Read Sidama_Qullaawa _Maxaafa UMI DUDUWO 17 Bible Online

UMI DUDUWO 17 - Sidama_Qullaawa _Maxaafa bible

UMI DUDUWO 17

¹Moote Daawiti mootimmasi mine hee're, himanaancho Naataani woshshiishe, «Kune ani daguwunni minnoonni minira noommo. Maganunnihu Gondooru Taabooti kayinni dukkanu giddo no!» yii.

²Naataanino daware, «Maganu ate ledo noona, wodanikkinni hedoottore baala assi» yiisi.

³Hakko hashsha kayinni Maganu Naataanira,

⁴«Marte soqqamaanchi'ya Daawitira, ‹Ani hee'reemmoha Qullaawa Mine minattoehu ate di"ikkootto.

⁵Israeelete manna Gibitsetenni gatise fushshummo warinni kayise xaa geeshsha, dukkanu giddo galanni dargunni darga sa"anni hee'roommo ikkinnina mine dihee'roommo.

⁶Israeelete manni ledo ha'rummo yanna baalantera manni'yara allaalaasine asse woroommo albisooti giddonni mittuno daguwunni mine minaera dixa'mi'roommo.›

⁷«Kunnira xaano Daawiti soqqamaanchi'yara, ‹Olantote Mootichi Kaaliiqi, ate ge'reewo allaaltanni noottoha manni'yara Israeelete albisa ikkatto gede haa'roommohe.

⁸Ha'rittowa baala ate ledo noommo; alba higge ha'ritto bikkinni diinakki baala qeeloommohe. Kunni ka'ano baattote aana egennantino jajjabbi gede maccaha asseemmohe.

⁹Manni'yara Israeelete mitto darga doore hakkiicho heedhanno gede assoommo. Hakko heedhannowa kunni ka'a gadadu diamadannonsa. Kawiira daggeenna gashshitannonsare worummonsahunni kayisse, haxawarra gosa yanna yannantenni qassinonsa. Kunni ka'a kayinni diinna'ne shollisheemmo. « ‹Minekkino seekkeemmo.[13]

¹¹Dirikki goofeenna annuwakkinni xaadatto yannara, ate giddonni fulannoha mitto kayise moohiseemmo. Gashshootesino jawaachisheemmo.

¹²Mine'yano isi minanno; gashshootesi muramannokki gede geedonniha asseemmo.

¹³Ani anna ikkeemmosi; isino beetto ikkannoe. Isi darga ate moohisate gashshootisi aaninni dirrisummohu Saaooli gede asse kaa'lo'ya beettikki mulinni dixeertiseemmo.

¹⁴Manni'yanna gashshooti'ya aana hegere geeshsha moohiseemmosi; gashshootisirano gawalo diheedhanno yiino› yite kulisi» yii.

¹⁵Kunni garinni Naataani Maganu xawisinosire baala Daawitira kulisi.

¹⁶Hakkunni gedensaanni Moote Daawiti e"e Dukkanu giddo Kaaliiqi albaanni ofolle, «Kaaliiqa'ya, konne baala coye assittoehu ani ayeti? Maate'yano hiittenneeti?

¹⁷Kaaliiqa Magano'ya, xaano kune hakkiinni sainore assitanni noottoe; kunni ka'a daggara nootera ilama'yarano hexxo ootto; aneno jawu manchi gede assite kiiroottoe.

¹⁸Ati ane soqqamaanchokki egennoottoe; ayirrinyeno oottoe. Kunninni sae ani maa coy'reemmo?

¹⁹Coyi'rootto qaali daafiranna hedootto hedo garinni konne jawa coye assite, ane soqqamaanchikkira leellishootto.

²⁰Kunnira Kaaliiqa'ya, ate gedeehu dino; maccankenni macciishshinummonte gede ate agurranna wolu Magani nookkita anfoommo.

²¹Mannakki assidhe Gibitsete borojjimmanni gatisse fushshoottoti Israeelete gedee gosa mama no? Insara assootto dhaggenna maalale gobba baalate su'makki egensiissino. Mannakki Gibitsetenni fushshite dargansa amadanno gede wole gosa shorrite hunootto.

²²Mannakki Israeeleno hegerera ateha assi'rootto. Mooticha, atino Maganonsa ikkootto.

²³«Xaano Kaaliiqa, albillittete yanna baalantera aneranna maate'yara ootto hexxo wonshi.

²⁴Su'mikki hegere geeshsha ayirrado ikkanno. Mannuno, ‹Olantote Mootichi Kaaliiqi Israeelete Maganooti› yaanno. Gashshoote'yano geedonniha assatto.

²⁵Israeelete Magano, ane soqqamaanchikkira konne coye baala xawisoottoe daafiranna sircho'yano moohisattota kuloottoe daafira, tenne galatu huuccatto atewa shiqishi'ra dandoommo.

²⁶«Ati Kaaliiqi Maganoho. Anerano tenne dhaggeeffantanni hexxo oottoe.

²⁷Kaaliiqa Mooticha'ya, maate'ya geedonnita assite maassi'ratto gede huucci'reemmohe. Kune maate'ya maassi'rootto. Maassokkino hegere geeshsha insa ledo heedhanno» yii.