnino Azaheeli Demaasiqote baattora nooha dancha dooraminore 40 gaalira hogowe Elsaiwa ha'ri. Azaheeli Elsainni xaade, «Soqqamaanchikki Sooriyu moote Benihadaadi amadinosi dhibbinni hurannoronna hoogannoro kulattosi gede xa'mammora atewa soyinoe» yii.

¹⁰Elsaino, «Benihadaadi reyannota Kaaliiqi leellishinoe. Ati kayinni marte, ‹Huratto› yite kulisi» yii.

¹¹Hakkunni gedensaanni Maganu manchi Elsai alba kolishshi're Azaheeli saalanno geeshsha geeqe lai. Qoleno hedeweelcho hindiiddo qaxa qaxa assi.

¹²Azaheeli, «Mooticha'ya, mayira wi'latto?» yee xa'misi. Elsaino daware, «Wi'leemmohu Israeelete manna gawajjatto gara afeeti; qiishonsara giira qasatto. Wedellansa bisetenni shaatto; qaaqquullensa baattote aana tugge cancanatto; godowinni noo meentirano godowa daratto» yiisi.

¹³Azaheelino, «Ani mittoreno ditidhoommoho! Hattoo coye assammora hiitto ikke dandeemmo?» yii. Elsaino daware, «Ati Sooriyu moote ikkattota Kaaliiqi leellishinoe» yiisi.

¹⁴Azaheeli Elsaiwiinni fule mootichisiwa ha'ri. Moote Benihadaadino, «Elsai mayihe?» yee xa'misi. Azaheelino, «Halaalinta ati dhibbikkinni hurattota kulinoe» yiisi.

¹⁵Layinki barra Azaheeli seemma haa're waaho cuue fushshe, isenni moote fuge shii. Hakkunni gedensaanni Azaheeli isi darga moohi.

¹⁶Akiaabi beetti Iyoraami Israeelete moohihunni ontikki diro, Iyosaafiixi beetti Iyoraami Yihudaho moohino.

¹⁷Isi moohinohu 32 dirisinniiti. Yerusaalame teesso assi're 8 diro gashshino.

¹⁸Akiaabi beetto adhino daafira isino Akiaabinna wolootu Israeelete mootoolla hadhinota busha doogo ha'rino; Kaaliiqi giwanno coyeno assino.

¹⁹Ikkollana Kaaliiqi Daawiti mininni moohannohu hoogannokki gede uyinosi hexxo daafira yee Yihuda gudara dihasi'rino.

²⁰Iyoraami yannara, Edoomi Yihudaho hajajama giwe umisi gashshoote uurrisi'rino.

²¹Kunnira, Iyoraami faradi gaaresi baala koorsiise Tsaiiri Katama gaadi. Edoomootu isonna faradi gaarete hajajaano gaangeessitu. Insa kayinni hashsha fulte ba'eenna, olantosi qae qaensa xooqqu.

²²Edoomi gosa hatte yannanni kayisse Yihudaho gara gibbu. Libina Katami mannino hajajama giwi.

²³Iyoraami assinohu wolu coyi baalu Yihudu mootoolla dhagge amadino maxaafira borreessame no.

²⁴Iyoraamino annuwasinte gede reenna, Daawiti Katamira mootoollate waammara madaarrisi. Beettisi Akaaziyaasi isi darga moohi.

²⁵Israeelete moote Akiaabi beetti Iyoraami moohihunni tonaa layinki diro, Iyoraami beetti Akaaziyaasi Yihudaho moohino.

²⁶Akaaziyaasi moohinohu 22 dirisinniiti. Yerusaalame teesso assi're 1 diro gashshino. Amasi Ataaliya Israeelete moote Omiiri beetti Akiaabi ilinote.

²⁷Akaaziyaasi moote Akiaabira ballo ikkino daafira, Akiaabi maate gede isino Kaaliiqi giwanno coye assino.

²⁸Akaaziyaasino Akiaabi beettira Iyoraamira ha'le Sooriyu moote Azaheeli qasate Geleaadira Raamooti Katama gaadi. Olu aana heedheenna Iyoraami madi'ri.

²⁹Iyoraami, mada hurtasi geeshsha galagale Iyiziraeeli Katama ha'ri. Akaaziyaasino la"asira mari.