Read Sidama_Qullaawa _Maxaafa UMI DUDUWO 14 Bible Online

UMI DUDUWO 14 - Sidama_Qullaawa _Maxaafa bible

UMI DUDUWO 14

¹Mitto barra, Kiraami yinannihu Xiroosi moote Daawitiwa manna soyi. Daawitira mootete mine mintannore daguwu haqqe anga haadhinore haqqunni mintannorenna kinchunni mintannoreno ledo soyino.

²Daawitino Kaaliiqi Israeelete moote asse uurrisinositanna mannisi Israeelete daafira yee gashshootesi lowo geeshsha ayirrado assinota buuxi.

³Daawiti Yerusaalame dayihu gedensaanni, meento lede adhe labballonna seenne ili.

⁴Yerusaalamete ilantinosi ooso: Shamua, Shobaabi, Naataani, Selemooni,

⁵Yibihaari, Elishua, Eelifeleexi,

⁶Noogahi, Nefeegi, Yaafia,

⁷Elishamai, Eliyaadaatinna[11] Eelifalaaxiiti.

⁸Filisxeeme Daawiti Israeele baalate moote ikke buuraminota macciishshite, qafaddasira fultu. Isino konne coye macciishshe insa ledo olamara fuli.

⁹Hakkunnira albaanni Filisxeeme dagge Refayimi Lagicha e'e horritino.

¹⁰Daawiti, «Fule Filisxeeme qasoni? Anga'yara sayisse aattoeni?» yee Magano xa'mi. Kaaliiqino Daawitira, «Ee, Filisxeeme angakkira sayise eemmohena fulte qasi» yiisi.

¹¹Daawitino Beaali-Peraasiimi yinanniwa daye, Filisxeeme qase qeeli. Qeelihu gedensaanni, «Maganu ane widoonni qole diina'ya lolahu gede asse dhoosino» yii. Kunnira hakkonne darga, «Beaali-Peraasiimi»[12] yini.

¹²Filisxeemeno xooqqanni kaphunnita magannansa hunte hadhu; Daawitino magannansa giirre hunnanni gede hajaji.

¹³Filisxeemeno galagalte higge Refayimi Lagicha horra hanaffu.

¹⁴Daawiti xaano Magano lede xa'mi. Isino, «Xa noottowa heedhe qassootina, badheenni higge gaangeessite odahete mule heedhe qasi.

¹⁵Odahete iima bagadaanonnihu gedee hirba macciishshittoro, hatti yanna ani Filisxeemete olanto ganammora balaxe albakkiinni fuleemmotena rakke qasi» yiisi.

¹⁶Daawitino Maganu hajajinosi gede assi. Filisxeeme Gebaooninni kayise Gezeeri geeshsha shorri.

¹⁷Daawiti duduwino gobba tuqi. Kaaliiqino Daawiti gosa baala waajjitannoha assisi.