Read Sidama_Qullaawa _Maxaafa UMI DUDUWO 19 Bible Online

UMI DUDUWO 19 - Sidama_Qullaawa _Maxaafa bible

UMI DUDUWO 19

¹Shiima yanna gedensaanni Amooni moote Naoosi reenna, beettisi Hanooni isi darga moohi.

²Moote Daawiti, «Annisi Naoosi assinoente gede anino beettisi Hanoonira danchumma asse qoleemmosi» yii. Kunnira, Daawiti annisi reyora dadillinota egensiisate Hanooniwa manna soyi. Daawiti soqqamaanono marte Amooni iillitu yannara,

³Amooni albisooti mootensa Hanoonira, «Daawiti annikki reyora dadille jawaachishanno manna soyinoha lawannohe? Kuni manni katama dooyye ha'reenna, daye gudankera soyinoha ikkinota diafootto?» yitusi.

⁴Hanoonino Daawiti soqqamaano amade ereedansa gama darate meede, uddanonsano hallu geeshsha haranse mure ha'risinsa.

⁵Daawiti konne coye macciishshe mannu lowo geeshsha saalfatino daafira, manna soye, «Ereedi'ne lopha geeshsha Iyyaarko agarre; hakkunni gedensaanni higginannina» yiinsa.

⁶Moote Hanooninna Amooni manni angansanni Daawiti diina assidhinota affe, Mesiphexoomiyunna Sooriyu gobbara Maakanna Tsooba mannira 34,000 kiilo ikkanno birra uyite faradonna faradi gaare kiraho adhitu.

⁷Kirunni abbi'rinoti 32,000 faradi gaarenna Maaka moote olanto dagge Medeba mule kunseentu. Amoonootuno katammansanni fulte olaho qixxaabbu.

⁸Daawiti konne coye macciishshe, Iyoaabi olantosi baalate ledo gaadanno gede assi.

⁹Amoonootu fulte dannawu katamansa Raaba e'nanniwa dagge darga amaddu. Insa kaa'litara daggino mootoollano katamaho gobbaanni noo xawira darga amaddu.

¹⁰Iyoaabino albaanninna duumbaanni diinu doyisse noota afe Israeelete olanto giddonni bareedda doore, Sooriyootu ledo olantanno gede assi.

¹¹Gattino olantono rodiisi Abisa hajajanna Amooni gosa ledo olantanno gede assi.

¹²Iyoaabi Abisara, «Sooriyootu wolqissuero ati dagge kaa'lattoe; Amoonootu atera wolqissuhero kayinni ani daye kaa'leemmohe.

¹³Kunnira xa jawaati! Manninkenna Maganinke katammara jawaante olammo. Baalunku coyi Kaaliiqi yiino gede ikko» yii.

¹⁴Iyoaabinna olantosi Sooriyootu aana bala tuggara shiqqi yite daggu yannara, Sooriyootu albinsanni xooqqu.

¹⁵Amoonootu Sooriyootu xooqquta affe, insano qolte Abisa albinni xooqqe, katama e'u. Iyoaabino Yerusaalame higi.

¹⁶Sooriyootu Israeele qeeltinonsata affe, Efiraaxisira soojjaatoonni noo gashshootinsa giddonni olanto kodhite Shobaaki yinanni manchi albisanno gede assitu. Shobaaki moote Hadaadiezeerira olu hajajanchooti.

¹⁷Daawiti konne coye macciishshe, Israeelete olanto baalanta mittowa gamba assi'ri. Yordaanoosi fule Sooriyootu noowa dayenna ola hanaffu.

¹⁸Israeelootu Sooriyoota badhe qolte shorritu. Daawitinna olantosi Sooriyootu giddonni 7,000 faradi gaare gantannorenna 40,000 lekkatenni noo olanto shitu. Olantote hajajaancho Shobaakino shitu.

¹⁹Hadaadiezeerira gabbartanno gashshaano baala Israeele qeeltinonsata affe Daawiti ledo araarante, isira gabbartannore ikkitu. Hakkunni gedensaanni Sooriyootu Amoonoota kaa'litara dihasidhino.